Read Quechua Bolivia DC Bible DEUTERONOMIO 1 Bible Online

DEUTERONOMIO 1 - Quechua Bolivia DC Bible bible

DEUTERONOMIO 1

¹Kay jinata Moisesqa parlarqa tukuynin israelitasman Jordán mayoj chimpampi kashajtinku ch'in pampapi, Arabapi, Sufpa chimpampi Parán jallp'as chaupipi, Tofelwan, Labanwan, Hazerotwan, Dizahabwan ima chaypi.

²Horeb orqomanta, Seir orqo ñanninta rispa, chunka ujniyoj día puriy Cades-barneakama.

³Chay karqa tawa chunka wata kashajtin, iskay chunka iskayniyoj killapi ñaupaj kaj diapi. Chaypacha Moisesqa israelitasman parlarqa imaynatachus Dios payman kamachisqanman jina israelitaswan ruwanasninmanta, Amorreospa reynin Sehonta atipasqankumantaña. Chay reyqa Hesbompi tiyakorqa. Chantá Basánmanta rey Ogta atipasqankumantapis. Chay reyqa Edrei Astarotpi tiyakorqa.

⁵Chayta Moisesqa Jordán mayu chimpapi, Moab jallp'api kashajtinku, israelitasman kay leymanta willarqa: Señor Diosninchejqa kayta willawarqanchej Horebpi kashajtinchej: Qankunaqa unaytaña kay orqopi kashankichej.

⁷Tukuy imasniykichejta oqharikuspa amorreospa orqosninkuman riychej, tukuy vecinosninkoj muyuyninkupi kaj jallp'asninkuman ima. Arabaman, sach'arara lomasman, vallesman, Neguevman, mar qocha cantosman, cananeospa jallp'anman, Libanoman, Eufrates jatun mayukama.

⁸Noqa qoykichej chay jallp'asta; chayrayku rispa mojonakamuychej, dueñochakamuychej chay jallp'asta; chaytaqa noqa Señor, juraspa qosqaykichej nerqani ñaupa tatasniykichej Abrahamman, Isaacman, Jacobman ima, jinallataj mirayninkumampis.

⁹Chaypachallataj noqaqa nerqaykichej: Noqa sapallayqa mana qankunata yanapayta atishanichu, nispa.

¹⁰Señor Diosniykichejqa kay chhikata mirachisunkichej. Kunan qankunaqa jatun ayllu ashkha kankichej, janaj pacha estrellas jina.

¹¹Ñaupa tatasniykichejpa Señor Diosnin kunanqa qankunata mirachichun uj waranqa jinatawan kunan kashankichej chaymanta nisqaqa; astawantaj qankunata bendicichun, imatachus qosqaykichej nisqanman jina.

¹²Imaynatataj noqa sapallay qankunata yanapayta atiymanrí, quejasniykichejtapis uyariytari?

¹³Chayrayku, kunanqa sapa ayllumanta ajllakuychej yachayniyoj runasta, umayojkunata, k'amachiyta yachajkunata ima qankunaj kamachejniykichejta jina noqa churanaypaj, nispa.

¹⁴Qankunataj niwarqankichej: Chay niwasqaykoqa ruwanaykupaj jina sumajpuni, nispa.

¹⁵Chayman jinataj, sapa ayllusniykichejmanta kurajkunata allin yachayniyojkunata, kamachiyta yachajkunata ajllarqani, churarqanitaj qankunata kamachinasuykichejpaj; wakinta nerqani waranqa runasta kamachinankuta, wakinta pachajta, wakinta phishqa chunkata, wakinta chunkata, wakintataj sapa ayllupi kamachinankupaj churarqani.

¹⁶Chaypachallataj nerqani chay juezkunaman kay imasta: Tukuy imamanta tukuyninkuta uyariychej cheqanta imamantapis ruwaychej, ayllu masiykichej israelitasta, jinallataj karu llajtayojkunatapis.

¹⁷Justiciata ruwaspaqa ama wakillanman kutikunkichejchu; juch'uymampis jatunmampis uj rejta ruwaychej. Ama pitapis manchachikuychejchu. Uj rejta cheqanchaj juezqa Dioslla. Sichus wakin imasta mana ruwayta atinkichejchu chayqa, noqaman kachamuwaychej. Noqa chaytaqa cheqanchasaj.

¹⁸Chaypacha allinta willarqaykichej, imaynatachus qankuna imatapis ruwanaykichejta.

¹⁹Horebmanta llojsimuspa amorreospa orqosninkuman chayamorqanchej Señor Diosninchejpa kamachiwasqanchejman jina. Jinallataj purerqanchej, qankuna rikorqankichej, chay jina jatun millay ch'in pampasta, Cades-barneaman chayamunanchejkama.

²⁰Chaypi nerqaykichej: Chayamunchejña amorreospa orqosninkuman, Señor Diosninchej qowanchej chayman.

²¹Kunanqa Señor Diosniykichej kay jallp'asta qopusunkichej. Chayman wichariychej, dueñochakuychejtaj, ñaupa tatasniykichejpa Señor Diosninku kamachisqanman jina, ama manchachikuychejchu, nitaj kharkatitiychejchu.

²²Jamuspataj tukuyniykichej niwarqankichej: Wakinniykuta ajllaspa kachawaykuman chay jallp'asta qhawajta, kutimuspataj willanawaykupaj, may ñantachus rinaykupaj, may llajtamanchus chayanaykuta ima.

²³Qankunaj niwasqaykichejtaj noqapajqa allin karqa. Chayrayku sapa ayllumanta ujtakama chunka iskayniyojta ajllarqaykichej.

²⁴Paykunataj rispa wicharerqanku chay orqoman, chaymantataj Escol valleman chayamorqanku. Chanta chay tukuynin jallp'asta purerqanku.

²⁵Chay jallp'amanta poqoykunatataj apamorqanku, willawarqaykutaj: Señor Diosninchejpa qowasqanchej jallp'asqa sumachaj jallp'as.

²⁶Chay tukuywampis qankuna mana munarqankichejchu chay jallp'asman wichariyta, Señor Diosniykichejpa nisqasninta mana kasorqankichejchu.

²⁷Qankunaqa jarasniykichejpi rimarqankichej kay jinata: Señorqa mana munakuwanchejchu, Egiptomanta orqhomuwanchej amorreospa makinman churanawanchejpaj, jinamanta noqanchejta tukuchinawanchejpaj.

²⁸Kunanqa, maymantaj risunri? Llajta masisninchejqa niwanchej, jaqaypi runasqa aswan atiyniyoj, aswan jatuchajtaj noqanchejmantaqa kasqankuta. Willawarqanchejtaj llajtasninkupis jatuchaj kasqankuta; llajtaspi perqasnimpis mar pataman oqharisqas kasqankuta, chaypi rikullasqankutaj Anacpa jatuchaj wawasninta, rikullasqankutaj jatuchaj kuraj runasta.

²⁹Noqataj nerqaykichej: Paykunamantaqa ama kharkatitiychejchu nitaj manchachikuychejchu.

³⁰Señor Diosniykichej ñaupaqeykichejta rispa maqanakonqa qankunaj cuentaykichejmanta, imaynatachus Egiptopi ruwasqanta rikorqankichej; ajinallataj ch'in pampaspipis. Señor Diosniykichejqa makisninwan jap'ispa pusaykachakusorqachej tukuy ñanta, kayman chayamunaykichejkama, uj runa imaynatachus wawanta pusaykachakun ajinata.

³²Chaywampis qankunaqa manaraj Señor Diosniykichejpi creerqankichejchu.

³³Payqa ñaupaqeykichejta rispa maymanchus jarakunaykichejta ajllarqa. Tutaqa ñanta rishajtiykichej ninawan k'anchamorqa maynintachus rinaykichejpaj, p'unchaytaj phuyuwan rikuchisorqachej maymanchus rinaykichej ñanta.

³⁴Señorqa qankunaj rimasqaykichejta uyarispa, manchayta phiñakorqa, juraspataj nerqa:

³⁵Kay sajra miraymantaqa ni mayqenninku rikonqankuchu sumaj jallp'ata, ñaupa tatasninkuman qosqaykichej nerqani, chayta.

³⁶Chaywampis Jefonej wawan Calebqa chay jallp'ata rikonqa. Payman wawasninmanwan maymanchus chakisninku saruykonqa chayta qosaj, tukuy sonqo Señorpa kamachisqasninta kasusqanrayku.

³⁷Qankunaj juchasniykichejrayku, Señorqa noqawampis phiñarikun, qampis manallataj chay jallp'aman chayankichu, nispa.

³⁸Qampa cuentaykimanta Numpa wawan yanapajniyki Josué yaykonqa. Payta astawan kallpachay. Paymin israelitasmanqa jallp'ata rak'enqa.

³⁹Qankunaqa creerqankichej, enemigosniykichejqa wawasniykichejta mamasnintawan jap'ikapunankuta. Kunanqa chay wawasniykichej manaraj yuyayniyojchu kajkuna yachanankupaj imachus allin, imachus mana allin kasqanta, chay jallp'aman chayanqanku. Noqa paykunaman chay jallp'ata qosaj jap'ikapunankupaj.

⁴⁰Qankunaqa ch'in pampaman kutiriychej, Puka Mar qochaman rej ñanninta.

⁴¹Qankunataj chaypacha niwarqankichej: Señorpa contranta juchallikuyku; kunantaj wicharispa maqanakamusqayku Señor Diosninchej kamachiwasqanchejman jina, nispa. Qankunaqa maqanakunaykichejta oqhariykukuspa chay orqoman wicharerqankichej, chay maqanakuypi atipayta yuyaspa.

⁴²Señortaj niwarqa qankunaman ninaypaj: Ama maqanakojqa richunkuchu, enemigosninkuwan atipachikojqa, imaraykuchus noqaqa mana paykunawanchu kashani.

⁴³Noqaqa chayta willarqaykichej, qankunataj mana uyariwarqankichejchu; qankunaqa astawan Diospa contranman tukorqankichej Diospa kamachisqanta mana kasuspa, machu-machuykachaspa chay orqoman wicharerqankichej.

⁴⁴Chaykunapi tiyakoj amorreostaj qankunawan maqanakoj jamorqanku, atipaspataj qhatiykamusorqachej wayronqos jina, Seirpi atipaspa Hormakama.

⁴⁵Chaymanta kutirimuspa qankunaqa mayta waqarqankichej Señorpa ñaupaqempi, Señortaj mana uyarisorqachejchu chay jina llakiyta waqasqaykichejta.

⁴⁶Chayrayku, qankunaqa unayta tiyakunaykichej karqa Cades jallp'aspi.