Read Quechua Bolivia DC Bible DEUTERONOMIO 2 Bible Online

DEUTERONOMIO 2 - Quechua Bolivia DC Bible bible

DEUTERONOMIO 2

¹Chaymantaqa kutirispa, ch'in pampaman Puka Mar qocha ñanta rerqanchej Señor kamachiwasqanman jina. Seir orqoj muyuyninta unayta puriykacharqanchej.

²Chaypacha Señorqa niwarqa: Unaytaña qankunaqa kay orqollatapuni muyushankichej; kunanqa riychej patanejman.

⁴Israelita runasman kamachiy kay jinata: Qankuna aylluykichej Esauj miraynimpa jallp'annejta pasankichej. Paykunaqa tiyakunku Seir jallp'aspi. Paykuna manchachikusunkichej. Chaywampis, qankunaqa allinta qhawakuychej.

⁵Ama paykunata maqaj oqharikunkichejchu, noqaqa mana chay jallp'astachu qosqaykichej, ni uj chaki t'ajlloj sarusqantapis. Chay Seir jallp'asqa Esauj miraynimpaj kanku, chaytaqa paykunamanña qoni.

⁶Qankuna paykunaman ninkichej imatachá munasqaykichejta vendesunaykichejta, chay mikhunasmanta pagapunkichej, jinallataj yakunkuta ujyasqaykichejmantapis.

⁷Qankunataqa Señor Diosniykichej bendicisunkichej tukuy ima ruwasqasniykichejpi. Kay tawa chunka watas junt'ata qankunawan karqa Señorqa. Kay chhika karu ch'inkunasta pay pusaykachasorqachej sumajta waqaychaspa, nitaj imatapis pisichisorqachejchu.

⁸Chaymantaqa chay ayllu masinchej Esauj miraynimpa jallp'anmanta puririnchej. Paykuna chay Seir jallp'aspi tiyakorqanku. Rillarqanchejpuni Elatmantapacha Arabá ñanta, Ezion-goberninta. Chaymanta kutirispa Moab ch'in pampanta rerqanchej.

⁹Chaypitaj Señorqa niwarqa: Moabitastaqa ama phiñachiychu. Chay runaswan ama maqanakuman yaykunkichu, noqaqa mana chay jallp'asninkutachu qosqayki. Chay Ar jallp'astaqa Lotpa mirayninmanña qopuni.

¹⁰Ñaupajtaqa chay jallp'aspi emitas tiyakorqanku. Paykunaqa atiyniyoj, ashkhastaj karqanku may jatuchaj, anaquitas jina.

¹¹Runasqa nerqanku paykuna jatuchaj runas kasqankuta anaquitas jina. Chaywampis moabitasqa suticharqanku emitas nispa.

¹²Chay Seir jallp'aspeqa ñaupajta horeos tiyakorqanku. Paykunataqa Esauj mirayninmanta kajkuna qharqospa chinkacherqanku. Chaymantataj chaypi paykunaqa tiyakorqanku, israelitas Diospa paykunaman qosqan jallp'aspi tiyakorqanku ajinata.

¹³Chaymanta Señorqa nerqa: Kunanqa puririychej, Zered mayuta chimpaychej, nispa. Noqanchejtaj chayta chimparqanchej.

¹⁴Cades-barneamanta jamusqanchejmantapacha Zered mayuta chimpananchejkama kinsa chunka pusajniyoj watas karqa. Chaykama jarapi kajkunaqa, wañurarqankuña tukuy qharis maqanakuman riyta atejkuna, Señor paykunaman juraspa nisqanman jina.

¹⁵Señorpis paykunaj contrankupi kasqa, tukuyninku jarapi jasut'ispa wañunankukama.

¹⁶Maypachachus maqanakupaj ajllasqa runasqa manaña karqankuchu chaypacha, Señorqa wajyawaspa niwarqa: Kunampacha moabitaspa jallp'asninkoj mojonninta chimpanki, chayankitaj Ar nisqa jallp'akama.

¹⁹Maypachachus moabitaswan tinkukunki chaypachaqa, ama paykunata phiñachinkichu, nitaj paykunawan maqanakunkichu, paykunaqa kanku Lotpa miraynin. Noqaqa chay jallp'asninkuta mana qosqaykichu, imaraykuchus chay jallp'astaqa paykunamanña qopuni.

²⁰Chantapis runasqa jurarqanku chay jallp'as ñaupajta refaitaspata kasqanta. Ñaupajtaqa paykuna chaypi tiyakorqanku. Paykunatataj amonitasqa zomzomeosta nispa sutichaj kanku.

²¹Paykuna atiyniyoj, ashkhastaj karqanku, may jatuchaj anaquitas jina. Paykunatarí Señorqa tukucherqa amonitasnejta. Chaymanta amonitasqa chay jallp'aspi wiñaypaj qhepakorqanku.

²²Ajinallatataj Señorqa Esauj mirayninnejta horeosta tukucherqa. Esauj miraynenqa chay Seir jallp'aspi kunankama tiyakorqanku.

²³Jinallatataj heveosta Gaza qayllapi tiyakojkunata filisteos Cretamanta jamuspa chinkacherqanku. Chaypitaj paykuna tiyakaporqanku.

²⁴Niwarqa Señorqa: Kunanqa usqhayta oqharikuychej, nispa. Arnón mayuta chimpaychej. Noqataj makisniykichejman amorreosmanta Sehonta rey jaywasqaykichej, tukuy jall'asnintawan.

²⁵Maqanakuyta qallariychej jallp'anta jap'ikapunaykichejpaj, kunanmantapacha ñaupajman tukuynejpi runas qankunamanta manchachikonqanku nisqayman jina. Qankuna jamunaykichejta parlajta uyarispa, manchachikuywan kharkatitenqanku.

²⁶Cademot ch'inmanta kachasta kacharqani Hesbonmanta rey Sehonman, misk'i palabraswan kay jinata nichispa: Jallp'aykej ñanninta pasachiwayku, noqaykoqa cheqanta jatun ñanninta pasasqayku ni pañaman nitaj lloq'eman pantaspa.

²⁸Chaynejta pasashajtiyku mikhuna pisiwasqayku chayqa rantikusqayku, jinallataj yakuta ujyasqaykumantapis pagapusqayku.

²⁹Kunanqa mañakuyki, saqewayku ari ñanniykita pasajta, Jordán mayuta chimpaspa Señor Diosniyku qowasqayku chay jallp'asman chayanaykukama. Esauj miraynin, Seir jallp'api tiyakojkuna, jinallataj moabitaspis Ar nisqa jallp'api tiyakojkuna, ñanninta pasachimuwarqayku.

³⁰Hesbonmanta rey Sehonqa mana pasachiyta munawarqanchejchu chay jallp'annejta. Chay jina kanampajqa Señorpuni paypa sonqonta rumiyacherqa, ajinamanta makiykichejman payta churarqa. Kunampis jinarajpuni kashan.

³¹Chaymantataj Señorqa niwarqa: Kunanmantapacha Sehontaqa makisniykiman jaywasqayki, tukuy jallp'antinta. Jallp'asninkuman yaykullayña, chaymantataj chay jallp'asta jap'ikapuy.

³²Sehontaj noqanchejwan maqanakoj llojsimorqa tukuy soldadosninwan Jahazapi tinkunanchejpaj.

³³Señor Diosninchejtaj paykunata makinchejman urmachimorqa. Noqanchejtaj atiparqanchej, payta, wawasninta, tukuy soldadosninta ima.

³⁴Tukuy llajtasnintataj jap'ikaporqanchej. Chaymantataj chinkacherqanchej chay llajtasta, qharista, warmista, wawasta ima. Jinamanta ni pita kausashajta saqerqanchejchu.

³⁵Noqanchejqa uywasnillankuta, imaschus chay llajtaspi karqanku chaykunallatawan apakaporqanchej.

³⁶Chayta ruwarqanchej Aroer llajtamantapacha, Arnón mayu chimpapi kashan chaymanta, vallesnimpi kaj llajtamantapacha, Galaad llajtakama. Chay llajtasqa ni mayqen kutichikuyta atiwarqanchejchu, Señor Diosninchej tukuyninkuta makisninchejman urmachimorqa.

³⁷Chay jallp'asllata mana imanarqanchejchu: Amonitaspa jallp'asninkuta, Jaboc mayu tukuynin jallp'asta, orqo kinraykunapi llajtasta, chantaqa ima llajtastachá Señor Diosninchej mana kamachiwarqanchejchu imanananchejta chaykunata.