Read Quechua Bolivia DC Bible SAN LUCAS 18 Bible Online

SAN LUCAS 18 - Quechua Bolivia DC Bible bible

SAN LUCAS 18

¹Jesustaj uj rijch'anachinawan yachacherqa, Diosmantaqa mañakunapuni kasqanta mana sayk'uspa.

²Nerqataj: Uj llajtapi karqa uj juez. Payqa Diosta mana manchachikojchu, nitaj pitapis kasuta ruwajchu.

³Kallarqataj chay llajtapi uj viuda. Payqa rillajpuni juezman: Contrarioymanta justiciata ruwariway, nispa.

⁴Jueztaj unayta mana uyariyta munarqachu. Chaymantaña yuyarikuspa nerqa: Diostaqa mana manchachikunichu, nitaj pitapis kasuta ruwanichu.

⁵Kay viudarí, mana samarejta saqeshawanchu; justiciata ruwapusaj, ama kay jinata sapa kuti jamuspa ninawampaj.

⁶Señortaj nerqa: Uyariychej, mana cheqan juezpa nisqanta.

⁷Manachu Diosqa, ajllasqasnin tuta p'unchay paymanta mañakojkunapaj, justiciata ruwanqa? Unaytarajchu suyachikunman?

⁸Chayrayku niykichej: Mana suyachikuspa justiciataqa ruwaponqa. Chaywampis Diospa Churin jamuspaqa, tarenqachu paypi creejkuna runasta kay mundopi?

⁹Jesús nillarqataj uj rijch'anachianta, pikunachus allin kasqankuta creekuspa, wajkunata qhesachajkunapaj, nispa: Iskay runas rerqanku temploman Diosmanta mañakoj. Ujnin karqa fariseo, ujnintaj impuestota cobraj.

¹¹Fariseo kajqa, sayaykuspa payllapaj mañakusharqa: Diosníy, graciasta qoyki. Mana wakinkuna jina suwachu, sajrachu, qhenchachu, nitaj kay impuestero jinachu kani, nispa.

¹²Noqaqa semanapi iskay kutita ayunani. Tukuy kapuyniymantataj sapa pachajmanta chunka kajta qoni nispa.

¹³Impuestero runataj karullamanta, manchachikuywan mana ñawisnillantapis pataman oqhariyta munarqachu. Chaynejta pechollanta takakusharqa: Diosníy, khuyariway ari noqa juchasapata, nispa.

¹⁴Kunanqa niykichej, kay impuestero wasinman kutiporqa juchasninmanta pampachasqa, fariseotaj mana. Jatunchakojqa p'enqaypi rikhurenqa; k'umuykukojtajrí jatunchasqa kanqa.

¹⁵Wawastataj Jesusman pusamoj kanku pay llankhaykunampaj. Chayta rikuspataj yachachisqasnenqa wawasta pusamojkunata k'amerqanku.

¹⁶Jesustaj wawasta wajyaspa yachachisqasninman nerqa: Ama jark'aychejchu wawas noqaman jamunankuta; kay jinaspatamin Diospa reinonqa.

¹⁷Cheqamanta niykichej: Pichus mana wawa jina Diospa reinonta jap'ejqa, mana chayman yaykonqachu.

¹⁸Uj kamachej runataj Jesusta taporqa: K'acha Maestro, imatataj ruwasaj wiñay kausayniyoj kanaypaj?, nispa.

¹⁹Jesustaj nerqa: Imaraykutaj k'acha niwanki? Mana pipis k'achaqa kanchu. Dioslla k'achaqa.

²⁰Yachanki Diospa kamachisqasninta: Ama qhenchachakunkichu, ama wañuchinkichu, ama suwankichu, ama qhasimanta tumpankichu; tataykita, mamaykitapis kasunki.

²¹Paytaj nerqa: Kay tukuyta wayna kasqaymantapacha ruwarqani.

²²Chayta uyarispataj Jesusqa payman nerqa: Chaywampis, uj imataraj ruwanayki tiyan: Vendemuy tukuy kapuyniykita, wajchasmantaj qomuy. Chantaqa kapuyniyoj kanki janaj pachapi. Chaymantaraj jamuy, qhatiwaytaj.

²³Kayta uyarispataj runaqa mayta llakikorqa, imaraykuchus ancha qhapaj karqa.

²⁴Runata llakisqata rikuspataj nerqa: Qhapajkunaqa ñak'ayllata Diospa reinonman yaykonqanku.

²⁵Uj camelloraj yarwej ningrinta yaykuyta atinman, qhapaj runa Diospa reinonman yaykunanmantaqa.

²⁶Chayta uyarejkunataj nerqanku: Jina kajtenqa, pitaj atenqa salvasqa kayta?

²⁷Jesustaj nerqa: Runaspaj mana atikojqa, Diospajqa atikumpuni.

²⁸Chaymantataj Pedro nerqa: Noqaykoqa tukuy imasniykuta saqeraspa qanwan kashayku.

²⁹Paytaj kuticherqa: Cheqamanta niykichej; pichus saqen wasinta, chayrí warminta, tatanta, mamanta, wawasnintapis Diospa reinonrayku chayqa, ashkhata jap'enqa kay pachapi, wiñay kausaytataj qhepa p'unchaykunapi.

³¹Chunka iskayniyoj yachachisqasninta wajyaspataj Jesús nerqa: Kunanqa risunchej Jerusalenman, chaypi Runaj Churinmanta profetaspa tukuy escribisqanku junt'akunampaj.

³²Gentilesman jap'ichispa asipayanqanku, p'enqaypitaj rikhurichenqanku k'amispa, thoqaykuspa ima.

³³Jasut'iytawantaj wañuchenqanku, kinsa p'unchayninmantaj kausarimonqa wañusqakunamanta.

³⁴Manataj paykunaqa tumpallatapis entienderqankuchu chay nisqanmanta; nitaj yacharqankuchu imamantachus parlasqanta.

³⁵Jericó llajtaman Jesús chayanayashajtintaj, uj ciego tiyakusharqa ñannejpi mañakuspa.

³⁶Ashkha runata pasajta uyarispataj, taporqa imachus chay kasqanta.

³⁷Willarqankutaj ciegomanqa, Nazaretmanta kaj Jesús pasashan, nispa.

³⁸Chantá ciego qhapariyta qallarerqa, nispa: Jesús, Davidpa Churin, khuyariway ari!

³⁹Ñaupajta rejkunataj k'amerqanku, ch'in kay, nispa. Chaywampis payqa astawanraj qhaparerqa: Davidpa Churin, khuyariway ari!, nispa.

⁴⁰Chantá Jesús, sayaykuspa pusachimorqa ciegota; chayamojtintaj taporqa: Imanasunaytataj munanki? Paytaj kuticherqa: Señor, rikuyta munani.

⁴²Jesustaj nerqa: Rikuy, feniyki qhawarichisunki, nispa.

⁴³Ciegotaj rikorqapacha. Qhaterqataj Jesusta, Diosta yupaychaspa. Tukuy runaspis, chayta rikuspa, Diosta yupaychallarqankutaj.