Read Quechua Bolivia DC Bible DEUTERONOMIO 4 Bible Online

DEUTERONOMIO 4 - Quechua Bolivia DC Bible bible

DEUTERONOMIO 4

¹Kunanqa, israelitas, sumajta uyariychej kamachiykunasta, chayman jina ruwanaykichejpaj. Jinamanta allinta kausakunaykichejpaj, ima jallp'apichus Señor, ñaupa tatasniykichejpa Diosnin qosonqachej, chaypi.

²Kunanqa ima palabrastachus qankunaman nishaykichej, chaymanta ama pisiyachinkichejchu, nitaj yapankichejchu. Junt'aychej ari Señor Diosniykichejpa kamachisqanta, qankunaman nisqayta.

³Qankuna kikiykichej rikunkichej Señor ruwasqanta Baal-peorpi, tukuchisqantataj tukuy qankuna ukhupi chay dioskunata yupaychajkunata.

⁴Tukuy qankuna Señor Diosniykichejta kasojkunaqa kausashankichejraj.

⁵Noqa yachacherqaykichej Señorpa kamachisqasninta, imatachus nisqasninta. Chaykunata Señor Diosniy kamachiwarqa qankunaman yachachinayta, qankuna chaykunata ruwanaykichejpaj, mayqen jallp'atachus jap'ikapunkichej chaypi.

⁶Chay kamachiykunataqa sumajta waqaychaspa ruwaychejpuni. Chay jinamanta tukuy llajtaspi runas yachanqanku yachayniyoj umayojtaj kasqaykichejta. Kay kamachiykunata uyarispataj nenqanku: Cheqamanta kay runasqa yachayniyoj, umayojtaj kanku. Jatun nacionmin kayqa, nispa.

⁷Mayqen jatun nacionwantaj dioskunasnin chay jina qayllapi kashanku, imaynatachus Señor Diosninchej noqanchejwan kashan, tukuy ima mañakusqanchejpi jinatari?

⁸Mana mayqen jatun naciompallatapis kapunchu cheqan kamachiykunasqa, yachachiykunaspis qankunaman qoykichej jinaqa.

⁹Ajina ari, qankunaqa allinta qhawakuychej, ama qonqapuychejchu imatachus rikusqaykichejta. Amataj jayk'ajpis chayqa tukuy kausayniykichejpi umaykichejmanta karunchakuchunchu. Aswampis wawasniykichejman allchhisniykichejman ima chayta willaychej.

¹⁰Horeb orqopi Señor Diosniykichejpa ñaupaqempi kashajtiykichej, chaypacha Señor niwarqa: Israelitasta tantachipuway nisqasniyta uyarinankupaj, yachanankupajtaj imaynatachus noqamanta yuyarikunawankupaj sapa p'unchay tukuy kausayninkupi, jinallataj wawasninkumampis yachachinankupaj.

¹¹Qankuna qayllarqankichej orqo k'uchuman. Chay orqomanta jatun nina lauray llojsimorqa, may pataman oqharikuspa yana phuyu jina, laqhayaywan ima.

¹²Señortaj chay nina lauray ukhumanta parlapayamusorqachej. Qankunataj chay parlamusqanta uyarerqankichej, manataj rikorqankichejchu ima rijch'ajchus kasqanta.

¹³Chaypi Señorqa trato ruwasqanta rikuchisorqachej, nisorqachejtaj chayman jina ruwanaykichejta. Chay tratoqa chunka kamachiykunasmin. Chayqa uj palqayoj rumipi qelqasqa karqa.

¹⁴Noqamantaj niwarqa chay yachachiykunasta, kamachiykunastawan yachachinayta, qankunataj chayta kasuspa junt'anaykichejta, mayqen jallp'atachus jap'ikapunkichej chaypi.

¹⁵Señorqa mayk'ajchus Horeb orqopi nina lauraj chaupimanta parlapayamusorqachej, chaypacha qankuna mana rikorqankichejchu ima rijch'ajchus kasqanta. Chayrayku sumajta qhawakuychej ama urmanaykichejpaj.

¹⁶Ajinamanta ama imaman rijch'akojtapis ruwanaykichejpaj, ni qhariman rijch'akojta, nitaj warmiman rijch'akojtapis.

¹⁷Nillataj kay pachapi kaj animalesman rijch'akojta, nitaj pata phawa p'isqosman rijch'akojta, ni pampapi qhatatakojman rijch'akojta, nitaj yakupi kaj challwaman rijch'akojtapis.

¹⁸

¹⁹Pajtataj janaj pachaman qhawaspa rikuwajchej, intita, killata, estrellasta, imaschus janaj pachapi kanku chaykunatawan. Ajinamanta pajtataj chaykunaman qonqorikuspa yupaychawajchej. Señor Diosniykichejqa chaykunasta ruwarqa kay pachapi kaj tukuy aylluspaj.

²⁰Señorqa qankunata jap'ispa fierrota unuyachej Egipto hornomanta orqhomusorqachej, Paypa chayaqen ayllu kanaykichejpaj, imaynachus kunan kashankichej jinata.

²¹Chaywampis Señorqa noqapaj mayta phiñakuwarqa qankunaj juchaykichejrayku, juraspataj niwarqa Jordán mayutapis manaña chimpanayta, jinamanta ima jallp'astachus Señor Diosniykichej qankunaman chayaqeykichejpaj qosorqachej, chayman amaña chayanaypaj.

²²Noqaqa kay cheqapi wañupusaj. Manaña Jordán mayuta chimpasajchu. Qankunallaña chay jallp'asta kaymanta chimpaspa jap'ikamunkichej.

²³Qankunataj amapuni qonqaychejchu Señor Diosniykichej qankunawan tratota ruwasqanta. Amapuni ima lantitapis ruwakuychejchu. Amataj ruwankichejchu, mayqenkunatachus Señor Diosniykichej mana munanchu ruwanaykichejta imaman rijch'akojllatapis chaykunatawan.

²⁴Señorniykichejqa ujllapi q'olarparej nina jinamin, payllata munakunaykichejta munan.

²⁵Maypachachus wawasniyoj allchhisniyojtaj kaspa jallp'api machuyankichej, chaypacha ruwawajchej ima lantitapis, chayri imaman rijch'akojtapis chayqa, qankuna kikiykichej juchallikunkichej Señor Diosniykichejpa ñaupaqempi, paytataj phiñachinkichej.

²⁶Chayta ruwawajchej chayqa, noqa janaj pachaj, kay pachaj ñaupaqempi niykichej ujllapi chinkachisqas kanaykichejta, chay Jordán chimpapi tiyakunaykichej chay jallp'amanta. Jinamanta chay jallp'api mana unaytachu tiyakunkichej, manachayqa tukuyniykichej chinkachisqas kankichej.

²⁷Señorqa tukuy nacionesman ch'eqerachisonqachej, uj chhikallaña qhepakunkichej chay jallp'aspi. Maykunamanchus Señor pusasonqachej, chaypitaj qankunaqa runaj makinwan ruwasqa dioskunata yupaychankichej, k'aspismanta, rumismanta ruwasqa lantista; mana rikojkunata, mana uyarejkunata, mana mikhojkunata, mana muskhejkunata ima.

²⁸

²⁹Sichus chaypi Señor Diosniykichejta tukuy sonqowan mask'ankichej, tukuy almaykichejwan ima chayqa, Payta tarinkichej.

³⁰Tukuy kaykuna chayamusojtiykichej, llakiyniyoj kajtiykichejtaj, chaypacha Señorman kutirinkichej, kasunkichejtaj.

³¹Payqa may khuyakuyniyoj. Manataj qhesachasonqachejchu, nitaj chinkachisonqachejchu, nitaj qonqaponqachu ñaupa tatasniykichejwan juraspa tratota ruwasqanmanta.

³²Tapukuychej imaynachus karqa qankunamanta aswan ñaupa tiempospi, Dios kay mundopi runata ruwarqa chaymantapacha. Tapukuychejtaj tukuynejpi, mayllapipis karqachu, yachakorqatajchu, kay jina jatun imasqa?

³³Karqachu ima nacionllapis Diospa parlamusqanta nina chaupimanta uyarej, chay imasta uyarispataj qankuna jina mana wañojqa?

³⁴Karqachu ima diosllapis uj nacionta tukuy nacionespa chaupinmanta ajllakojqa, imaynatachus qankunawan ruwarqa Señor Diosniykichej Egiptopi ajinata qankunaj ñaupaqeykichejpi, milagroswan, guerraswan ima, jatun atiyninta pruebaswan, señaleswan rikuchispa, manchachispataj?

³⁵Kay imasta rikuchisorqachej yachanaykichejpaj Señorlla Dios kasqanta, jinallataj waj Diosqa manapuni kasqanta.

³⁶Payqa janaj pachamantapacha parlasqanta uyarichisorqachej yachachisunaykichejpaj. Kay jallp'a patapitaj atiyniyoj ninanta rikuchisorqachej. Nina chaupimantataj palabrasninta uyarinkichej.

³⁷Payqa ñaupa tatasniykichejta munakorqa, wawasninkutataj ajllarqa. Pay kikimpuni paykunata Egiptomanta jatun atiyninwan orqhomorqa.

³⁸Payqa ashkha nacionesta qankunamanta aswan atiyniyojkunata ñaupaqeykichejmanta wijch'orqa. Ajinamanta llajtasninkuman yaykuchisorqachej, jallp'asninkutataj jap'ikaporqankichej, imaynachus kunan kashan ajinata.

³⁹Kunanqa yachaychej unanchaychejtaj. Señorlla Diosqa kasqanta janaj pachapi, kay pachapipis, jinallataj manapuni waj Dios kasqanta.

⁴⁰Junt'aychej Diospa ley churasqasninta, kamachisqasnintawan, kunan p'unchay qoykichej chayta. Ajinamanta allin risonqachej, qankunaman, jinallataj mirayniykichejmampis. Unaytataj kausankichej chay jallp'api Señor Diosniykichej wiñaypaj qosonqachej chaypi.

⁴¹Chaymanta Moisesqa kinsa llajtasta pakakunapaj Jordán mayu chimpapi inti llojsimuynejpi ajllarqa.

⁴²Runa masinta wañuchejqa mana jayk'ajpis chejninakusqa kashaspa, manataj wañuchiyta munaspaqa salvakuyta atinampaj chay ujnin llajtaman ayqenqa.

⁴³Chay llajtasqa kaykuna karqanku: Beser llajta, ch'in pampapi Rubén ayllupaj; Ramot llajta Galaadpi Gad ayllupaj; Golán llajta Basampi Manasespa ayllumpaj.

⁴⁴Kay leyta Moisesqa israelitasman qorqa.

⁴⁵Kaykuna kanku: Yachachiykunas, kamachiykunas ima, mayqenkunatachus ruwanapaj Moisesqa israelitasman nerqa Egiptomanta llojsimusqankutawan.

⁴⁶Chay karqa Jordán mayoj inti llojsimuynin, Bet-peorpa chimpampi. Chay karqa amorreo rey Sehompa jallp'ampi. Chay Sehonqa Hesbón llajtapi tiyakorqa. Payta Moisesqa israelitaswan atiparqanku Egiptomanta llojsimuspa.

⁴⁷Israelitasqa Sehompa jallp'anta jap'ikaporqanku. Basán rey Ogpa jallp'antapis jap'ikapullarqankutaj. Chay iskay amorreo reykuna Jordán mayoj chimpan inti llojsimuypi tiyakorqanku.

⁴⁸Jallp'asninkoqa karqa Aroermanta, Arnón mayu cantomanta, Sirión orqokama. Chay orqojta uj sutin karqa, Hermón nisqa.

⁴⁹Chaymanta chay lindenqa rillarqapuni tukuynin Arahanejta, Jordampa inti llojsimuyninta Wañusqa qochakama, Pisga orqo k'uchunnejta.