Read Quechua Bolivia DC Bible DEUTERONOMIO 30 Bible Online

DEUTERONOMIO 30 - Quechua Bolivia DC Bible bible

DEUTERONOMIO 30

¹Kay tukuy nisqasniy qankunaman jamojtin, bendicionchus, chayri maldicionchus, ñaupaqeykichejpi churasqay chaykuna chay nacionespi, maymanchus Señor Diosniykichej wijch'usorqachej, chaypi sichus kaykunapi umachakuwajchej chayqa, sichus qankuna wawasniykichej ima Señorman kutirinkichej kasuspa tukuy sonqoykichejwan, tukuy almaykichejwampis kunan noqa kamachishaykichej chayman jina.

³Chaypacha Señor Diosniykichejqa kutichimonqa karu llajtasman apasqasta, khuyakusonqachejtaj. Ujtawantaj tantamusonqachej chay tukuy nacionesmanta, maykunamanchus wijch'usorqachej chaykunamanta, kay mundoj cantonkamapis ch'eqerasqa kashajtiykichej. Chaykunamantapacha Señor Diosniykichejqa kutirichimusonqachej.

⁵Jinamanta Señorqa ujtawan kutichimusonqachej tatasniykichej jap'ikorqanku chay jallp'aman, qankunarí ujtawan chay jallp'asta jap'ikapunkichej. Chaypi Señorqa qhapajyachisonqachej, mirachisonqachejtaj ñaupa tatasniykichejmanta astawan.

⁶Señor Diosniykichejqa llimphuchanqa sonqoykichejta, mirayniykichejpa sonqosninkutapis, payta munakunaykichejpaj tukuy sonqoykichejwan, tukuy almaykichejwampis, ajinamanta kausanaykichejpaj.

⁷Señor Diosniykichejqa kay tukuy maldicionesta enemigosniykichejman apachimonqa, pikunachá chejnikuspa qhatiykachasojkunaman ima.

⁸Qankunaqa Señorman kutirinkichej, kasuspataj tukuy kamachisqasninta allinta ruwankichej, kunan kamachishaykichej chaykunata.

⁹Chaymantataj Señorqa qhapajyachisonqachej tukuy ruwasqasniykichejpi, wawasniyoj kankichej, jinallataj uywasniyoj ima. Cosechasniykichejta Señorqa sumajta poqochenqa. Ajinapuni kanqa, Señor Diosniykichej ujtawan kusikonqa qankunapaj allinta ruwaspa, imaynatachus ñaupa tatasniykichejpaj ruwarqa ajinata.

¹⁰Chaykunaqa kanqa maypachachus Señor Diosniykichejta kasojtiykichej, chanta kamachiykunasninta, kay leyesninta ima junt'ajtiykichej, chayqa kay libropi qelqasqa kashan, chantá paymantaj kutirejtiykichej tukuy sonqoykichejwan, tukuy almaykichejwan ima.

¹¹Kay kamachiyta kunan qoshaykichej chayqa, ruwanapaj jinalla, nitaj qankunamantaqa karupichu kashan.

¹²Manamin chay kamacheyqa janaj pachapichu kashan, runas ninankupaj: Pitaj kunanqa janaj pachaman wicharipuwasun uraykuchimunampaj, rejsichinawanchejpaj, chayman jina ruwananchejpajtaj?, nispa.

¹³Manataj mar qhochaj wasampichu kashan runas ninankupaj: Pitaj mar qochata chimpapuwasun apampunawanchejpaj, rejsichinawanchejpaj, chayman jina ruwananchejpajtaj?, nispa.

¹⁴Manachayqa kay kamachiykuna qayllaykichejpipuni kashan, simiykichejpi sonqoykichejpi ima kashan, chayman jina junt'ayta atinaykichejpaj.

¹⁵Kunan noqaqa ñaupaqeykichejpi churani kausayta, allin kajtawan; chaymantataj wañuyta, mana allin kajtawan.

¹⁶Sichus kunan kasunkichej kamachishaykichej chaykunata Señor Diosniykichejta munakuspa, ñankunasninta purispa, junt'aspa kamachiykunasninta, leyesninta, nisqasnintawan chayqa, chaypacha kausankichej, ashkha wawasniyojtaj kankichej. Señor Diosniykichejqa bendicisonqachej ima jallp'apichus tiyakunkichej chaypi.

¹⁷Chanta sichus kaykunamanta sonqoykichejta karunchachinkichej, amichikunkichejtaj waj dioskunaman qonqorikuspa yupaychanaykichejpaj chayqa; kunan noqaqa niykichej: Wañunkichejpuni. Jinamanta manataj unaytachu tiyakunkichej, chay jap'ikusqaykichej jallp'api Jordán mayuta chimpasqaykichejmanta.

¹⁹Kunanqa noqa janaj pachaj ñaupaqempi, kay pachaj ñaupaqempipis chayta niykichej: Qoykichej kausayta wañuytawan bendicionta, maldiciontawan, chaykunamanta ajllakunaykichejpaj. Kausayta ajllakuychej ari, jinamanta qankuna, chanta wawasniykichej ima kausakunaykichejpaj.

²⁰Señor Diosniykichejta munakuychej, kasuychej, Payllata qhatiychej. Ajinamanta kausayniyoj kankichej, unayta tiyakunkichej, chay jallp'api Señor Diosniykichej juraspa qonanta nerqa tatasniykichej Abrahamman, Isaacman, Jacobman ima, chaypi.