Read Quechua Bolivia DC Bible DEUTERONOMIO 5 Bible Online

DEUTERONOMIO 5 - Quechua Bolivia DC Bible bible

DEUTERONOMIO 5

¹Moisesqa tukuy israelitasta tantachispa nerqa: Israelitas, uyariychej, kamachiykunasta, imastachus ruwana kasqanta, chaykunamanta kunan willasqaykichej. Allinta yachaychej, waqaychaychejtaj chaykunaman jina imatapis allinta ruwaspa.

²Señor Diosninchej noqanchejwan Horeb orqopi uj tratota ruwarqa.

³Jinamanta payqa mana ñaupa tatasnillanchejwanchu ruwarqa, manachayqa noqanchejwampis ruwallarqataj, kaypi tantasqas kashanchej chaykunawan.

⁴Señorqa orqopi nina chaupimanta uyapura parlapayamusorqachej.

⁵Chaypacha noqaqa chaupipi qankunawan Dioswan tinkuypi sayasharqani. Jinamanta Señorpa palabrasninta qankunaman willanaypaj, imaraykuchus qankunaqa ninata manchachikuspa chay orqoman mana wichariyta munarqankichejchu. Chaypacha Señorqa nerqa: Noqamin kani Señorqa, Diosniykitaj. Noqa Egiptomanta orqhomorqayki, maypichus wata runa kasharqanki chaymanta.

⁶Noqa Señor Diosniyki kani, Egiptomanta orqhomorqayki, kamachillapuni kanaykimanta.

⁷Noqamanta astawan waj dioskunataqa ama yupaychankichu.

⁸Ama ni ima lantita ruwakunkichu, ni patapi cielopi kajman rijch'akojta, ni urapi jallp'api kajman rijch'akojta, nitaj yakuspi kajman rijch'akojtapis.

⁹Ama chaykunaman qonqorikunkichu, ama yupaychankichu; imaraykuchus noqamin Señor Diosniykeqa kani, sinch'i, Dios celoso, noqata chejniwajkunaj juchasninkuta jasut'ej, tatasninkoj juchasninkuta wawasninkupi jasut'ini, chanta allchhisninkupi, nieto allchhisninkupi ima.

¹⁰Khuyakuyniytaqa waranqa waranqasman rikuchini, pikunachus munakuwanku, kamachisqasniytataj kasuwanku chaykunaman.

¹¹Ama qhasimanta Señor Diosniykej sutinta oqharinkichu. Diosqa manapuni saqenqachu mana jasut'ispa pischus sutinta qhasimanta oqharejtaqa.

¹²Samakuna p'unchayta sumajta waqaychanki, chaypi Señorta yupaychanaykipaj, imaynatachus Señor Diosniyki kamachisusqanman jina.

¹³Sojta p'unchayta llank'anki, chay p'unchaykunapi tukuy ruwanayki kajta ruway.

¹⁴Qanchis kaj p'unchayrí, Señor Diosniykimanta yuyarikuspa yupaychanaykipaj. Chay p'unchaypeqa amapuni imallatapis ruwankichu, jinallataj ni qhari wawayki, ni warmi wawayki, ni qhari kamachiyki, ni warmi kamachiyki, ni wakayki, ni burroyki, ni ima uywayki, nitaj karu llajtayoj wasiykipi tiyakoj kajpis. Qhari kamachiykipis, chayri warmi kamachiykipis qan jina samarikuchunku.

¹⁵Qanqa yuyarikuy imaynatachus qampis Egiptopi kamachi kasqaykita. Señor Diosniyki chaymantaqa orqhomusorqa jatun atiyninwan. Chayrayku Señor Diosniykeqa kamachisunki, samakuna p'unchayta waqaychanaykita.

¹⁶Tataykita mamaykitawan allinwan qhaway, imaynatachus Señor Diosniyki kamachisusqanman jina, ajinamanta unayta kausakunaykipaj, ima jallp'atachus Señor Diosniyki qosunki chaypi allin risunampaj.

¹⁷Ama wañuchinkichu.

¹⁸Ama qhenchachakunkichu.

¹⁹Ama suwakunkichu.

²⁰Ama qhasimanta runa masiykej contranta llullakuspa parlankichu.

²¹Ama runa masiykej warminta munapayankichu. Nillataj munapayankichu wasinta, ni jallp'anta, ni qhari kamachinta, ni warmi kamachinta, ni wakasninta, ni burronta, nitaj imasninchus kajtapis.

²²Kay palabrastaqa Señorqa nerqa orqopi jatunmanta nina chaupimanta, laqha phuyu ukhumanta, tukuyninku orqo k'uchupi tantasqa kashajtinku. Chaymantaqa manaña imatapis nerqachu; chay palabrastataj uj palqayoj p'alta rumipi qelqarqa, chaytataj noqaman jaywawarqa.

²³Maypachachus chay parlamojta laqhayaj ukhumanta uyarerqankichej, chaypacha rikorqankichej Sinaí orqo tukuynin laurarishajta; jina kajtintaj tukuyniykichej, sapa ayllumanta kamachejkuna, kurajkunas ima noqawan parlaj jamuwarqankichej, nispa: Cheqamanta Señor Diosninchejqa jatun k'anchayninta, atiyninta ima rikuchiwayku, parlamusqantataj uyariyku, nina lauraj chaupimanta. Kunanqa yachayku Diosqa runasman parlasqanta, chaywampis runasqa kausankuraj.

²⁵Kunanqa imaraykutaj wañusqaykuri? Kay sinch'i ninaqa tukuchiwasqayku. Sichus ujtawan Señor Diosninchejpa parlamusqanta uyarisqayku chayqa, wañusqayku.

²⁶Pi runataj chay jina nina lauraj chaupimanta kausaj Diospa parlamusqanta uyarenqari noqayku jina mana wañuspari?

²⁷Qanqa qayllay uyariytaj Señor Diosninchej imatachus nisonqa chayta. Qanrí willawasqayku, noqaykutaj allinta ruwasqayku niwasqaykuman jina.

²⁸Ajinata nishawajtiykichej Señorqa uyarimuspa niwarqa: Noqa uyarini kay runas imatachus nisusqankuta. Allinta chaytaqa nishanku.

²⁹Allin kanman ajinallatapuni yuyanankoqa, yupaychanawankutaj; kamachisqasniyman jina sapa p'unchay allinta ruwananku paykuna, jinataj wawasninkupis sumaj kusisqas wiñaypaj kausakunankupaj.

³⁰Kunanqa rispa willamuy: Ripuychej jarasniykichejman, nispa.

³¹Qanrí kayllapi noqawan qhepakuy. Nisqaykitaj tukuy kamachiykunasniymanta, leyesmanta, imastachus nisqasniymantawan paykunaman yachachimunaykipaj. Paykunataj chayta ruwanankupaj ima jallp'atachus qosqaykichej chaypi.

³²Ajinaqa allinta ruwaychej Señor Diosniykichej imastachus kamachisunkichej chaykunata, ni pañaman, nitaj lloq'eman pantakuspa.

³³Qankunaqa rillaychejpuni ima ñantachus Señor Diosniykichej rikuchisunkichej chayta, allin rinasuykichejpaj, unay watastataj kausakunaykichejpaj ima jallp'atachus jap'ikunkichej chaypi.