Read Quechua Bolivia DC Bible DEUTERONOMIO 31 Bible Online

DEUTERONOMIO 31 - Quechua Bolivia DC Bible bible

DEUTERONOMIO 31

¹Moisesqa tukuynin israelitasman ujtawan parlarqa kay jinata: Noqaqa pachaj iskay chunka watasniyojña kani. Manaña kallpay kanchu kayman jaqayman purinaypaj. Chantapis Señorqa niwarqa manaña Jordán mayuta chimpanayta.

³Chaywampis Señor Diosniykichejqa ñaupaqeykichejta renqa. Risqaykichejman jinataj chay nacionesta chinkachenqa, jallp'asninkuta jap'ikapunaykichejpaj. Josué ñaupaqeykichejta rispa pusasonqachej kurajniykichej jina, Señor nisqanman jina.

⁴Imaynatachus Señorqa ruwarqa amorreospa reyesninkuwan, Sehonwan, Ogwan ima, ajinallatataj chay nacioneswan ruwanqa chinkachinankama.

⁵Señorqa chay nacionesta makisniykichejman urmachimojtin, qankunaqa paykunawan ruwanaykichej tiyan kamachishaykichej chayman jina.

⁶Qankunaqa sumajta kallpachakuychej, sinch'itataj sayaychej. Qankunaqa ama manchachikunkichejchu chay runaswan tinkuytawan. Señor Diosniykichejqa qankunawan kashan. Payqa qhawasonqachejpuni, manataj saqerpayasonqachejchu.

⁷Chaymanta Moisesqa Josueta wajyaspa tukuy israelitaspa ñaupaqempi kay jinata nerqa: Kunanqa sumajta kallpachakuy, sinch'itataj sayay. Qanqa pusanayki tiyan kay runasta chay jallp'aman, Señorqa juraspa nerqa qonanta ñaupa tatasninkuman, chayman. Qampuni chay jallp'asta paykunaman rak'inki.

⁸Señorqa ñaupaqeykita renqa, qanwantaj kanqa. Payqa qhawasonqapuni, manataj saqerpayasonqachejchu. Qanqa ama manchachikuychu, nitaj kharkatitiychu.

⁹Moisesqa kay leyta qelqarqa, jaywarqataj sacerdote levitakunaman, Diospa tratompa cajoninta, israelitaspa tukuy kurajkunasninkumanwan.

¹⁰Kay jinatataj kamacherqa: Sapa qanchis watapi, manusmanta perdonana watapi, ramada nisqa fiesta tiempopi, tukuy israelitas Señor Diosniykichejpa ñaupaqempi, Señor ajllakorqa chay cheqapi tantakojtinku, kay leyta leenkichej tukuy israelitas uyarishajtinku.

¹²Chaymantaqa, tukuy runas tantakamunanku tiyan, qharis, warmis, wawas, llajtasniykichejpi tiyakoj karu llajtasniyoj ima, kay leymanta leejta uyarinankupaj, Señor Diosniykichejta jatunchayta yachanankupaj; chay leypi tukuy nisqanman jina ruwanankupaj.

¹³Ajinata mirayniykichejpis, chay imasta mana rejsejkunaqa uyarispa chayta yachanankupaj, Señor Diosniykichejta jatunchanankupajtaj tukuy kausayninkupi, ima jallp'apichus tiyakonqanku chaypi, Jordán mayuta chimpasqankumantaña.

¹⁴Chaymanta Señorqa Moisesman nerqa: Wañupunayki hora qayllaykamushanña. Josueta wajyamuy, iskayniykichejtaj Dioswan tinkukuna wasiman rinkichej. Noqa payman kamachisaj imatachus ruwananta. Jinamanta Moiseswan Josuewanqa Dioswan tinkukuna toldoman rerqanku.

¹⁵Chaypitaj Señorqa jatun chhoqo phuyu ukhupi paykunaman rikhurerqa. Chay phuyutaj sayaykorqa Dioswan tinkukuna wasi punkupi.

¹⁶Chaymanta Señorqa Moisesman nerqa: Qanqa wañupunkiña, kay israelita runastaj waj nacionespa dioskunasninkuwan juchallikonqanku kunan yaykonqanku chay jallp'api. Jinamanta paykunaqa qonqapuwanqanku, paykunawan ruwasqay tratotataj p'akenqanku.

¹⁷Chayrayku sinch'i phiñakuyneyqa paykunaj contranta k'ajarenqa. Paykunataqa saqerparisaj, mana qhawarisajchu ni ima kashajtimpis. Chay chhika nanaykuna, llakiykuna ima patankuman jamojtintaj, paykuna nenqanku: Manachu kay llakiykunaqa jamuwanchej manaña Diosninchej kasqanrayku?

¹⁸Chaypachataj noqaqa astawan paykunamanta karunchakusaj, chay tukuy ima millay sajrata ruwasqankumanta, waj dioskunata yupaychasqankumantataj.

¹⁹Kunanqa kay takiyta qelqaychej, chaytataj yachachiychej israelitasman, chayta takirikunankupaj. Chay takiytaj paykunaj juchasninkumanta yachachenqa.

²⁰Paykunataqa ima jallp'atachus ñaupa tatasniykichejman juraspa qonayta nerqani chayman pusaykusaj. Chay jallp'apeqa lechewan, misk'iwan yaku jina corrishan. Chaypi sumajta sajsaykuytawan, wirayaykuytawantaj, waj dioskunaj qhepanta rispa, chaykunata yupaychanqanku. Noqatataj qhesachawanqanku, ruwasqay tratotataj p'akenqanku.

²¹Chay chhika nanaykuna, llakiykuna ima patankuman jamojtintaj, kay takeyqa paykunaj juchasninkumanta yuyarichenqa. Qhepaman mirayninkupis yuyarikuspa takenqanku. Noqaqa rejsiniña paykunaj yuyaykunasninkuta, qosqaykichej nerqani chay jallp'aman manaraj pusaykushaspa.

²²Chay kikimpacha Moisesqa chay takiyta qelqarqa, israelitasmantaj yachacherqa.

²³Numpa wawan Josuemanta Señorqa kay jinata kamacherqa: Qanqa sumajta kallpachakuy, sinch'itataj sayay. Qan israelitastaqa pusaykunki, paykunaman qonayta nerqani chay jallp'aman, noqataj qanwampuni kasaj.

²⁴Moisestaj chay leykunata uj libroman qelqayta tukuytawan, Diospa tratompa cajonninta apajkuna levitasman nerqa:

²⁶Kay librota jap'iychej, churaychejtaj Señor Diosniykichejpa tratompa cajonnimpa qayllanman, qankunaj juchasniykichejta yuyarichinampaj.

²⁷Noqa yachaykichej qankunaqa mana kasukoj rumi sonqo runas kasqaykichejta. Noqa qankunawan kashajtiyraj Señorpa contranman tukuykichej. Q'aya minchha wañupojteyqa, imaynachus kankichejpis ari?

²⁸Kayman pusamuwaychej sapa ayllumanta kuraj kamachejkunata, kurajkunasniykichejtawan kay imasmanta paykunaman parlanaypaj, paykunaj contrankutataj janaj ñaupaqempi, kay jallp'aj ñaupaqempipis ninaypaj.

²⁹Noqaqa yachani wañupusqaymanta qhepamanqa juchallikunaykichejta, saqenaykichej chay ñanta qhatinaykichejta nerqaykichej chayta. Chantaqa yachallanitaj qhepamanqa llakiykuna jamusunaykichejta, Señorpa munasqanta mana allinta ruwasqaykichejmanta, chay imaswan phiñachisqaykichejmantataj.

³⁰Chaymanta Moisesqa takiyta israelitaspa ñaupaqempi qallariyninmanta tukukuyninmanta leerqa.