Read Quechua Bolivia DC Bible SAN LUCAS 6 Bible Online

SAN LUCAS 6 - Quechua Bolivia DC Bible bible

SAN LUCAS 6

¹Uj samakuna diapi, Jesús trigo chajraj chaupinta rishajtin, yachachisqasnin trigo umasta p'itispa, makisninkuwan khakuspataj mikhorqanku.

²Fariseostaj paykunata taporqanku: Imaraykutaj mana ruwanasta samakuna diapi ruwankichej?

³Jesustaj kuticherqa: Manachu leerqankichej imaynatachus David, chanta paywan kajkunapis, yarqhachikuspa ruwasqankuta?

⁴Davidqa Diospa wasinman yaykuspa, ofrenda t'antata oqharispa mikhorqa, paywan kajkunamampis jaywarqa, yachashaspa sacerdotesllapaj kasqanta.

⁵Nillarqataj: Runaj Churenqa samakuna p'unchaypata Señornin.

⁶Waj samakuna p'unchaypi, sinagogaman yaykuspa Jesús yachachisharqa. chaypitaj kasharqa uj runa paña makin ch'akisqa.

⁷Leymanta yachachejkunawan fariseoswantaj wateqasharqanku Jesusta, samakuna p'unchaypi thañichejtin ch'ataykunankupaj.

⁸Jesustaj imatachus yuyasqankuta yachaspa, nerqa makin ch'akisqa runaman: Jatariy, sayaytaj chaupipi. Runataj sayaykorqa ñaupaqenkupi.

⁹Jesustaj nerqa: Ujta tapurisqaykichej: Samakuna p'unchaypeqa, allin kajtachu ruwana, chayrí sajratachu? Mayqentaj aswan walejri; runataqa wañuymanta salvanachu, chayrí wañojta saqenallachu?

¹⁰Muyuyninta qhawarispataj nerqa runaman: Jaywariy makiykita. Paytaj ajinata ruwarqa, makintaj thañikaporqa.

¹¹Phiñakuspataj paykunapura parlaykorqanku, imatachus Jesusta ruwanankuta.

¹²Chaypachataj Jesusqa rerqa uj orqoman, Diosmanta mañakoj; jinapitaj tutantinta mañakuspa kakorqa.

¹³Sut'iyamojtintaj wajyarqa yachachisqasninta, paykunamantataj ajllarqa chunka iskayniyojta, suticharqataj apostolesta.

¹⁴Paykunataj karqanku: Simón, pitachus Pedrota suticharqa; Andrés, Simompa wauqenwan; Santiago, Juanwan; Felipe, Bartolomewan;

¹⁵Mateo, Tomaswan; Santiago, Alfeoj churin; Simón, Zelote nisqawan;

¹⁶Judas, Santiagoj wauqen; Judas Iscariote, pichus Jesusta jap'icherqa.

¹⁷Jesusqa paykunawan orqomanta uraykamuspa qhepakorqa uj pampapi. Chaypi payta suyasharqanku ashkha yachachisqasnin; ashkha runastaj tukuy Judeamanta, Jerusalén llajtamanta, qocha cantopi Tiro Sidón llajtasmanta ima.

¹⁸Paykunaqa jamusqanku Jesusta uyarinankupaj, onqoyninkumantapis thañinankupaj. Sajra espirituswan ñak'arejkunapis thañillarqankutaj.

¹⁹Tukuyninkutaj payta llankhariyta munarqanku, imaraykuchus paymanta llojsimoj ateyqa tukuyta thañichej.

²⁰Chantá Jesús yachachisqasninta qhawarispa nerqa: Kusikuyniyoj kankichej qankuna wajchas, imaraykuchus qankunajtamin janaj pacha Diospa reinonqa.

²¹Kusikuyniyoj kankichej kunan yarqhachikojkunaqa, imaraykuchus sajsachisqas kankichej. Kusikuyniyoj kankichej kunan waqajkunaqa, imaraykuchus asikunkichej.

²²Kusikuyniyoj kankichej runakuna chejnisojtiykichej, qharqosojtiykichej, rimasojtiykichej, sajrata jinataj sutiykichejta qhesachajtinku Runaj Churinrayku.

²³Kusikunkichej chaypacha, jatun kusiywan, imaraykuchus t'inkaykichejqa jatun kanqa janaj pachapi. Jinallatataj ñaupa runas ñak'arichej kanku profetasta.

²⁴Chayrayku: Ay, qankunamanta qhapajkuna!, imaraykuchus sonqochasqasña kankichej.

²⁵Ay, qankunamanta sajsasqas!, imaraykuchus yarqhachikunkichej. Ay, qankunamanta asikojkuna!, imaraykuchus llakikunkichej, waqankichejtaj.

²⁶Ay, tukuy runas qankunamanta allinta parlajtinku! Jinallatataj ñaupa runas ruwaj kanku llulla profetaswan.

²⁷Qankuna uyariwajkunamanqa niykichej: Munakuychej enemigosniykichejta, allinta ruwaychej chejnisojkunapaj.

²⁸Allinta parlaychej qankunata maldicejkunapaj; Diosmantataj mañapuychej qhasimanta tumpasojkunapaj.

²⁹Pipis ujnin kaj uyaykipi laq'asojtenqa, ujnin kajtawan kutirichiy; pipis p'achaykita qhechusojtenqa, ukhun p'achaykitawan qopuy.

³⁰Mañakusojmanqa qoy; qampata kajta apakapojmantapis ama mañakapuyñachu.

³¹Imaynatachus munankichej runas qankunapaj ruwanankuta, ajinallatataj qankunapis paykunapaj ruwaychej.

³²Sichus munakunkichej qankunata munakojkunallata chayqa, ima allinta ruwankichejri? Chaytaqa juchasapaspis ruwallankutaj.

³³Allinta ruwajkunallapaj allinta ruwajtiykichejqa, ima allintaj ruwasqaykichejri?

³⁴Kutichipusunaykichejta suyaspallachus mañarinkichej chayqa, ima allintataj ruwankichejri? Juchasapaspis mañarinakullankutaj, imaraykuchus purajmanta suyanakunku imallatapis jap'iyta munaspa.

³⁵Enemigosniykichejta munakuychej ari allinta ruwaspa; mañaychejtaj mana imata paykunamanta suyaspa; jinamanta jatun t'inkaykichejqa kanqa. Chaymantataj janaj pachapi kaj Diospa wawasnin kankichej. Payqa khuyan mana yuyarikojkunata, sajra sonqoyojkunata ima.

³⁶Qankunapis khuyakojkuna kaychej ari, imaynatachus Tataykichejpis khuyakoj, ajinata.

³⁷Ama pitapis tumpaychejchu mana tumpasqas kanaykichejpaj; nitaj juchachaychejchu ama juchachasqa kanaykichejpaj; perdonaychej perdonasqa kanaykichejpaj.

³⁸Qoriychej wajkunaman, qankunamampis qorillasonqachejtaj, jap'inkichejtaj wayaqaykichej phullchirishajta, mat'i winasqata thalaykapusonqachej tuputaqa. Ima chimpuwanchá tupunkichej, chayllawantaj qankunatapis tupusonqachej.

³⁹Nillarqataj uj rijch'anachinata: Atinmanchu uj ciegoqa waj ciegota pusaykachayta? Manachu iskayninku t'oqoman urmaykonqanku?

⁴⁰Yachakojqa mana yachachejninta atipanchu; chaywampis sumajta yachakuspaqa yachachejnin jina kanqa.

⁴¹Imaraykutaj wauqeykej ñawimpi q'opitata qhawanki, qampa ñawiykipitaj kurkuta mana rikukunkichu?

⁴²Imaynatataj wauqeykita niwaj: Wauqéy, saqeway ñawiykimanta chay q'opitata orqhojta, qampa ñawiykipitaj kurkuta mana rikukuspari? Puraj uya! Ñawiykimantaraj ñaupajta kurkuta orqhokuy, chantá allinta qhawarispa orqhonki wauqeykej ñawinmanta q'opitata.

⁴³Mana kanchu sumaj sach'a, mana walejta poqoj; nitaj kanchu mana walej sach'a, sumajta poqoj.

⁴⁴Sapa sach'aqa poqoynimpi rejsikun. Higostaqa mana khishkasmantachu pallanku, nillataj uvastapis thaqosmantachu.

⁴⁵Sumaj runaqa, llimphu sonqonmanta allinta parlan; sajra runatajrí, sajra sonqonmanta sajrallatataj parlan. Imawanchus sonqon junt'a kasqanman jina simenqa parlan.

⁴⁶Imaraykutaj Señor, Señor, nillawankichej, manataj nisqayta ruwankichejchu?

⁴⁷Pichus noqaman jamun, palabrasniytataj uyarin, ruwantaj, chayta nisqaykichej pimanchus rijch'akusqanta.

⁴⁸Chay runaqa rijch'akun wasita ruwakojman; pichus ñaupajta sumaj ukhuta allan chhankata taripanankama, chaypitaj rumi cimientota churan. Yaku chayamojtintaj, mayoqa manchayta junt'aykuspa wasiman wajtakamorqa, manataj waseqa imanakorqachu, imaraykuchus chhanka patapi ruwasqa karqa.

⁴⁹Pitajchus nisqayta uyarishaspa mana ruwanchu chayqa, rijch'akun t'iyu patapi wasita ruwakojman; mayutaj chayamuspa wasiman wajtakamorqa, urmacherqataj. Chay thuñikuynenqa manchay karqa.