Read Quechua Bolivia DC Bible SAN LUCAS 23 Bible Online

SAN LUCAS 23 - Quechua Bolivia DC Bible bible

SAN LUCAS 23

¹Chaypacha tukuyninku oqharikorqanku, Jesustataj Pilatoman pusarqanku.

²Chaypitaj ch'ataykuyta qallarerqanku, nispa: Kaytaqa taripayku runasta ch'ajwachishajta; manataj munanchu kamachejman impuestota qonata. Pay kikintaj nin Cristo reytaj kasqanta.

³Pilatotaj taporqa: Qanchu kanki judiospa reynin?, nispa. Jesustaj kuticherqa: Arí, qan ninki, nispa.

⁴Pilatotaj kuraj sacerdotesman, runasman ima nerqa: Mana ima juchatapis tarinichu kay runapeqa.

⁵Paykunataj astawan atipakusharqanku nispa: Tukuy runasta Judeapi ch'ajwachishan, Galileamanta qallarispa kaykama chayamun.

⁶Pilatotaj kayta uyarispa taporqa paykunata, cheqatachus chay runa Galileamanta kasqanta.

⁷Arí, Galileamanta nejtinkutaj, kacharqa kamachej Herodesman. Paypis Jerusalempi chaypacha kasharqa.

⁸Herodestaj Jesusta rikuytawan mayta kusikorqa; imaraykuchus unayña rejsiyta munasharqa, paymanta imaymana parlasta uyarisqanrayku; munarqataj milagrota ruwajta rikuyta.

⁹Chayrayku ashkha kutita taporqa; Jesustaj mana imatapis kutichikorqachu.

¹⁰Chaypi kashallarqankutaj kuraj sacerdotes, leymanta yachachejkuna ima, ch'ataykuytapuni munaspa.

¹¹Herodestaj soldadosninwan khuska payta qhesacharqa, asipayayta munaspataj uj reyta jina sumaj p'achaswan p'achallicherqanku. Chaymantataj kachaporqa Pilatoman.

¹²Chay p'unchaypi Pilatowan Herodeswanqa, phiñanasqa kasqankumanta allinyakaporqanku.

¹³Chaypacha Pilatoqa kuraj sacerdotesta, kamachejkunata, tukuy runasta ima tantacherqa.

¹⁴Paykunamantaj nerqa: Kay runata pusamuwarqankichej, runa cha'jwachejta jina, ñaupaqeykichejpi tapusqayman jinaqa mana ima juchatapis tarinichu, chay juchata tumpasqaykichejmanta.

¹⁵Nillataj Herodespis tarinchu juchata, chaynejta kutichimullantaj. Yachankichej jina, mana ima juchampis kanchu wañunampaj jina.

¹⁶Jasut'isaj, chaymantataj kacharipusaj. [

¹⁷Sapa Pascuapi kacharejpuni kanku uj presota.]

¹⁸Chayrayku tukuyninku ujllata qhapariyta qallarerqanku: Ama chaytaqa kachariychu, Barrabasta kacharipuy!, nispa.

¹⁹Barrabastataj presochasqanku, runasta llajta ukhupi ch'ajwachisqanmanta, runata wañuchisqanmanta ima.

²⁰Chaywampis Pilatoqa ujtawan parlarqa, Jesusta kacharipuytapuni munaspa.

²¹Paykunataj astawan sinch'ita qhaparerqanku: Chakatasqa kachun, chakatasqa kachun!, nispa.

²²Kinsa kutikama Pilatoqa nerqa: Chantá, imatapunitaj ruwarqari? Juchata mana paypi tarinichu wañunampaj jina; jasut'isaj, chaymantataj kacharipusaj, nispa.

²³Paykunaqa qhaparillarqankupuni, chakatachinanta munaspa; chay jinatapuni paykuna qhaparerqanku sacerdotesninkutapis atipanankukama.

²⁴Pilatotaj kamacherqa paykunaj mañasqankuman jina ruwanankuta.

²⁵Kachariporqataj pitachus mañasqankuta. Chay runaqa carcelpi karqa runata ch'ajwachisqanmanta, runata wañuchisqanmanta ima. Jesustataj paykunaman entregarqa munasqankuta ruwanankupaj.

²⁶Jesusta chakatanankupaj pusashaspataj Cirenemanta Simón sutiyoj runawan tinkorqanku, campomanta jamushajtin; paywantaj cruzta apacherqanku, Jesuspa qhepanta.

²⁷Ashkha runastaj qhatisharqanku, jinallatataj warmispis mayta waqaspa, qhaparispa ima paymanta.

²⁸Jesustaj chay warmista qhawarispa nerqa: Jerusalén warmis, ama noqamanta waqaychejchu, manachayqa qankuna kikiykichejmanta waqaychej, wawasniykichejmantawan.

²⁹P'unchaykuna chayamonqanku. Chaypacha nenqanku: Kusikuyniyoj kanqanku, mana nacichikojkuna, mana wijsallikojkuna, jinallataj mana ñuñuchejkunapis.

³⁰Chaypachamá runasqa orqosta niyta qallarenqanku: Pataykuman urmaykamuwayku; lomastataj: P'ampaykuwayku, nispa.

³¹Sichus q'omer sach'awan kay imasta ruwanku chayqa, imatapunitaj ruwanqanku ch'aki sach'awanri?

³²Pusallarqankutaj iskay suwasta Jesustawan chakatanankupaj.

³³T'ojlu nisqa cheqaman chayaytawantaj, Jesusta chakatarqanku. Iskay suwastapis chakatallarqankutaj, ujninta pañanman, ujnintataj lloq'enman. [

³⁴Jesusqa nerqa: Tatáy, juchasninkuta pampachay; imaraykuchus mana yachankuchu imatachus ruwasqankuta, nispa.] Soldadostaj suertesta choqarqanku Jesuspa p'achasninta rak'inakunankupaj.

³⁵Chaypi kasharqanku chay runasqa qhawasharqanku; kurajkunapis asipayasharqanku: Wajkunata salvarqa; kunanqa payñataj kacharikuchun, sichus cheqamanta pay Diospa ajllasqan Cristo chayqa, nispa.

³⁶Soldadospis Jesusta asipayashallarqankutaj; qayllaykuspataj vinagreta jaywarqanku.

³⁷Nerqankutaj: Sichus qan judiospa reynin kanki chayqa, qan kikiykita salvakuy.

³⁸Uman patapitaj karqa uj escribisqa [griego parlaypi, latimpi, hebreopi ima,] kay jina: Kayqa judiospa Reynin.

³⁹Ujnin kaj suwataj chakatasqapacha, Jesusta k'amisharqa: Manachu qanqa Cristo kanki? Qan kikiykita salvakuy; noqaykutapis salvallawaykutaj, nispa.

⁴⁰Ujnin kajrí paytañataj k'amerqa: Manachu Diosta manchachikunki; qampis kikin wañuyllapitaj kashaspa?

⁴¹Noqanchejqa juchanchejmanta kaypi kashanchej, imaraykuchus sajra ruwasqasninchejmanta ñak'arishanchej; payrí mana ima sajratapis ruwarqachu.

⁴²Jesusmantaj nerqa: Yuyarikuwanki ari noqamanta, reinoykiman chayaspa.

⁴³Jesustaj chaypacha kuticherqa: Cheqamanta niyki, kunampacha noqawan paraisopi kanki.

⁴⁴Chaupi p'unchay jinaña karqa. Chantá tukuynin jallp'ataj laqhayaykorqa samay horakama.

⁴⁵Intitaj laqhayaykorqa. Templopi cortina warkhusqapis iskayman llik'ikorqa.

⁴⁶Chaypacha Jesusqa sinch'ita qhaparerqa: Tatáy, makisniykiman espirituyta saqeni, nispa. Chayta nispataj wañuporqa.

⁴⁷Chantá capitantaj chayta rikuspa, Diosta yupaycharqa: Cheqamanta kay runaqa cheqan runa karqa, nispa.

⁴⁸Tukuy runas chaypi kajkunataj, chayta rikuspa, riporqanku pechonkuta takakuspa.

⁴⁹Jesuspa tukuy rejsisqasnintaj, Galileamantapacha qhatejkuna warmis ima, karupi qhepakuspa kay imasta qhawasharqanku.

⁵⁰Uj runa karqa k'acha, cheqantaj, José sutiyoj, Judeapi Arimatea llajtamanta. Payqa judiospa juntankumanta ujnin karqa.

⁵¹Kay Joseqa suyasharqa Diospa reinonta; chaynejta mana arí nerqachu juntaj yuyasqanta, nitaj ruwasqantapis.

⁵²Pilatoman rispa Jesuspa ayanta mañarqa.

⁵³Cruzmanta uraykuchimuspataj, sabanawan mayt'uykuspa uj chhankapi ruwasqa sepulturaman churaykorqa, maypichus manaraj pitapis churarqankuchu, chayman.

⁵⁴Pascua wakichina p'unchay karqa; samarina diataj qallarikusharqaña.

⁵⁵Galileamantapacha Jesuswan jamoj warmistaj rerqanku sepulturata watukoj, yachanankupaj imaynatachus Jesuspa ayanta churasqankuta.

⁵⁶Wasinkuman kutirispataj, wakicherqanku q'apaj jampista, jawinastawan. Chantá samarikorqankutaj, samarina día kasqanrayku, kamachisqaman jina.