Read Quechua Bolivia DC Bible SAN LUCAS 17 Bible Online

SAN LUCAS 17 - Quechua Bolivia DC Bible bible

SAN LUCAS 17

¹Jesustaj nerqa yachachisqasninman: Juchaman urmanaqa kallanqapuni; chantapis, ay jaqay runamanta, pichus wajta juchaman urmachejmanta!

²Aswan allin kanman karqa paypajqa, molino rumita kunkanman warkhuykuspa qochaman wijch'uykunanku; kay juch'uykunamanta ujninta urmachinan kajtenqa.

³Kankuna kikiykichejta qhawarikuychej. Wauqeyki qampaj juchallikojtenqa k'amiy; yuyayninman kutirikojtenqa juchasninmanta perdonapuy.

⁴Qanchis kutitachus, uj diapi qampaj juchallikunman; qanchis kutitaj juchanmanta kutirikunman, llakikuni nispa chayqa, perdonapuy.

⁵Apostolestaj Señorman nerqanku: Feniykuta yapariwayku.

⁶Señortaj kuticherqa: Feniykichejchus uj mostaza muju jinallapis kanman chayqa, atiwajchej kay mora sach'ata niyta: Sik'ikuy, jatun qochapitaj saphichakuy, nispa; kasusunkichejmantaj.

⁷Pitaj qankunamanta, campomanta kamachin kutimojtin, llank'asqanmanta, chayrí uywasta qhawasqanmanta, ninman: Yaykumuy kay mesaman tiyaykumuy, nispa?

⁸Manachu astawanqa ninman: Wakichiy mikhunaypaj, allinta chumpikuy, jaywariwaytaj mikhuyta ujyayta ima tukunaykama; chaymantaraj qampis mikhunki, ujyankitaj, nispa?

⁹Patronqa mana agradecekunchu kamachin ajinata kasusqanmanta.

¹⁰Ajinallatataj qankunapis, Diospa kamachisqanta tukuytawankama ninaykichej: Mana walej kamachis kanchej, ruwanallanchejta ruwanchej, nispa.

¹¹Jesusqa, Jerusalenman rishaspa pasarqa Samarianejta, Galileanejta ima.

¹²Uj ranchoman qayllaykushajtintaj, chunka runas lepra onqoyniyoj payta taripaj llojsimorqanku. Paykunataj karullapi sayaykukorqanku.

¹³Qhaparerqankutaj: Maestro Jesús, khuyariwayku ari!, nispa.

¹⁴Paykunata rikuytawantaj Jesusqa nerqa: Rispa, sacerdotesman rikuchikamuychej. Paykunataj rishaspallaraj llimphuchasqas rikhurerqanku.

¹⁵Paykunamanta ujnin kajtaj, lepranmanta thañisqa rikhurispa, kutirimorqa; sinch'ita qhaparispataj Diosta yupaycharqa.

¹⁶Jesuspa ñaupaqenman qonqoriykukuspataj, pampakama k'umuykuspa graciasta qorqa. Chay runataj samaritano karqa.

¹⁷Jesustaj kutichispa nerqa: Manachu chunka karqanku llimphuchasqasqa? Maypitaj chay isq'on kashankuri?

¹⁸Manachu pipis kutimorqa, Diosta yupaychaj; kay waj llajtayoj runallachu kutimorqa?, nispa.

¹⁹Chaymantataj Jesusqa runaman nerqa: Sayariy, ripuy, feniyki thañichisunki, nispa.

²⁰Fariseosqa taporqanku: Jayk'ajtaj Diospa reinon chayamonqa?, nispa. Jesusqa kuticherqa: Diospa reinonqa mana ñaupajta willaspachu jamonqa.

²¹Nitaj runasqa nenqankuchu, kaypi kashan, chayrí jaqaypi kashan, nispa. Diospa reinonqa qankuna uqhupiña kashan.

²²Chaymanta yachachisqasninman nerqa: Tiempo chayamonqa maypachachus qankuna Diospa churimpa ujnin p'unchaynillantapis rikuyta munankichej chayqa, mana rikunkichejchu.

²³Nisonqachejtaj chaypacha: Kayqa, kaypi kashan; jaqayqa, jaqaypi kashan, nispa. Ama ari riychejchu, nitaj qhatiychejchu.

²⁴Imaynatachus lliuj lliuj jina, ujnin cieloj k'uchunmanta waj k'uchunkama k'ancharin, ajinallataj kanqa Runaj Churimpa jamunan p'unchaypi.

²⁵Chaypajqa, anchataraj ñak'arinan tiyan, qhesachasqataj kanqa kunan tiempo runasnejta.

²⁶Imaynatachus Noejpa tiempompi karqa, ajinallataj Runaj Churimpa jamuynimpipis kanqa.

²⁷Mikhusharqanku, ujyasharqanku, casarasharqanku, warmi wawasninkutapis casaranankupaj qosharqanku, Noé arcaman yaykunankama. Jatun parataj chayamuspa tukuyninkuta chinkacherqa.

²⁸Jinallataj karqa Lotpa tiempompi; mikhusharqanku, ujyasharqanku, rantisharqanku, qhatusharqanku, tarpusharqanku, wasistapis ruwasharqanku.

²⁹Lot Sodomamanta llojsimojtinkamataj, janaj pachamanta azufreyoj nina para paramorqa, tukuyninkutataj tukucherqa.

³⁰Ajinallataj kanqa Runaj Churin rikhurimonqa chay p'unchaypi.

³¹Chaypacha, pichus wasi patapi kashajqa, ama uraykamuchunchu, imallatapis wasin ukhumanta orqhokapoj. Jinallatataj, pichus chajrapi kajpis, ama wasinman kutimuchunku.

³²Lotpa warminmanta yuyarikuychej.

³³Kausayninta waqaychayta munajqa chinkachenqa; chinkachejtajrí tarikaponqa.

³⁴Chayrayku niykichej: Chay ch'iseqa iskay ukhu camapi kashanqanku; ujnin kaj pusasqa kanqa, ujnin kajtaj saqerparisqa.

³⁵Iskay warmispis, khuska kutashaspa; ujnin pusasqa kanqa, ujnintaj saqerparisqa. [

³⁶Iskay qharis chajrapi kashanqanku; ujnin pusasqa kanqa, ujnintaj saqerparisqa.]

³⁷Yachachisqasnintaj kayta uyarispa nerqanku: Maypitaj chay tukuy kanqa Señor?, nispa. Paytaj kuticherqa: Maypichus wañusqa kanqa, chayman q'arqañas tantakonqanku.