Read Quechua Bolivia DC Bible DEUTERONOMIO 13 Bible Online

DEUTERONOMIO 13 - Quechua Bolivia DC Bible bible

DEUTERONOMIO 13

¹Ichapis qankuna ukhupi uj runa, Diosmanta sut'inchaj rikhurinman, chayri mosqoykunamanta willaj, ima señalchus, ima milagrochus kananta.

²Chanta nisunkichejman: Kunanqa jaku waj dioskunaj qhepanta, mayqenkunatachus mana rejsinkichejchu, chaykunata yupaychamuna, nispa.

³Chay imas junt'akunman chaypis amapuni chay sut'inchajta, chayri willajtapis uyarinkichejchu. Chaykunataqa Señor Diosniykichej kachamusunkichej yachanampaj cheqamantachus manachus Payta munakushankichej tukuy sonqoykichejwan, tukuy almaykichejwampis, chayta.

⁴Qankunaqa Señor Diosniykichejpa qhepantapuni puriychej. Payta manchachikuychej, kamachiykunasninta junt'aychej. Paypa parlasqanta uyariychej; Payta yupaychaychej; Paywampuni ujchasqas kaychej.

⁵Chay sut'inchajqa, chayri mosqoykunamanta willajqa wañuchisqa kanqa, Señor Diosniykichejpa contranta ruwanaykichejta munasqanrayku. Chay Señor Diosniykichejqa Egiptomanta orqhomusorqachej wata runas kashajtiykichej. Chantapis chay runaqa munashan t'aqakunaykichejta, mayqen ñantachus Señor Diosniykichej kamachisorqachej purinaykichejta chaymanta. Chay runata wañuchispaqa qankuna ukhumanta sajrata chinkachinkichej.

⁶Ichapis kikin wauqeyki, chayri qhari wawayki, chayri warmi wawayki, chayri munasqa warmiyki, chayri aswan sumaj kausaqeyki pakayllamanta nisunkiman: Jaku waj dioskunata yupaychamuna, nispa. Chay dioskunataqa nitaj qankuna, nitaj tatasniykichejpis rejserqankichejchu.

⁷Chay jina kanku qankunaj muyuyniykichejpi kaj nacionespa dioskunasnin; qayllapitaj, pata karupitaj mundontimpi.

⁸Ama chay parlaytaqa kasunkichu nitaj uyarinkipischu; ni payta perdonankichu, nitaj khuyapayankichu, manallataj payta khuyapayankichu.

⁹Manachayqa chay jinata parlajtaqa wañuchiy. Qampuni ñaupaj rumita choqanki. Qampa qhepaykitataj tukuy runas choqallanqankutaj.

¹⁰Payta rumiwan ch'anqanki wañunankama Señor Diosniykimanta t'aqasuyta munasqanrayku. Chay Señor Diosniykeqa Egiptomanta orqhomusorqa kamachillapuni kashajtiyki.

¹¹Chayta uyarispa tukuy israelitas manchachikuywan manaña ujtawan jina sajra kajta ruwanqankuchu.

¹²Ichapis mayqen llajtallapipis Señor Diosniykichej tiyakunaykichejpaj qosonqachej, chaykunapi uyariwajchej, nejta:

¹³Diosta mana kasoj runas rikhurimusqanku, chay llajtapi tiyakojkunatataj pantachisqanku, kay jinata: Jaku, waj dioskunata yupaychamuna, qankuna mana rejsinkichejchu chaykunata, nispa.

¹⁴Chaytaqa qankuna allinta yachankichej sumajta tapukuspa. Sichus cheqatapuni chay sajra kajta qankuna ukhupi ruwanku chayqa, chay llajtapi tiyakoj runasta, tukuy uywasninkutawan khuska espadawan wañurachinkichej. Chanta imasninkuchus kajkunatapis tukuyninta chinkachinkichej.

¹⁶Chay tukuy imasninkutaqa chay llajta plazaman tantankichej. Llajtata ninawan kanaykunkichej runasmanta qhechusqasniykichejta ima. Chantapis tukuy chay imasqa ofrenda ruphasqa jina Señorpaj kanqa. Jinamanta chay llajtaqa wiñaypaj raqaylla kanqa, ni jayk'ajpis watejmanta ruwakonqañachu.

¹⁷Qankunaqa chay tukuy imas chinkachisqa kananmanta ama imatapis jap'ikapunkichejchu. Chayta ruwankichej chayqa, Señorpa sinch'i phiñakuynenqa tiyaykonqa, qankunatataj khuyasonqachej. Qankunata perdonaspataj ashkhata mirachisonqachej, tatasniykichejman juraspa nisqanman jina.

¹⁸Ajina kanqa Señor Diosniykichejta kasuwajchej chayqa, kay tukuy kamachisninta junt'aspa, kunan nishaykichej, chaykunata ruwaspataj allin kajllata Señor Diosniykichejpa ñaupaqempi.