Read Quechua Bolivia DC Bible SAN LUCAS 8 Bible Online

SAN LUCAS 8 - Quechua Bolivia DC Bible bible

SAN LUCAS 8

¹Chaymanta, Jesús rerqa tukuy llajtasman, ranchosman ima, predicaspa, willaspataj Diospa reinompa evangelionta. Chunka iskayniyoj yachachisqasnintaj wakin warmiswan ima paywan khuska karqanku. Chay warmisqa sajra espiritusmanta, onqoykunamanta ima thañichisqas karqanku: María Magdalena, pimantachus qanchis sajra espíritus llojserqanku; Juana, Cuzaj warmin. Chay Cuzaqa Herodespa mayordomon karqa. Chanta Susana, ashkha warmis ima pikunachus kapuyninkuwan Jesusta yanapaj kanku.

⁴Ashkha runa Jesusman jamorqa sapa llajtamanta; tantakojtinkutaj, uj rijch'anachina yachachiyta willarqa.

⁵Uj tarpoj runa, mujuta tarpoj llojserqa. Tarpushajtintaj, wakin muju urmarqa ñannejman, sarorqankutaj; chanta p'isqos jamuspa mikhukaporqanku.

⁶Wakin kajtaj urmarqa rumiraraman, llojsimuspataj ch'akiporqanku mana joq'o kasqanrayku.

⁷Wakin mujustaj khishkas chaupiman urmarqanku, khishkastaj k'irincharqanku.

⁸Wakin mujutaj urmarqa sumaj jallp'aman; p'utumuspataj poqorqa pachajta sapa mujumanta. Kayta niytawantaj, aswan jatunmanta nerqa: Ningrisniyoj kaspaqa uyariychej.

⁹Chantá yachachisqasnin taporqanku: Ima niytataj munan kay rijch'anachinari?, nispa.

¹⁰Paytaj nerqa: Qankunamanqa Dios rejsichisunkichej reinompa pakasqa yachaykunasninta; wajkunamanrí rijch'anachinaswan parlan, qhawashaspa mana rikunankupaj, uyarishaspapis mana entiendenankupaj.

¹¹Chay rijch'anachinaqa kayta niyta munan: Mujoqa Diospa palabranwan ninakun.

¹²Ñanman urmajkunaqa Diospa palabranta uyarejkuna kanku; supaytaj jamuspa, sonqonkumanta Diospa palabranta orqhon, ama creenankupaj, nitaj salvasqas kanankupaj.

¹³Rumiraraman urmaj mujustaj, rijch'akunku uyarejkunaman; chaykunataj Diospa palabranta kusiywan jap'inku. Paykunataj mana allin saphichasqa kasqankurayku, pisi tiempollata creenku; phutiy jamojtintaj ithirikapunku.

¹⁴Khishkas ukhuman urmajtaj, Diospa palabranta uyarejkunawan ninakun; paykunaqa kay pacha imaswan, qhapaj kaykunaswan, aychankoj munayninwan ima atipachikunku; chayraykutaj poqoyta mana apankuchu.

¹⁵Sumaj jallp'api tarpusqa mujutaj ninakun, pikunachus sumaj sonqowan, cheqan yuyaywantaj Diospa palabranta uyarinku, jap'ispataj, pacienciawan sumaj poqoyta apanku.

¹⁶Mana pipis k'anchayta jap'ichispa wich'iwan pakaykunchu, nitaj cama uraman churaykunchu; astawanqa pataman churan, yaykojkuna k'anchayta rikunankupaj.

¹⁷Mana imapis pakasqa kanchu mana rikuchikojqa; nitaj pakasqallapuni kayta atinchu mana yachakoj, nitaj sut'inchakojqa.

¹⁸Chaynejta, allinta uyariychej ari: Kapuyniyojmanqa astawan qosqa kanqa; mana kapuyniyojmantataj kapusqanta yuyasqampis qhechusqa kanqa.

¹⁹Jesuspa maman wauqesnin ima jamorqanku payman, manataj qayllaykuyta aterqankuchu runa k'iski kasqanrayku.

²⁰Willarqankutaj Jesusman: Mamayki wauqesniykiwan jawapi mask'ashasunku qanwan tinkuyta munaspa.

²¹Paytaj kuticherqa: Mamaywan wauqesniywanqa kanku pikunachus Diospa palabranta uyarinku, ruwankutaj chaykuna.

²²Uj p'unchay Jesús boteman yaykorqa yachachisqasninwan, nerqataj: Jakuchej kay qochaj chimpanman. Rerqankutaj.

²³Botepi rishajtinkutaj Jesús puñurpayarqa, jinallapitaj manchay sinch'i wayra oqharikorqa qochapi, yakutaj boteta chinkaykuchisharqaña, wañuy patapitaj kasharqanku.

²⁴Jesusman qayllaykuspataj rijch'aricherqanku, nispa: Maestro, Maestro, chinkaykushanchejña!, nispa. Jesustaj wayrata k'amerqa, yaku oqharikojtawan. Wayrataj thañerqa, yakupis tiyaykaporqa.

²⁵Chaymantataj yachachisqasninman nerqa: Maytaj feniykichejri? Paykunataj mancharikuspa t'ukorqanku; tapunakorqankutaj paykunapura: Pitaj chantá kayri, wayrata yakutapis kamachejri, chantá kasunkutaj?

²⁶Chayarqanku Gerasa jallp'aman, Galilea qocha chimpapi kajman.

²⁷Jesús botemanta uraykusqantawantaj, uj runa payman qayllaykorqa llajtamanta jamuspa. Unayña payqa sajra espirituyoj kasqa, chaynejta mana p'achallikojchu, nitaj wasimpipis sayajchu, manachayqa aya p'ampanasllapi kamoj.

²⁸Payqa Jesusta rikuytawan, qonqoriykukorqa ñaupaqempi, qhaparispataj nerqa: Ima ruwanayki tiyan noqawan patapi kaj Diospa Churin Jesús? Mañakuyki ama ñak'arichinawaykita.

²⁹Jesustaj kamacherqa chay runamanta sajra espíritu llojsinanta. Ashkha kutita payta jap'isqa chay sajra espiritoqa. Runastaj cadenaswan watasqanku, chakisnintataj maneasqanku, chaywampis payqa p'itiraj; chay sajra espiritutaj ayqechej ch'inkunasman.

³⁰Jesús taporqa: Imataj sutiyki?, nispa. Paytaj kuticherqa: Suteyqa Tropa. Kayta nerqa ashkha sajra espíritus payman yaykusqanku.

³¹Chay espiritustaj Jesusmanta mañakorqanku ama kachananta qaqaman urmaykojta.

³²Ashkha khuchistaj chay loma qayllapi mikhusharqanku, supaykunataj mañakorqanku Jesusmanta chay khuchisman yaykojta saqenanta, paytaj saqerqa rejta.

³³Chantá, chay sajra espiritusqa, runamanta llojsispa yaykorqanku khuchisman. Khuchistaj qaqanta qochaman urmaykorqanku, chaypitaj jeq'eqaspa wañurarqanku.

³⁴Khuchi michejkunataj chayta rikuspa ayqerqanku, rispataj llajtapi willamorqanku, jinallatataj campospipis.

³⁵Runastaj llojserqanku qhawaj imachus kasqanta, Jesusman qayllaykuspataj rikorqanku ñaupaqempi chay runa tiyashajta, pimantachus sajra espíritu llojserqa chayta; p'achallisqata, yuyaynimpitaj kashajta, manchachikorqankutaj.

³⁶Rikojkunataj willarqanku chay runa imaynatachus supaymanta kacharisqa kasqanta.

³⁷Chantá, chay ashkha runas Gerasa muyuynintinmanta, maytapuni mañarqanku Jesús llajtankumanta ripunanta, imaraykuchus anchatapuni manchachikorqanku. Jesustaj boteman yaykuspa kutiporqa.

³⁸Sajra espiritusmanta kacharisqa runataj Jesusmanta mañakorqa paywan rejta saqenanta. Jesustajrí kachaporqa, nispa: Kutipuy wasiykiman, willamuytaj imastachus qampaj Dios ruwasqanta. Paytaj riporqa tukuyman willaspa llajtantimpi, imastachus Jesús paypaj ruwasqanta.

³⁹

⁴⁰Ujtawan Jesús qocha chimpaman kutipojtintaj, ashkha runas kusiywan tariparqanku; imaraykuchus tukuyninku suyasharqanku.

⁴¹Chantá jamorqa uj qhari, Jairo sutiyoj. Payqa sinagogapi kamachej. Jesuspa ñaupaqenman qonqoriykukuspataj mañarqa wasinman yaykurinanta.

⁴²Uj k'ata ususin, chunka iskayniyoj watayoj jina, wañunayasharqaña. Rishajtintaj, runasqa maytapuni k'iskikorqanku.

⁴³Paykuna ukhupitaj uj warmi, yawar apaywan onqosqa karqa chunka iskayniyoj wataña; maytapuni medicospi, jampispi ima qolqenta tukuchisqa, manataj pipis thañichiyta atisqachu.

⁴⁴Chay warmirí, Jesusman qhepallamanta qayllaykuspa, p'achampa cantonta llankhaykorqa; kikimpachataj yawar apaynin sayarqa.

⁴⁵Chantá Jesús nerqa: Pitaj llankhamuwanri?, nispa. Runas k'iskilla kajtinkutaj Pedroqa nerqa: Maestro, runas k'iskikuspa tukuynejmanta ñit'imusunku, qantaj, pitaj llankhamuwanri? nishanki.

⁴⁶Jesustaj kuticherqa: Pipunichá llankhawan. yachani noqamanta atiy llojsisqanta.

⁴⁷Warmitaj, mana pakakuyta atispa Jesusman kharkatitispa qayllaykorqa; ñaupaqenman qonqoriykukuspataj sut'inchayta munarqa tukuy runaj ñaupaqempi, imaraykuchus llankhaykusqanta; imaynatatajchus kikimpacha onqoyninmanta thañisqanta.

⁴⁸Jesustaj chantá nerqa: Wawáy, noqapi creesqaykirayku thañisqa kanki, sonqo junt'asqa ripuy.

⁴⁹Jinata parlashajtillanraj, uj runa jamorqa sinagogapi kamachejpa wasinmanta, nej: Ususiykeqa wañupunña, amaña Maestrota sayk'uchiychu, nispa.

⁵⁰Chayta uyarispataj Jesusqa kuticherqa: Ama mancharikuychu, creellay, wawaykeqa kausariponqa.

⁵¹Wasiman chayaspataj, pusaykorqa Pedrota, Juanta, Santiagota, warmi wawaj tatanta, mamantawan imalla; manataj pitapis yaykojta saqerqachu.

⁵²Tukuyninkutaj uj phutiyta waqasharqanku sipasmanta. Jesustaj nerqa paykunaman: Ama waqaychejchu, manamin wañunchu, puñushallan, nispa.

⁵³Asipayarqankutaj Jesusta, sipas wañusqa kasqanta yachasqankurayku.

⁵⁴Chantá Jesusqa sipasta, makinmanta jap'iykuspa, jatunmanta nerqa: Sipas, sayariy.

⁵⁵Sipastaj kausarimuspa, kikimpacha sayarerqa. Jesustaj nerqa mikhunata payman jaywanankuta.

⁵⁶Tatasnintaj, maytapuni t'ukorqanku. Jesustaj nerqa ama pimampis thañichisqanmanta willanankuta.