Read Quechua Bolivia DC Bible DEUTERONOMIO 11 Bible Online

DEUTERONOMIO 11 - Quechua Bolivia DC Bible bible

DEUTERONOMIO 11

¹Munakunkichej Señor Diosniykichejta, junt'ankichejtaj tuta p'unchay paypa nisqasninta, leyesninta, yachachisqasninta, kamachiykunasninta ima.

²Qankunaqa kunan kayta waqaychaychej. Mana ari wawasniykichejmanchu nishani, imaraykuchus paykunaqa mana yacharqankuchu Señor Diosniykichejpa yachachisqasninta, nitaj rikorqankuchu jatun kayninta, imastachus jatun atiyninwan ruwasqasninta ima.

³Qankunaqa rikorqankichej señalesta, t'ukuna imasta Egiptopi faraompa contranta, chaypi kaj runaspa contranta ima ruwasqanta.

⁴Chantaqa rikullarqankichejtaj imatachus ruwasqanta, egipcio soldadoswan, caballosninkuwan, maqanakupaj ruwasqa carrosninkuwan ima, p'ultirparichispa Puka Mar qocha ukhupi qhepaykichejta jamushajtinku. Jinamanta paykunata Señorqa chinkacherqa.

⁵Chantaqa yuyarikullaychejtaj imastachus Señorqa qankunarayku ch'in pampapi ruwasqanta, kayman chayamunaychejkama.

⁶Yuyarikullaychejtaj imatachus ruwasqanta Datanwan, Abiranwan ima. Paykunaqa Eliaspa mirayninmanta, Rubempa ayllunmanta karqanku. Yuyarikuychej imaynatachus jallp'a kicharikuspa paykunata oqoykusqanta ayllusninkutapis, jarasninkutapis, tukuy tiyapusqantawan ima, tukuy israelitas rikushajtinku.

⁷Señorpa t'ukuna ruwasqasnintaqa, qankuna kikin ñawisniykichejwan rikorqankichej.

⁸Junt'aychej tukuy kamachiykunata, kunan qoykichej chaykunata, kallpachasqas kanaykichejpaj, maymanchus yaykunkichej chay jallp'atataj jap'ikapunaykichejpaj.

⁹Ashkha watasta tiyakunaykichejpajtaj Señor Diosniykichej ñaupa tatasniykichejman, mirayniykichejmamnpis qosqaykichej nerqa chay jallp'api, maypichus lechewan, misk'iwan yaku jina corrishan chaypi.

¹⁰Jap'ikunkichej chay jallp'asqa, mana maymantachus llojsimorqankichej chay Egipto jallp'a jinachu. Chaypeqa mujusta tarpuytawan, qankunallataj qarpanaykichej karqa, huertaspi ruwanku ajinata.

¹¹Jap'ikunkichej chay jallp'asqa orqosniyoj, vallesniyojtaj. Cielomanta para chay jallp'astaqa qarpan.

¹²Chay jallp'astaqa kikin Señor Diosniykichej qhawashan. Señorpa ñawenqa chayllatapuni watantinta qhawan.

¹³Sichus qankuna kasunkichej kunan qoykichej chay kamachiykunasta, Señor Diosniykichejta munakuspa, paytataj yupaychaspa tukuy sonqoykichejwan, tukuy almaykichejwan ima chayqa, Señor nisunkichej kay jinata: Chay jallp'asmanqa noqa parachimusaj maychus tiempompi, ñaupaj parata qhepa paratapis, qankuna trigota, vinota, aceitetapis sumajta oqharinaykichejpaj.

¹⁵Uywasniykichejpaj camposniykichejpi pastosta wiñachisaj. Qankunapajpis mikhuna kanqa sajsakunaykichejkama.

¹⁶Señormanta amapuni t'aqachikunkichejchu waj dioskunata yupaychaspa, paykunamantaj qonqorikuspa.

¹⁷Chayta ruwankichej chayqa, Señorta sinch'ita phiñachinkichej, paytaj mana parachimonqachu. Jallp'asniykichejtaj mana poqonqankuchu, qankunataj Señorpa qosusqaykichej jallp'amanta usqhayllata chinkachisqas kankichej.

¹⁸Kay palabrasniyta sonqoykichejpi, yuyayniykichejpipis jap'iychej. Makisniykichejmampis señalta jina wataykukuychej, ñawisniykichej patamampis churaykukuychej.

¹⁹Wawasniykichejmampis kay palabrasta yachachiychej, ñan puriyniykichejpi, wasiykichejpi kashajtiykichej, samarishaspa, jatarisqa kashaspapis.

²⁰Wasi punku kurkusniykichejman qelqaspa k'askachiychej, wasi wisq'anasniykichejman ima.

²¹Jinamanta qankunapis wawasniykichejpis unayta tiyakunkichej, ñaupa tatasniykichejqa Señorqa qosqaykichej nerqa chay jallp'api. Imaynachus cieloqa kay jallp'a patapi kashampuni, ajinallatataj qankunapis kallankichejpuni.

²²Sichus kay qosqaykichej chay kamachiykunata allinta ruwankichej chayqa; chantapis sichus Señor Diosniykichejta munakunkichej chayqa, payta tukuy ñankunasnimpi qhatispa, ñaupaqeykichejmanta tukuy nacionesta qharqonqa. Qankunataj ashkha runasta qharqonkichej qankunamanta aswan kallpayoj nacionesta.

²⁴May jallp'amanchá chakisniykichej saruykonqa chay jallp'as qankunajta kanqa. Lindesniykichejqa kanqa ch'in pampamantapacha Libanokama. Eufrates mayumantaj mar qocha Mediterraneokama.

²⁵Señor Diosniykichej manchachikuyta, kharkatitiyta ima apachimonqa maypichá purinkichej chayman. Pay nisorqachejña chayman jina, ni pipis qankunaj contraykichejta sayayta atenqachu.

²⁶Kunanqa ñaupaqeykichejman bendicionta, maldiciontawan churashani, kaykunamanta ujninta ajllakunaykichejpaj.

²⁷Benedicionqa kanqa kasojtiykichej Señor Diosniykichejpa kamachiykunasninta, kunan qosqaykichej chayta ima.

²⁸Maldiciontaj kanqa, maypachachus qankuna mana rejsisqa dioskunata kasojtiykichej, Señormanta qonqapuspa, ima ñantachus rinaykichejta kunan yachachiykichej chaymanta t'aqakojtiykichej.

²⁹Maypachachus Señor Diosniykichej pusaykusonqachej ima jallp'atachus jap'ikunkichej chayman chayqa, Gerizim orqomanta bendicionta qhaparinkichej, maldiciontataj Ebal orqomanta qhaparinkichej.

³⁰Chay orqosqa kashanku Jordán mayoj wasampi, inti yaykuyman rej ñan qhawarisqa, vallepi tiyakoj cananeospa jallp'asninkupi, Gilgal chimpapi yaqha encinas sach'arara More qayllapi.

³¹Qankunaqa Jordán mayuta chimpaj jinaña kashankichej, Señor Diosniykichej ima jallp'atachus qoshasunkichej chayta jap'ikamoj. Chayta jap'ikapuytawantaj chaypi tiyakunkichej.

³²Junt'ankichejpuni leyesta, kamachiykunatapis kunan qankunaman qoykichej chaykunata.