Read Quechua Bolivia DC Bible DEUTERONOMIO 14 Bible Online

DEUTERONOMIO 14 - Quechua Bolivia DC Bible bible

DEUTERONOMIO 14

¹Qankunaqa Señor Diosniykichejpa wawasnin kankichej. Ukhusniykichejta ama khuchukunkichejchu, nitaj piniykichej wañupojtimpis chujchasniykichejta umaykichejpa ñaupaqenmanta ruthunkichejchu.

²Qankunaqa Señor Diosniykichejpa ajllakusqasnin runas kankichej. Pay ajllakusorqachej tukuy naciones ukhumanta, paypata ajllasnin nisqa runas kanaykichejpaj.

³Ama mikhunkichejchu imachus Diospaj ch'ichi kajta.

⁴Kay animalesmanta qankunaqa mikhuyta atinkichej: Torosta, ovejasta, cabrasta, wajrayoj tarukasta, mana wajrayoj tarukasta, gamo sutiyoj tarukasta, monte cabrasta, imaymana laya tarukasta ima.

⁶Ajinaqa tukuy kutipakoj iskayman palqasqa phapatusniyoj animalesta mikhuyta atinkichej.

⁷Kay animalesmanta mana mikhuyta atinkichejchu, kutipakojkunapis kachunku, chayri iskayman palqasqa phapatusniyojpis kachunku: camellosta, castilla qowista, qowista. Chaykunajta phapatusninkoqa mana iskayman palqasqachu. Chaykunata qankunaqa ch'ichi animalesta jina qhawankichej.

⁸Khuchistapis ama mikhunkichejchu. Chaykunaj phapatusninkoqa mana palqasqachu, manataj kutipakunchu. Qankunaqa kay tukuy animalesmanta ama mikhunkichejchu aychasninta, ni wañojtimpis aychasninta llanqhankichejchu.

⁹Yakupi kajkunamanta mikhuyta atinkichej, aletasniyojkunata, escamasniyojkunatawan.

¹⁰Mana aletasniyojkunata, mana escamasniyojkunata imaqa ama mikhunkichejchu. Chaykunataqa ch'ichispaj qhawankichej.

¹¹Tukuy llimphu p'isqosmanta mikhuyta atinkichej.

¹²Kaykunallata ama mikhunkichejchu: Ancasta, tullu p'akej ankasta, yaku ankasta, suwintusta, imaymana laya mamanista, imaymana laya q'arqañasta, surista, ch'useqasta, gaviotasta, imaymana laya gavilanesta, jukusta, ibiskunata, jatun kunkayoj pilista, jatun chhuruyoj yaku pilista, suweq'arasta, cormorán nisqasta, cigüeñasta, imaymana laya jak'ajllusta, ch'iñista ima.

¹⁹Tukuy phawaj khurusta ch'ichispaj qhawankichej. Chaykunata ama mikhunkichejchu.

²⁰Lijrasniyoj llimphupaj qhawasqa p'isqosta mikhuyta atinkichej.

²¹Wañupoj animalesta amapuni mikhunkichejchu, imaraykuchus qankunaqa Señor Diosniykichejpa ajllakusqan kankichej. Qankunaj llajtaykichejpi tiyakoj karu llajtayojkunaman chay aychasta qoyta atinkichej, paykunaqa atillanku mikhuyta. Atillankichejtaj vendeyta karumanta jamojkunaman. Ñuñushaj cabra uñastaqa ama mamampa lechempi chayachinkichejchu.

²²Sapa watapuni granosta oqharisqaykichejmanta sapa chunkamanta ujninta Señorman qonkichej.

²³Chayqa kanqa trigomanta, vinomanta, aceitemanta, kuraj kaj waka uñasmanta, kuraj kaj oveja uñasmanta ima. Chaykunata qankunaqa mikhunkichej Señor Diosniykichejpa ñaupaqempi, may cheqatachus sutin kanampaj ajllakorqa chay cheqapi, Señor Diosniykichejta tuta p'unchay yupaychayta yachanaykichejpaj.

²⁴Sichus chay cheqaqa wasiykichejmanta ancha karu, chay chunkamanta ujninta apanaykichejpaj Señor Diosniykichejpa bendicionninta jap'iytawankama chayqa, chay chunkamanta ujninta t'aqapusqaykichejta vendespa waqaychankichej. Chay qolqetataj, maypichus Señora ajllakusqan chay cheqaman apaychej.

²⁶Imaschus chaynejpi tiyan chayta rantikunkichej munasqaykichejman jina: Wakasta, ovejasta, vinota, chayri ima poqosqa ujyanatapis. Chaytaqa qankuna Señor Diosniykichejpa ñaupaqempi mikhunkichej munasqaykichejman jina, sumajta kusikuspa tukuy aylluykichejwan khuska.

²⁷Qankunaj llajtaykichejpi tiyakoj levitastaqa amapuni jayk'ajpis mana imayojtaqa saqerpayankichejchu, imaraykuchus paykunaqa mana jallp'ayojchu kanku.

²⁸Sapa kinsa wata, chay qhepan watapi poqochisqaykichejmanta, sapa chunkamanta ujninta t'aqankichej. Chaykunatataj llajtasniykichejpi jallch'ankichej.

²⁹Chaykunata levitasman qopunkichej llajtasniykichejman jamojtinku, mana jallp'asniyoj kasqankurayku. Chantapis qollankichejtaj llajtasniykichejpi tiyakoj karu llajtayojkunaman, wajchasman, warmi sapasman ima. Paykuna atenqanku mikhuyta mashkhatachá atisqankuta sajsakunankukama. Ajinata ruwajtiykichej Señor Diosniykichejqa bendicisonqachej tukuy ima ruwasqaykichejpi.