Read Quechua Bolivia DC Bible DEUTERONOMIO 29 Bible Online

DEUTERONOMIO 29 - Quechua Bolivia DC Bible bible

DEUTERONOMIO 29

¹Kay jinata Señorqa ruwasqanmantaña israelitas Horeb orqopi uj tratota watejmanta Moisesman kamacherqa, israelitaswan chay llajtapi uj tratota ruwananta.

²Moisesqa israelitasta tantachispa nerqa: Qankunaqa rikorqankichej imaynatachus Señorqa Egiptopi faraonta ruwasqanta, tukuy kamachisninta jallp'asninta ima.

³Qankunaqa chay imasta rikorqankichej, jatuchaj rikuchiykunasta, señalesta, milagrosta ima.

⁴Kunankama Señorqa entiendej sonqota manaraj qosunkichejchu, ni ñawista chay imasta rikunaykichejpaj, nitaj ningristapis uyarinaykichejpaj.

⁵Noqaqa tawa chunka watas junt'ata ch'in pampaspi pusaykacharqaykichej. Chay purisqaykichejpitaj p'achasniykichej, ni ujut'asniykichejpis mana thantakorqachu.

⁶Chaypacha qankunaqa t'antata mana mikhorqankichejchu, manataj vinota, ni ima machachikoj ujyanatapis ujyarqankichejchu, jinamanta yachanaykichejpaj Señorqa qankunaj Diosniykichej kasqanta.

⁷Kay jallp'aman chayamojtinchejkamataj, noqanchejwan maqanakoj llojsimorqanku Hesbonmanta Sehón rey, Basanmanta Og rey ima; paykunatataj atiparqanchej.

⁸Chaymantataj jallp'asninkuta jap'ikaporqanchej, qoporqanchejtaj Rubén aylluman, Gad aylluman, Manasés khuskan ayllunmanwan.

⁹Chayrayku qankunaqa waqaychaychej, junt'aychejtaj kay tratota, tukuy ima ruwasqasniykichejpi allin risunaykichejpaj.

¹⁰Kunanqa tantasqas kashankichej tukuyniykichej Señor Diosniykichejpa ñaupaqempi: Sapa ayllumanta kamachejkuna, kurajkuna, yachayniyojkuna, tukuy qharis, wawas, warmis, qankunawan tiyakoj karu llajtayojkuna, llant'eros, yakuta aysajkunapiwan.

¹²Ajinaqa qankuna juraspa ninkichej, kunan kay tratota Señor Diosniykichej qankunawan ruwashan chayta.

¹³Chantaqa kunanmantapacha qankuna Señorpa ayllun kankichej, paytaj qankunaj Diosniykichej kanqa, qankunaman nisusqaykichejman jina, imaynatachus ñaupa tatasniykichej Abrahamman, Isaacman, Jacobman ima juraspa nisqanman jina.

¹⁴Señorqa nin mana qankunallawanchu kay tratota juraspa ruwasqanta, manachayqa ruwashallantaj pikunachus manaraj kunan noqanchejwanchu Señorpa ñaupaqempi kashanku, chaykunawampis kashallantaj.

¹⁶Qankunaqa sumajta yachankichej, imaynatachus Egiptopi tiyakusqanchejta, imaynatachus waj nacionespa jallp'asninkunejta pusamusqanchejtataj.

¹⁷Chaypitaj rikorqanchej millay ruwasqasninkuta, lantisninkutapis k'aspimanta, rumismanta, qorimanta ima ruwasqasta chay runas yupaychanku, chaykunata.

¹⁸Kunanqa qankuna ukhupi ama kachunchu Señor Diosninchejta qhesachaj qhari, chayri warmi, chayri familia, chayri ima ayllupis chay nacionespa dioskunasninkuta yupaychajqa. Ama qankuna ukhupi kachunchu sach'aman rijch'akojkuna saphinmantapacha jayaq'eyoj wañuchina venenoyoj ima.

¹⁹Sichus mayqellampis kay juramentota uyarisqanmanta qhepata sumaj runa kasqanta yuyakuspa ninman: Allillampuni riwanqa tukuy imata munasqayman jina ruwajtiypis, nispa, chayqa, chay runanejta tukuyniykichej chinkachisqas kankichej.

²⁰Señorqa mana munanqachu chay runata perdonayta, manachayqa sinch'i phiñakuyninta payman apachimonqa. Kay libropi qelqasqa kaj tukuy maldicionestaj payman urmamonqa. Jinamanta, Señor chay runaj sutinta kay jallp'a patamanta chinkachenqa.

²¹Señorqa chay runata tukuy Israel ayllumanta llakiypaj t'aqanqa, chay tukuy maldicionesqa payman urmanqa, kay trato ruwasqa ley libropi qelqasqa kasqanman jina.

²²Qhepaman kajkuna mirayniykichej, karu llajtayojkuna ima rikonqanku chay imaymana nanaykunata, onqoykunata ima, Señorqa kay jallp'aman kachamonqa, chaykunata.

²³Tukuy kay jallp'apeqa rikonqanku azufrellata, kachillata, ruphasqa jallp'ata imalla. Chaypi mana imatapis tarponqankuchu, nitaj imapis poqoyta atenqachu, manapuni ima qhorallapis wiñayta atenqachu, imaynachus karqa Sodoma, Gomorra, Adma, Zaboim llajtaspi. Chaykunataqa sinch'i phiñakuyninwan chinkacherqa.

²⁴Chayrayku tukuy naciones tapukonqanku: Imaraykutaj Señorqa chay jinata ruwan kay jallp'awanri? Imatataj niyta munan kay jina sinch'i phiñakuyninri?, nispa.

²⁵Kutichenqankutaj: Paykunaqa qonqapunku ñaupa tatasninkoj Señor Diosninkuwan tratota ruwasqankuta, Pay paykunata Egiptomanta orqhomushajtin.

²⁶Paykunaqa waj dioskunata qonqorikuspa yupaychamunku. Chaykunataqa ni jayk'ajpis rejsejchu kanku, nitaj yupaychankuchu karqa.

²⁷Chayrayku Señorqa phiñakun kay naciompaj; jallp'ampa patanmantaj urmachimun tukuy maldicionesta kay libropi qelqasqa kashan chaykunata.

²⁸Kay runastaqa Señor may sinch'i phiñakuyninwan qharqon jallp'asninkumanta, wijch'umuntaj waj jallp'asman, kunampis kashankuraj.

²⁹Mana yachasqanchej imasqa Señor Diosninchejpallata. Diosninchej sut'inchawasqanchej imasqa noqanchejpajta, wawasninchejpata ima, wiñaypaj junt'ananchejpaj kay leypi ima kamachiykunachus kashan chaykunata.