Read Quechua Bolivia DC Bible SAN LUCAS 16 Bible Online

SAN LUCAS 16 - Quechua Bolivia DC Bible bible

SAN LUCAS 16

¹Jesusqa nillarqataj yachachisqasninman: Uj qhapaj patrompata mayordomon karqa; paytataj ch'ataykorqanku, patronnimpa kapuyninta usuchisqanmanta.

²Chayrayku patronqa wajyaspa nerqa: Imastataj qanmanta uyariniri? Cuentata qoway mayordomo kasqaykimanta. Jina chayqa, manaña astawan mayordomoy kayta atinkichu.

³Mayordomotaj umacharikuspa nerqa: Imanasajtaj kunanri? Patronniypis mayordomo kayniyta qhechupuwan; llank'ayta mana atinichu; mañakuytapis p'enqakuni.

⁴Yachaniña imatachus ruwanayta patrón wijch'uwajtin wasiyojkuna wajyarinawankupaj.

⁵Chantaqa, chayman jina patronnimpa sapa uj manunta wajyaspa, ñaupaj kajta taporqa: Mashkha manutaj kanki patronniyman?

⁶Paytaj kuticherqa: Pachaj p'uyñu aceite manu kani, nispa. Mayordomotaj nerqa: Jap'ikapuy reciboykita, tiyakuspataj escribiy phishqa chunkallataña.

⁷Chantá wajtañataj taporqa: Qanrí, mashkha manutaj kanki? Paytaj nerqa: Pachaj tupu trigo qonay tiyan. Paytaj kuticherqa: Kay reciboykita jap'ikapuy, escribiytaj pusaj chunkallataña.

⁸Patrontaj alabarqa sajra mayordomota, ancha yuyayniyoj kasqanmanta. Kay mundoj wawasnenqa aswan yachaysapas kanku paykuna ukhupi, k'anchaypa wawasninmanta nisqaqa.

⁹Chaynejta, kausaqesta mask'akuychej mana allin kaj qolqewan; chay qolqe tukukojtintaj, wiñay tiyakunasman wajyachikunaykichejpaj.

¹⁰Pillapis junt'ajqa, ashkhapipis junt'allantaj. Pisipi mana cheqantachu ruwajqa, manallataj ashkhapipis cheqanta ruwanchu.

¹¹Sichus kay juchallikoj mundoj kapuyninwan mana allintachu ruwankichej chayqa, pitaj cheqa kajta qosunkichejman?

¹²Manachus wajpata kajwan junt'arqankichej chayqa, pitaj qopusunkichejman qankunajta kajtari?

¹³Mana pi kamachipis atinmanchu iskay patronespa kamachisqasninta ruwaytaqa. Ujninta chejnenqa, ujnintataj munakonqa. Ujninta allimpaj jap'enqa, ujnintataj qhesachanqa. Mana atinkichejchu Diosta sirviyta, qolqetawan khuska.

¹⁴Kay tukuyta uyarisharqanku qolqe munapayaj fariseos, asipayarqankutaj.

¹⁵Chaynejta paykunaman nerqa: Qankunaqa sumaj runaman rijch'akunkichej, llimphu runaspis kawajchej jina; astawanqa Dios yachashan sonqoykichejta; runas sumajpaj qhawasqankoqa, Diospa ñaupaqempi ancha millay.

¹⁶Leywan profetaswanqa Juan Bautistakama karqanku. Chaymantapacha willakun Diospa reinonmanta; tukuytaj chayman kallpakuspa yaykuyta munanku.

¹⁷Janaj pacha, kay pachapis chinkayta atin; leypatarí, mana uj ch'iñi imitallampis chinkayta atinchu.

¹⁸Pillapis warminta qhesachaspa, wajwan casarajqa, qhenchachakun; pillapis qosanmanta t'aqasqa warmiwan casarajpis, qhenchachakullantaj.

¹⁹Uj qhapaj runa karqa. Paytaj linomanta awasqa puka p'achawan p'achallikoj. Sapa p'unchaytaj sumaj mikhuyta ruwaj, runaj rikunanta.

²⁰Kallarqataj uj wajcha runa Lázaro sutiyoj, sarnaj tukusqan. Payqa sirikusharqa chay chapaj runaj wasi punkumpi.

²¹Munajtaj qhapaj runaj mesanmanta urmamoj mikhuy t'unasllawampis sajsakuyta. Alqospis qayllaykuspa llajwaj kanku sarnasninta.

²²Chantá wajcha runaqa wañuporqa; angelestaj pusarqanku maypichus Abraham kasharqa chayman. Qhapaj runapis wañupullarqataj, paytataj p'ampamorqanku.

²³Ukhu pachapitaj manchayta ñak'arispa qhawarerqa, rikorqataj karupi Lazarota Abrahamtawan.

²⁴Chantá qhaparerqa: Tatáy Abraham, khuyariway ari. Lazarota kacharimuway dedo puntallantapis yakupi joq'ocharispa qalluyta thasnurinawampaj; ancha nina k'ajaypi ñak'arishani.

²⁵Abrahamtaj nerqa: Yuyarikuy wawáy, kausashaspa allin imasta jap'isqaykita. Lazarorí mana walejpichu karqa. Chaynejta kunanqa sonqochasqa kashan, qantaj ñak'arishanki.

²⁶Chantapis uj manchay wayq'o t'aqashawanchej; chayrayku kaymanta qankunaman riyta munajkunaqa mana atinkuchu; nitaj chaymanta noqaykuman chimpamuyta atinkuchu.

²⁷Qhapaj runataj kuticherqa: Tatáy, mañakuyki ari, tataypa wasillanmampis Lazarota kacharinaykita.

²⁸Jaqaypi phishqa wauqesniyman willarimpuwachun, amaña paykuna kayman ñak'arej jamunankupaj.

²⁹Abrahamtaj kuticherqa: Chaypaj kashanku Moiseswan profetaswan. Paykunata uyarichunku.

³⁰Chantá pay nerqa;: Mana jinachu tata Abraham. Ichapis wañusqasmanta uj rejtenqa, wauqesniy juchasninkuta saqespa Diosman kutirikonqanku.

³¹Abrahamtaj nerqa: Moisesta profetastawan mana uyarenqanku chayqa, manallataj kasonqankuchu wañusqasmanta jatarimojtapis.