Read Quechua Bolivia DC Bible DEUTERONOMIO 33 Bible Online

DEUTERONOMIO 33 - Quechua Bolivia DC Bible bible

DEUTERONOMIO 33

¹Manaraj wañupushaspa Diospa ajllasqan runa Moisesqa, israelitasta bendicerqa kay jinata:

²Señorqa Sinaimanta jamorqa. Seirmantapacha k'anchamorqa. Parán orqomantapacha lliphipimorqa. Cades Meribamantapacha jamorqa. Pañampi nina ley kashan.

³Señorqa ayllunta munakun. Payta qhatejkunata jark'akun tukuy sajramanta. Paykunaqa Payman k'umuykunku, Paypa nisqasnintataj jap'inku.

⁴Moisesqa leyta qowarqanchej Jacobpa ayllumpaj chayaqenta jina.

⁵Señorqa Jesurumpi rey karqa, maypachachus llajtamanta kurajkuna Israel ayllunwan tantakojtinku.

⁶Moisesqa Rubenmanta nerqa: Rubén ayllu kausachun, ama wañuchunchu, runasnin pisilla kashajtinkupis.

⁷Judamantataj nerqa; Señor, uyariy Judá parlasusqanta; waj Israel aylluswan tantachichiy. Atiyniykiwan tukuy sajramanta jark'ay. Enemigosninwan maqanakushajtin yanapay.

⁸Levimantataj nerqa: Señor, qampata kanku Tumimwan, Urimwan; chaykunawan ajllasqa runasniykinejta, munayniykita rikuchinaykipaj. Paykunataqa Masah sutiyoj cheqapi pruebaman churarqanki. Paykunawan Meriba yaku cantopi phiñanakorqanki.

⁹Paykunaqa tatasninkuta nerqanku: Mana jayk'ajpis rikorqaykuchu. Jinallataj wauqesninkuman nerqanku: Qankunata mana rejsiykuchu. Jinallataj wawasninkutapis nillanqankutaj: Mana yachaykuchu pikunachus kankichej, nispa. Paykuna nisqasniykita junt'anku. Israel aylluwan trato ruwasqaykita sumajta waqaychanku.

¹⁰Paykuna yachachenqanku Israel aylluykiman imatachus kamachisqaykita. Ñaupaqeykiman inciensota apamonqanku, altarniykimantaj uywasmanta ofrendata.

¹¹Paykunata, Señor, bendiciy kallpayoj kanankupaj. May munakuywan jap'iy imastachus ruwasqankuta. Enemigosninkoj wasasninta sinch'ita nanachiy, amaña ujtawan jatarimunankupaj.

¹²Benjaminmantataj nerqa: Señorpaj may munasqa kajqa sumaj sonqo tiyasqa kausakuchun; patapi kaj Dios payta wiñaypajpuni jark'achun. Señorpa waqaychaynimpi tiyakonqa.

¹³Benjaminmantataj nerqa: Señorqa jallp'anta bendicichun, cielomanta sumaj paraswan, jallp'a ukhumanta yakus llojsimojkunapiwan.

¹⁴Sapa wata chajrasninta astawan sumajta poqochipuchun. Sapa sach'api aswan sumajta poqoykunata oqharichun.

¹⁵Chay ñaupa orqosmanta sumajta poqojkunawan bendicisqa kachun, unay lomasmanta aswan sumaj poqoykunaswan.

¹⁶Jallp'anqa aswan sumaj kajwan junt'a kashan. Laurashaj zarza ukhumanta parlaj Diosqa payta bendicichun. Kay tukuy imas jamuchun Josej ayllunman. Joseqa wauqesnin chaupimanta ajllasqa karqa.

¹⁷Jatun kaynenqa uj toroj kuraj uñampaj jatun kaynin jina. Payqa sinch'i kallpayoj búfalo waka jina. Payqa tukuy jallp'asta wajraspa qhatiykachanqa kay jallp'aj tukukuyninkama. Ajina kanqanku Efraimpa ashkha miraykunasnin. Ajina kanqanku waranqa waranqas Manasespa miraykunasnimpis.

¹⁸Zabulonmantaj nerqa: Zabulonqa qhatukoj rispa kusikuchun. Isacarmantataj nerqa: Isacarqa puriykunasnimpi jarakuspa kusikuchun.

¹⁹Paykunaqa nacionesta orqonkuman wajyanqanku. Chaypi maychus kaj rikuchikusta jaywanqanku. Ima qhapajyaykunachus mar qochapi tiyan chaykunawan kusikonqanku. Mar qocha cantospi qhapajyaykunasta tarispa kusikonqanku.

²⁰Gadmantataj nerqa: Bendicisqa kachun Gadpa jallp'anta jatunyachejqa. Gadqa león jina winkuykun, wateqaspa runaj makinta umantawan orqhorparerqa.

²¹Aswan sumaj kaj jallp'ataqa paypaj ajllakorqa. Kurajman jina payman jallp'ata qonqanku. Israel ayllu masisnimpa ñaupaqenta jallp'aman yaykorqa. Señorpa kamachisqasninta junt'arqa. Tukuy imatapis Israel ayllu ukhupi cheqanta ruwarqa.

²²Danmantataj nerqa: Danqa uj león uña jina. Basanmantapacha phinkimorqa.

²³Neftalimantataj nerqa: Neftalitaqa Señor allinta qhawan. Señormanta ashkha bendicionesta jap'in. Paypa jallp'anqa qochamanta uranejman.

²⁴Asermantataj nerqa: Aserqa bendicisqa kachun Jacobpa wawasnimpa chaupimpi, wauqesnimpajpis sumaj munasqa kachun. Aceitewan chakisninta joq'ochakuchun.

²⁵Wasi punku aldabasnin fierromanta, broncemantawan kachun. Wañupunankama jallp'asniyoj kachun.

²⁶Jesurumpa Diosninmanqa ni ima diospis rijch'akuchunchu. Chay Diosqa janaj pachamanta phuyus patapi rikhurimun, Israel ayllunta yanapanampaj.

²⁷Israel ayllu, wiñaypaj kausaj Diosqa qampaj pakakuyniyki. Qanta jap'isunki wiñay atiyninwan. Enemigosniykita ñaupaqeykimanta ayqechenqa, qantataj kamachisonqa paykunata tukuchinaykita.

²⁸Israelpa miraynin sonqo tiyasqa kausakonqa. Chay jallp'asninkupeqa sumajta trigo, uvas ima poqonqa. Paraqa ni jayk'aj pisenqachu.

²⁹Qanqa, Israel, sumaj kusikuyniyoj kanki. Pitaj qan jinari? Qantaqa Señorpuni librasonqa. Pay imamantapis jark'akusunki, yanapasunkitaj. Paymin atipanayki espadaykeqa. Enemigosniykeqa qanman k'umuykamusonqanku. Qantaj wapuykachasqankuta tukuchinki.