Read Quechua Bolivia DC Bible SAN LUCAS 15 Bible Online

SAN LUCAS 15 - Quechua Bolivia DC Bible bible

SAN LUCAS 15

¹Tukuy impuestota cobrajkuna, juchasapas ima, Jesusman qayllaykorqanku uyarinankupaj.

²Chaynejta fariseosqa, leymanta yachachejkunawan thutuspa nisharqanku: Kay runaqa juchasapaswan tantakun, paykunawan khuskataj mikhun, nispa.

³Jesustaj kay rijch'anachinata yachacherqa:

⁴Manachu mayqenniykichejpis qankunamanta, pachaj ovejasniyoj kaspa, ujnin chinkajtin, isq'on chunka isq'onniyojta ch'innejpi saqespa mask'aj rin, chinkasqa kajta tarinankama?

⁵Tariytawantaj q'epiriykukun may kusisqa.

⁶Wasinman chayaytawantajri tantaykun kausaqesninta, qayllampi kajkunata ima, nispa: Noqawan kusikuychej, imaraykuchus tarikapuni chinkasqa ovejayta.

⁷Kayta niykichej yachanaykichejpaj; ajinallataj aswan kusiy kanqa janaj pachapi uj juchasapa runa Diosman kutiripojtin, chay isq'on chunka isq'onniyoj mana juchayojkunamanta nisqaqa. Paykunaqa Diosman mana kutirinankuñachu tiyan.

⁸Manachu pi warmipis, chunka dracma qolqemanta ujnin kajta chinkachispa, kikimpacha k'anchata jap'ichiytawan mask'an wasinta pichaspa, tarinankama?

⁹Tariytawantaj kausaqesninta, qayllampi kajkunata ima tantaykuspa paykunaman nin: Kusikuychej noqawan khuska, imaraykuchus tarikapuni chinkasqa qolqeyta.

¹⁰Ajina kusiy kasqanta niykichej, Diospa angelesnimpa ñaupaqempi, uj juchasapa runa Diosman kutirikojtin.

¹¹Jesusqa nillarqataj: Uj runa iskay qhari wawasniyoj karqa.

¹²Sullk'a kajqa tatanman nerqa: Tatáy, chayaqeyta qopuway, nispa. Tatankutaj sapa ujninkuman chayaqenkuta qoporqa.

¹³Pisi p'unchaykunamantataj, sullk'a kaj churenqa karu llajtaman riporqa, tukuy chayaqenta tantaykuspa. Jaqaypitaj tukuy qolqenta tukucherqa sajrata kausaspa.

¹⁴Chayaqenta tukuchisqantawantaj, manchay yarqhay karqa chay llajtapi; paytaj pisichikuyta qallarerqa.

¹⁵Chayrayku llank'anata mask'arqa, jinapitaj chay llajtayoj patrompaman qayllaykorqa. Paytaj jallp'anman kacharqa khuchista michejta.

¹⁶Chaypitaj sajsakuyta munaj khuchi mikhuna thaqoswan; manataj pillapis ni imata jaywarejchu.

¹⁷Yuyayninman churakuspataj sonqompi nerqa: Tataypa wasimpi llank'ajkunaqa ashkha mikhunayoj kanku, noqataj kaypi yarqhaymanta wañushaniña!

¹⁸Kutiripusaj tataypa wasinman, paymantaj nisaj: Tatáy, Diospaj juchallini, qampajpis juchallillanitaj.

¹⁹Manaña wawayki ninapaj jinachu kani; ujnin llank'ajniykita jinallaña jap'ikapuway ari, nispa.

²⁰Kikimpacha sayariytawantaj kutiporqa tatampaman. Karullapiraj kashajtintaj, tatanqa payta rikorqa. Khuyakuspataj taripaj rerqa, kunkanmanta ojllaykuytawantaj much'aykorqa.

²¹Wawantaj nerqa: Tatáy, Diospaj juchallini, qampajpis juchallillanitaj; manaña wawayki ninapaj jinachu kani.

²²Chantá tatanqa runasninta kamacherqa: Kunampacha orqhomuychej aswan sumaj p'achata, p'achallichiychejtaj. Anillotapis makisninman churaychej, zapatostataj chakisninman.

²³Wira kaj waka uñata apamuspa ñak'aychej; qhochukuta ruwaspataj sumajta mikhusunchej.

²⁴Kay wawayqa wañusqa karqa, kausarimuntaj; chinkasqa karqa, tarisqataj. Ajinamanta kusikuyta qallarerqanku.

²⁵Chaykamataj kuraj kaj wawanqa chajrapi kasharqa. Kutimuspataj wasinman qayllaykorqa, uyarerqataj takisqankuta, tususqankuta ima.

²⁶Ujnin kaj uywasqanta wajyaspataj taporqa: Ima ch'ajwataj chayri?, nispa.

²⁷Paytaj kuticherqa: Wauqeyki chayampun; tataykita wira kaj waka uñata ñak'achin, allillan kutimpusqanrayku.

²⁸Chantaqa pay phiñakorqa, manataj wasinman yaykuyta munarqachu. Tatantaj llojsimuspa mayta nerqa yaykunanta.

²⁹Paytaj tatanman nerqa: Noqaqa, kay chhika watastaña sirviyki, kasuspallapuni; manataj jayk'ajpis uj cabritallatapis qowarqankichu kausaqesniywan mikhuspa kusirikunaypaj.

³⁰Kay wawaykeqa, tukuy kapuyniykita usuchimorqa sajra kausaj warmiswan khuska, kutimojtintaj paypajqa ñak'achinki aswan wira kaj waka uñata.

³¹Tatantaj nerqa: Wawáy, qanqa noqawampuni kashanki, tukuy imasniypis qampatapuni.

³²Atikullarqa qhochukuta ruwaspa kusikunaqa. Kay wauqeykeqa wañusqa karqa, kausarimpuntaj; chinkasqa kasqanmantataj rikhurimpun.