Read Quechua Bolivia DC Bible SAN LUCAS 20 Bible Online

SAN LUCAS 20 - Quechua Bolivia DC Bible bible

SAN LUCAS 20

¹Uj p'unchay Jesús templopi yachachisharqa runasman, evangeliomanta willaspa. Jinallapi chayamorqanku jatun sacerdotes, leymanta yachachejkuna, kurajkunawan ima.

²Jesusmantaj nerqanku: Niwayku ari, ima atiywantaj qan kay imasta ruwanki? Chayrí, pitaj kay atiyta qosunki?

³Kutichispataj nerqa: Kunanqa, noqapis ujta tapurillasqaykichejtaj; kutichiwaychej: Juampa bautismonqa Diosmantachu, chayrí runasmantachu?

⁴

⁵Chaypacha paykunapura siminakuyta qallarerqanku, nispa: Janaj pachamanta nisunman chayqa, payqa niwasun. Jina kajtenqa, imaraykutaj Juanta mana creerqankichejchu?, nispa.

⁶Runasmanta nisunman chayrí, tukuy llajtantinñataj rumiswan ch'anqawasunman, imaraykuchus paykunaqa Juanta profetapaj rejserqanku.

⁷Runastaj kuticherqanku, mana yachaykuchu, Juampa bautismonqa maymantachus kampis, nispa.

⁸Chaymantataj Jesús nerqa: Nillataj noqapis niykichejmanchu ima atiywanchus kay tukuy imata ruwasqayta.

⁹Runakunaman Jesús parlayta qallarerqa kay rijch'anachinamanta: Uj kuti, uj runa karqa. Paytaj uvasta plantarqa jallp'ampi. Llank'ajkunaman arriendaspataj ch'usarqa unaypaj.

¹⁰Uvas pallay tiempotataj, kachamorqa uj kamachinta, patrompata kajta mañanankupaj llank'ajkunamanta; paykunataj maqaykuspa ch'usajpachata kachaporqanku.

¹¹Chantá patronqa waj kamachintañataj kacharqa. Chay kajtapis, asipayaykuytawan maqaspa kachapullarqankutaj ch'usajpachata.

¹²Kinsa kaj kamachintañataj patronqa kacharqa; chay kamachintapis llank'ajkunaqa qharqollarqankutaj, yawar puruta maqaykuspa.

¹³Chantá uvas huertayojqa nerqa: Imanasajtaj kunanri? Munasqa wawaytañataj kachasaj; ichapis paytaqa respetanqanku.

¹⁴Chaywampis llank'ajkunaqa, paykuna yachachinakuspa nerqanku: Kayqa chayaqeta jap'ej runa; wañuchinachej ari, noqanchejpajtaj chayaqe qhepakunampaj, nispa.

¹⁵Chantá, chajramanta jawaman orqhoytawan wañurparicherqanku. Chaymantataj, Jesús taporqa paykunata: Imananqataj llank'ajkunata uvas huertayojri?

¹⁶Jamonqa ari, wañurkachenqataj chay llank'ajkunata. Jallp'antataj waj llank'ajkunaman qonqa. Chayta uyarispataj nerqanku: Ama chaytaqa Dios munallachumpischu!

¹⁷Jesustaj qhawarispa nerqa: Ima niytataj munan kay escribisqari: Wasi ruwajkunaj qhesachasqanku rumeqa, wasi esquina rumi kapun, nispari?

¹⁸Pillapis chay rumi pataman urmaykojqa, t'unasqa kanqa; chantá pejpa patanmanchá chay rumi urmaykuspapis, phirita ruwanqa.

¹⁹Jatun sacerdotes, leymanta yachachejkuna ima Jesusta chay kikimpi jap'iykuyta munarqanku. Paykunaqa umachakorqanku contrankuta nisqanta chay rijch'anachinawan; chaywampis manchachikorqanku runasta.

²⁰Chantá Jesusta wateqaspa, allinman tukoj puraj uyasta kacharqanku; jinamanta Jesusta, ima parlasqallampipis jap'ispa, kamachejpa atiyninman entregaykunankupaj.

²¹Paykuna taporqanku: Maestro, yachayku allinta nisqaykita, cheqantataj yachachisqaykita; manataj runaj rijch'asqanman jinachu ruwanki; chantapis Diospa ñanninta cheqata yachachinki.

²²Ima ninkitaj: Allinchu kanman impuestota Cesarman qona, manachu?

²³Jesustaj paykunaj sajra yuyayninkuta yachaspa, nerqa: Rikuchiwaychej uj qolqeta. Pejpa uyantaj, chantá pejpa sutintaj?, nispa. Paykunataj nerqanku: Cesarpata, nispa.

²⁴

²⁵Chantá Jesús paykunaman nerqa: Jina kajtenqa, Cesarpata kajtaqa Cesarman qopuychej; Diospata kajtataj Diosman.

²⁶Manataj imaynamantapis parlasqampi pantachiyta aterqankuchu runaspa ñaupaqempi; astawanqa t'ukorqanku kutichikusqanmanta, ch'inyarqankutaj.

²⁷Chaymantataj, wakin saduceos rerqanku Jesuswan parlaj. Saduceosqa mana creerqankuchu wañusqakunamanta kausarimuy kasqanta; Jesustataj taporqanku, nispa: Maestro, noqaykupajqa Moisés escribisqata saqerqa: Sichus pi runapis wañupuspa warminta saqen mana wawasniyojta chayqa, wauqen casarachun chay viudawan, wañoj wauqempa miraynin rikhurinampaj.

²⁸

²⁹Qanchis wauqes karqanku; ñaupaj kajqa casarakuspa mana wawasniyoj wañuporqa.

³⁰Qhepa kaj casarakullarqataj chay viudawan. Paypis wañupullarqataj mana wawasniyoj.

³¹Chantá kinsa kajñataj casararqa chay warmiwan. Ajinamanta qanchisnintin wañuporqanku, mana mayqenninkupis wawasta saqespa.

³²Tukuyninkoj qhepantataj chay warmipis wañupullarqataj.

³³Chantá, kausarimuypeqa, mayqenninkoj warmintaj kanqa, qanchisnintin kausarimojtinkuri? Qanchisnintinwan casarakorqaqa.

³⁴Chantá Jesusqa kuticherqa paykunaman: Kay mundopi runasqa casaranku, casarachinkutaj.

³⁵Wañusqakunamanta kausarimuspa janaj pachaman chayayta atejkunaqa, manaña casaranqankuchu, nitaj casarachenqankuchu.

³⁶Manañataj wañonqankuchu. Paykunaqa ángeles jinallaña Diospa wawasnin kanqanku, wañusqakunamanta kausarimusqankurayku.

³⁷Wañusqas kausarimunankumantaqa, Moisesña yachacherqa zarza larwajpi, Señorqa kasqanta Abrahampata, Isaacpata, Jacobpata ima Diosnin.

³⁸Diosqa mana wañusqaspa Diosninchu, manachayqa kausajkunajta. Paypajqa tukuy kausashanku.

³⁹Chantá, leymanta yachachejkunamanta wakinkuna nerqanku: Maestro, manchay sumajta kutichinki, nispa.

⁴⁰Chaymantataj manaña imatapis taporqankuchu.

⁴¹Chaypacha Jesús nerqa paykunaman: Imaraykutaj Cristota Davidpa wawan kasqanta ninku?

⁴²Davidllataj Salmos libropi nin: Señor nerqa Señorniyman: Tiyakuy pañaypi, enemigosniykita chakisniyki uraman churanaykama.

⁴³

⁴⁴Chantá, imaraykutaj Davidpa Churin kanman Cristori, Davidllataj Señor nishaspari?

⁴⁵Tukuy runa uyarishajtintaj yachachisqasninman nerqa: Leymanta yachachejkunamanta qhawakuychej. Paykunaqa qhoysu p'achaswan puriyta munanku. Plazaspi napaykuchikuyta, sinagogaspipis sumaj tiyanasta mask'anku. Jatun mikhuykunaspipis ñaupajpipuni tiyayta munanku.

⁴⁶

⁴⁷Viudasmantapis kapuyninkuta suwanku, unay unayta Diosmanta mañakoj tukuspa; chaynejta aswan juchachasqas kanqanku.