Read Quechua Bolivia DC Bible DEUTERONOMIO 7 Bible Online

DEUTERONOMIO 7 - Quechua Bolivia DC Bible bible

DEUTERONOMIO 7

¹Señor Diosninchejqa pusasonqachej maypichus jallp'ata jap'ikunkichej chayman. Ñaupaqeykichejmanta Señor qharqonqa qanchis jatuchaj nacionesta, qankunamanta aswan jatun atiyniyojta: Hititasta, gergeseosta, amorreosta, cananeosta, fereseosta, heveosta, jebuseosta ima.

²Maypachachus Señor Diosninchej chay nacionesta qankunaman qopusonqachej, atipankichejtaj, chaypacha paykunata chinkachinkichej. Amapuni paykunawan ni ima tratota ruwankichejchu, ni khuyakullankichejpischu.

³Ama paykunawan ayllunachanakunkichejchu. Ama casarachinkichejchu qhari wawasniykichejta warmi wawasninkuwan, nitaj warmi wawasniykichejtapis qhari wawasninkuwan casarachinkichejchu.

⁴Paykunaqa wawasniykichejta Señorta qhatikunankumanta t'aqachinkuman waj dioskunata yupaychachispa. Chayta ruwankichej chayqa, Señorpa sinch'i phiñakuynenqa jamusonqanchej, ujllapi chinkachinasuykichejpaj.

⁵Kay jinata ruwankichej: Altaresninkuta thuñinkichej, yupaychana rumisninkuta, yupaychana k'ullusninkutawan p'akinkichej. Jinallataj lantisninkutapis ninawan ruphaykuchinkichej.

⁶Qankunaqa Señor Diosniykichejpa t'aqasqa ayllun kankichej. Señorqa ajllasorqachej kay jallp'a patapi tukuy ayllun ukhumanta, qankuna Señorpa k'ata munasqa ayllun kanaykichejpaj.

⁷Señorqa qankunata munakusunkichej, ajllakusunkichejtaj, mana qankuna waj nacionmanta aswan jatun nación kasqaykichejraykuchu. Qankunaqa aswan juch'uy nación kankichej tukuy nacionesmanta nisqaqa.

⁸Señorqa ajllasunkichej munakususqaykichejrayku. Chayrayku payqa Egiptopi ñak'arishajtiykichej, faraompa kamachimpi kashajtiykichej jatun atiyninwan orqhomusorqachej, ñaupa tatasniykichejman imatachus ruwapusqaykichej nisqanta junt'ananrayku.

⁹Chayrayku yachaychej ari, Señor Diosniykichejqa Pay sapallan Dios kasqanta. Yachallaychejtaj cheqan Dios kasqanta. Ima trato ruwasqantapis junt'asqanta may chhika miraykunaskama. Payta munakojkunaman, kamachiykunasnintataj junt'ajkunaman.

¹⁰Chanta payta chejnikojkunata, phirita ruwaspa chinchachin, juchasninkuman jina jasut'ispa. Payta chejnikojkunataqa usqhayllata jasut'in.

¹¹Waqaychaychej ari kamachiykunasniyta, leyesniyta, imatachus nisqasniyta ima kay p'unchaypi qankunaman, junt'anaykichejpaj chayta qoykichej.

¹²Sichus qankuna Señorpa kamachisqasninta uyarispa waqaychankichej, junt'ankichejtaj chayqa, Señor Diosniykichej qankunaman junt'allanqataj trato ruwasqanta, khuyakuynintataj rikuchisonqachej, ñaupa tatasniykichejman qosaj nisqasninman jina.

¹³Qankunata munakusonqachej, bendicisonqachej, ashkhastataj mirachisonqachej. Bendicillanqataj wawasniykichejta, cosechasniykichejta, trigosniykichejta, vinoykichejta, aceiteykichejta, waka uñasniykichejta, oveja uñasniykichejtapis, ima jallp'atachus ñaupa tatasniykichejman juraspa qosqaykichej nerqa, chaypi.

¹⁴Qankunaqa bendicisqas kankichej tukuy nacionesmanta astawan. Qankuna ukhupeqa mana ima warmipis ni qharipis kanqachu mana wawasniyojqa, nillataj uywasniykichej ukhupipis kanqachu mana uñasniyojqa.

¹⁵Señorqa qankunaj ñaupaqeykichejmanta tukuy laya onqoykunata ayqechenqa, Egiptoman apachimorqa chay jasut'iykunata, qankuna chayta yachankichej. Manachayqa chaywan enemigosniykichejta chaykunawan ñak'arichimonqa.

¹⁶Qankunaqa tukuchinkichej Señor makisniykichejman jaywasonqachej chay tukuy ayllusta. Paykunata ama khuyankichejchu, ama dioskunasninkutapis yupaychankichejchu, ama qankuna urmanaykichejpaj.

¹⁷Ichapis sonqoykichejpi yuyankichej: Kay nacionesqa noqaykumanta aswan ashkha, imaynamantataj qharqosunmanri?, nispa.

¹⁸Qankunaqa amapuni manchachikunkichejchu paykunata. Yuyarikuychej imatachus Señor Diosniykichej faraompa, tukuynin egipciospa contrantawan ruwasqanta.

¹⁹Yuyarikuychej may chhika imastachus t'ukuna ruwanasninta rikusqaykichejta, señalesta, milagrosta, jatun atiynintawan. Chay jinata qankunataqa Egiptomanta orqhomusorqachej. Chay kikillantataj Señorqa ruwanqa tukuy nacioneswan qankuna manchachisushankichej chaykunawan.

²⁰Chantapis pikunachus qankunamanta ayqekusonqachej pakakoj chaykunaman Señorqa wayronqosta apachimonqa tukukunankukama.

²¹Chayrayku paykunaj ñaupaqenkupeqa amapuni manchachikunkichejchu, imaraykuchus Señor Diosniykichejqa qankunawan kashan, Payqa jatun Dios, manchachikunataj.

²²Señor Diosniykichej pisimanta pisi chay nacionesta ñaupaqeykichejmanta qharqonqa. Qankunaqa mana paykunata ujllapi tukuchiyta atiwajchejchu, imaraykuchus sajra animalesqa miraykunkuman, qankunataj chaykunawan atipachikuwajchej.

²³Señor Diosniykichejqa chay nacionesta makisniykichejman entregasonqachej; tukuyninkutapuni tukuchenqa.

²⁴Reyesninkutapis Señorqa makisniykichejman churasonqachej. Qankuna paykunaj mentasqa kayninkuta kay jallp'a patamanta chinkachinkichej. Nitaj pipis kutichikamusonqachejchu. Ajinamanta tukuyninkuta chinkachinkichej.

²⁵Dioskunasninkuta ninapi q'olachinkichej. Ama munapayankichejchu, nitaj apakapunkichejchu chay qolqenkuta, qorinkutapis paykunapi kajta. Chaykunatachus ruwankichej chayqa, juchaman urmankichej. Chaytaj Señorpa ñaupaqempeqa manamin allinchu millay jucha kasqanrayku.

²⁶Qankunaqa amapuni wasiykichejman apakapunkichejchu ima millay kajllatapis, ama chinkachisqas kanaykichejpaj. Chay tukuy imasninkoqa chinkachinapaj nisqaña. Chayrayku chaykunasta chejninaykichej tiyan.