Read Quechua Bolivia DC Bible SAN LUCAS 4 Bible Online

SAN LUCAS 4 - Quechua Bolivia DC Bible bible

SAN LUCAS 4

¹Jesusqa kuterqa Jordán mayumanta Santo Espirituwan junt'asqa; chay Espiritutaj pusarqa ch'in pampaman.

²Chaypitaj tawa chunka p'unchayninman supay tentarqa. Chay tiempopi mana imata mikhusqanraykutaj yarqhachikorqa.

³Chantá supay nerqa Jesusman: Sichus Diospa Churin kanki chayqa, niy kay rumeqa t'antaman tukunanta.

⁴Jesustaj kuticherqa: Escribisqa kashan: Mana t'antallawanchu runaqa kausanqa, [astawanqa Diospa tukuy palabranwan.]

⁵Chaymantaqa, supay orqo pataman Jesusta pusarqa, kikimpachataj rikucherqa tukuy mundopi reinosta, nispa: Kay tukuy atiyta qosqayki, tukuy kapuynintawan; imaraykuchus noqaman qosqa karqa; chayrayku pimanchus munani chayman qoyta atini.

⁷Ñaupaqeypi qonqoriykukunki chayqa, kay tukuynin qampata kanqa.

⁸Jesustaj kuticherqa: Escribisqa kashan Diospa palabrampi: Señor Diosniykiman k'umuykukunki, pay sapallanta yupaychanki.

⁹Chaymantataj supayqa Jerusalén llajtaman Jesusta pusarqa; templo patapi sayaykuchispataj nerqa: Diospa wawan kanki chayqa, phinkiykuy pampaman.

¹⁰Escribisqa kashan Diospa palabrampi: Angelesninta kachamonqa waqaychasunankupaj.

¹¹Chantá nillarqataj: Makisninkupi jap'isonqanku, ama chakiykita rumipi takakunaykipaj.

¹²Jesustaj kuticherqa: Escribisqallataj kashan: Señor Diosniykita ama tentankichu.

¹³Supayqa Jesusta tentayta tukuytawan pachampi saqespa, pisi tiempota chinkarerqa.

¹⁴Jesús kuterqa Galileaman, Santo Espíritoj atiynintaj paypi karqa; chaynejta muyuynintimpi payllamanta parlaj kanku.

¹⁵Yachachejtaj sinagogaspi, tukuyninkutaj Jesusta mayta alabaj kanku.

¹⁶Jesusqa Nazaret llajtamanñataj chantá rerqa, maypichus uywasqa karqa chayman. Samakuna p'unchaypi, sinagogaman yaykuspa, costumbrenkuman jina leej sayaykorqa.

¹⁷Chaypaj jaywaykorqanku profeta Isaiaspa libronta, kicharispataj tarerqa kay jina escribisqata:

¹⁸Señorpa Espíritun noqapi kashan; jawiwaspa ajllawarqa sumaj willanasta wajchasman willanaypaj; kachamuwarqataj willajta presos kacharisqas kanankupaj, ciegos qhawarinankupaj, ñak'arejkunataj samachisqas kanankupaj; Señorpa allin watantapis willanaypaj.

²⁰Chantá Jesusqa librota wisq'aspa waqaychajman jaywaytawan tiyaykorqa. Tukuy chay sinagogapi kajkunataj payta qhawasharqanku.

²¹Parlayta qallarispataj paykunaman nerqa: Escriturapi Diospa nisqan kunan diapi junt'akushan, kay uyariwasqaykichejman jina.

²²Ancha allimpuni Jesusqa tukuyninkuman rijch'arqa; chay jinata parlasqanmantataj t'ukuspa tapunakorqanku: Manachu kayqa Josejpa churin?, nispa.

²³Jesustaj kuticherqa: Niwankichejchari kay nisqata: Médico, qan kikiykita jampikuy. Astawanqa, Capernaumpi chay ruwasqasniykita uyarisqaykuta, kay llajtaykipipis ruwallaytaj ari, nispa.

²⁴Nillarqataj: Cheqamanta niykichej, mana mayqen profetapis allimpaj qhawasqachu llajtampeqa.

²⁵Cheqamanta nillaykichejtaj: Ashkha viudas karqanku Israelpi Eliaspa tiempompi; chaypachaqa kinsa wata sojta killayojta mana pararqachu; chaynejtataj anchapuni yarqhay karqa tukuynejpi.

²⁶Diostaj Eliastaqa mana ni mayqen israelita viudamanchu kachamorqa; manachayqa, Sidompi kaj Sarepta llajtapi tiyakojllaman.

²⁷Israelpeqa, profeta Eliseoj tiempompi kallarqataj ashkha onqosqas leprawan; manataj ni mayqen llimphuchasqachu karqa, manachayqa Siriamanta Naamanlla.

²⁸Kay tukuy imasta uyarispataj, tukuy sinagogapi kajkuna phiñarikorqanku.

²⁹Sayarispataj, llajtamanta Jesusta qharqorqanku; pusarqankutaj orqo pataman maypichus llajtanku karqa chaynejman, qaqaman tanqaykunankupaj.

³⁰Jesustaj, paykunaj chaupinkuta llojsispa riporqa.

³¹Chaymantataj Jesusqa rerqa Galileapi Capernaum llajtaman. Chaypitaj runasman yachacherqa samakuna diapi.

³²Runasqa mayta t'ukorqanku yachachisqanmanta, imaraykuchus parlasqanqa atiyniyoj karqa.

³³Sinagogapi uj runa millay supayniyoj karqa, paytaj sinch'ita qhaparerqa, nispa: Saqewayku ari. Imá ruwanayki tiyan noqaykuwan Nazaretmanta Jesús? Noqaykuta tukuchejchu jamunki? Rejsiyki pichus kasqaykita: Qanqa, Diospa ajllasqan kanki.

³⁵Jesustaj supayta sinch'ita k'amispa, nerqa: Ch'in kay, llojsiy, nispa. Sispaytaj paykunaj ñaupaqenkupi runata urmachispa, llojsiytawan riporqa, mana astawan imanaspa.

³⁶T'ukuspataj tukuyninku parlanakorqanku: Imataj kayri? Kay runaqa, atiywan kallpawantaj supaykunatapis qharqon; kasunkutaj.

³⁷Chayrayku Jesusqa may mentasqa karqa tukuy chaynejpi.

³⁸Sinagogamanta llojsimuspa Jesusqa yaykorqa Simompa wasinman. Paypa suegrantaj sinch'i q'oñi onqoywan kasharqa. Chaypi kajkunataj paypaj mañaporqanku.

³⁹Pedroj suegranman k'umuykuspataj Jesusqa k'amerqa q'oñi onqoyninta, paytaj thañikaporqa. Kikimpachataj, jatarimuytawan paykunata sirverqa.

⁴⁰Inti yaykuytataj, tukuy onqosqasniyoj imaymana onqoyniyojkunata Jesusman pusamorqanku, paytaj sapa ujpa patanman makinta churaykuspa thañicherqa.

⁴¹Jinallatataj, supaykuna llojsirarqanku ashkha onqosqasmanta qhaparispa: Qanqa Diospa Churin kanki. Paytaj supaykunata k'amispa ch'inyacherqa, imaraykuchus yacharqanku Cristo kasqanta.

⁴²Sut'iyayta llajtamanta llojsispa Jesús rerqa ch'innejman. Runastaj tarinankukama mask'arqanku, jark'ayta munaspa ama ripunampaj.

⁴³Paytaj nerqa: Wajkunamampis Diospa reinonmanta evangeliota willamunallaytaj tiyan, imaraykuchus chaypaj kachamusqa kani.

⁴⁴Ajinata Jesusqa Judea sinagogaspi predicaj.