Read Quechua Bolivia DC Bible DEUTERONOMIO 20 Bible Online

DEUTERONOMIO 20 - Quechua Bolivia DC Bible bible

DEUTERONOMIO 20

¹Sichus maqanakoj llojsinkichej, enemigosniykichejtaj rikhurisonqachej ashkha caballosniyoj, carretasniyoj ima, qankunamanta aswan ashkha soldadosniyoj ima chayqa, ama paykunamanta manchachikunkichejchu. Egiptomanta orqhomusorqachej chay Señor Diosniykichejqa qankunawan kashan.

²Maypachachus maqanakunaykichejña kashajtintaj, sacerdoteqa soldadosman rispa, nenqa:

³Uyariychej israelitas; kunanqa enemigosniykichejwan maqanakamunkichej. Ama iskayrayankichejchu, ama manchachikunkichejchu, ama kharkatitinkichejchu, amataj mancharikunkichejchu; imaraykuchus Señor Diosniykichejqa qankunawan kashan. Pay qankunarayku enemigosniykichejwan maqanakonqa, atipanaykichejpajtaj yanapasonqachej.

⁵Chaymantaqa kurajkuna soldadoswan parlanqanku, nispa: Mayqenniykichejchus mosoj wasita ruwarkorqankichej, nirajtaj chaypi tiyakunkichejchu chayqa, kunampacha chay wasinman tiyakapoj richun. Pajtataj maqanakupi chay mosoj wasiyoj wañunman, ujtaj chay wasinta ch'allanman.

⁶Sichus mayqenniykichej uvasta tarporqankichej, manarajtaj imatapis mikhurerqankichejchu chayqa, kutipuchun wasinman, chay tarpusqanta mikhumuchun. Pajtataj maqanakupi wañunman, wajñataj rinman chay uvasta pallakamoj.

⁷Sichus mayqenniykichej casarakunampaj tratota ruwarqs chayqa, wasinman kutipuchun, casaramuchuntaj. Pajtataj maqanakupi wañunman, wajñataj chay warmiwan casarakunman.

⁸Chaymanta kurajkunaqa soldadosman ujtawan nenqanku: Sichus mayqenniykichej manchachikun, manataj kallpan kanchu, wasinman kutipuchun, maqanakojkunata ama iskayrayachinampaj, nispa.

⁹Kurajkuna parlayta tukojtinkutaj, soldasdosta kamachejkuna, paykunaj ñaupaqenkuta maqanakuman renqanku.

¹⁰Maypachachus uj llajtaman maqanakunaykichejpaj chayankichej chayqa, ñaupajta ninkichej chay llajtayojkuna allinyakunankuta.

¹¹Sichus chay llajtayojkuna nisqaykichejta uyarinkuman, saqespa llajtaman yaykunaykichejta chayqa, kamachisniykichej kanqanku, sinch'i ruwaykunata ruwaspa.

¹²Sichus nisqaykichejta mana uyarinkuchu, astawanqa maqanakuytapuni munanku chayqa, maqanakuyta qallarinkichej.

¹³Señor Diosniykichej chay llajtasta makisniykichejman jaywasonqachej. Qankunataj tukuy qharista mana ujniyojta tukuchinkichej.

¹⁴Chaymantaqa jap'ikapunkichej: Warmisninkuta, wawasninkuta, uywasninkuta, imaschá chay llajtaspi tiyan chaykunata ima. Mikhunkichejtaj enemigosniykichejpa kapuyninkumanta, Señor Diosniykichej qopusunkichej chaymanta.

¹⁵Ajinallatataj ruwankichej qankunamanta karupi kaj llajtasmampis, mayqenkunachus mana chay qayllaykichejpi kaj llajtasmantachu kanku.

¹⁶Señor Diosniykichej qosonqachej chay jallp'aspeqa tukuy kausayniyojkunata tukuchinkichej.

¹⁷Kaykunata mana ujniyojta tukuchinkichej: Hititasta, amorreosta, cananeosta, fereseosta, heveosta, jebuseosta ima, imaynatachus Señor Diosniykichej kamachisusqaykichejman jina.

¹⁸Ajinata chinkachinkichej, chay millay ruwaykunasninkuta dioskunasninkuman ruwarqanku chaykunata ama yachachinasuykichejpaj; jinamanta ama Señor Diosniykichejpa contranta juchallikunaykichejpaj.

¹⁹Maypachachus unaytaña uj llajtata muyuykunkichej maqanakuspa chay llajtata jap'ikapunaykichejpaj, ama ima sach'asnintapis hachawan k'utunkichejchu. Chaykunaqa kanqa chay poqoykunasninta mikhunaykichejpaj. Chantapis chay sach'asqa runaschu kanku contraykichejta oqharikunankupaj?

²⁰Manachayqa mana poqoyniyoj sach'asllata urmachiyta atinkichej. Chay jark'achinasta ruwakunkichej, ima llajtawanchus maqanakushankichej chaymanwan qayllanaykichejpaj, chay llajtata jap'ikapunaykichejkama.