Read Quechua Bolivia DC Bible DEUTERONOMIO 8 Bible Online

DEUTERONOMIO 8 - Quechua Bolivia DC Bible bible

DEUTERONOMIO 8

¹Kunan qankunaman kay kamachiykunasta nisqasniyta allinta ruwaychej, ajinamanta kausakunaykichejpaj, ashkha ayllumantaj miranaykichejpaj. Ima jallp'atachus Señorqa tatasniykichejman juraspa qonanta nerqa, chay jallp'aman yaykuychej, jap'ikapuychejtaj.

²Yuyarikuychej ima ñantachus Señor Diosniykichej pusamusorqachej ch'in pampanta chayta, tawa chunka watata chay purisqaykichejpi qankunata llakichispa, pruebaman churaspataj. Ajinamanta chay imanejta imatachus yuyasqaykichejta yachanampaj, kamachiykunasnintapis ruwankichej manachus chayta.

³Ñak'arichisorqachej, yarqhachisorqachejtaj chaypis, Maná nisqa t'antata mikhuchisorqachej. Chay mikhunataqa ni qankuna, nitaj ñaupa tatasniykichejpis rejserqankichejchu. Ajinamanta Diosqa yachachisorqachej, runaqa mana t'antallawanchu kausasqanta, manachayqa Señorpa siminmanta tukuy llojsej palabraswampis kausasqanta.

⁴Chay tawa chunka watas junt'api p'achasniykichejqa mana thantakorqachu, nitaj chakisniykichejpis punkerqankuchu.

⁵Yuyarikuychej sonqoykichejpi Señor Diosniykichej k'amisqasuykichejta, imaynatachus uj runaqa wawasninta k'amiraspa uywan, ajinata.

⁶Señor Diosniykichejpa kamachiykunasninta waqaychaychej, puriychejtaj ñankunasninta, payta manchachikuspa.

⁷Señor Diosniykichejqa pusasonqachej sumaj jallp'aman, ashkha yaku wayq'osniyoj jallp'aman, vallesninmanta, orqosninmanta ima phullchimushaj juturi yakusniyojman.

⁸Chay jallp'apeqa tiyan: Grano, uvas, higos ima, chantapis granadas, olivos, aceite, misq'i ima.

⁹Chay jallp'apeqa mana yarqhaymanta ñak'arinkichejchu, ni ima pisisonqachejchu, rumisninmanta fierrota orqhonkichej, orqosninmantataj cobreta.

¹⁰Ajinata sumajta imatapis mikhuspaqa, sajsakuspatajqa Señor Diosniykichejta yupaychankichej, chay jina sumaj jallp'ata qosusqaykichejmanta.

¹¹Señor Diosniykichejta amapuni qonqankichejchu. Kamachiykunasninta junt'aychejpuni, chantá nisqasninta, leyesninta ima, mayqenkunatachus kunan kamachiykichej chayta.

¹²Maypachachus sumajta mikhuspa sajsakojtiykichej sumaj wasita ruwakuspa chaypi tiyakunaykichejpaj, chantapis maypachachus, wakasniykichej, ovejasniykichej ima mirajtin, qoriykichej qolqeykichej ima kajtin, ama jatunchakunkichejchu wapuykachaspa. Amataj qonqapunkichejchu Diosta, imaraykuchus payqa Egiptomanta orqhomusorqachej kamachillapuni kashajtiykichej.

¹⁵Señor Diosniykichejqa chay jina jatun musphay ch'in pampasta purichisorqachej, venenoyoj katari chaupista, atoj atojkunaj chaupinta. Chay ch'in pampaspeqa mana ima yakupis karqachu. Chaywampis sinch'i chhankamanta yakuta orqhospa ujyachisorqachej.

¹⁶Chay jina ch'impi Maná nisqa t'antata mikhuchisorqachej, chaytaqa tatasniykichejpis mana rejserqankuchu. Ajinamanta qankunata llakichispa, yachanampaj imaynachus kasqaykichejta, qhepamanqa allin rinasuykichejpaj.

¹⁷Ama sonqoykichejpi yuyankichejchu: Noqanchejpa atiyninchejrayku sumajta llank'asqanchejrayku kay tukuy qhapajyayqa tiyapuwanchej, nispa.

¹⁸Señor Diosniykichejmanta yuyarikunkichejpuni, yuyaspa pay jallp'ata qhapajyanaykichejpaj qosusqaykichejta. Ajinamanta junt'anqa imastachus qosqaykichej nisqanta ñaupa tatasniykichejwan tratota ruwaspa, kunan kashan ajinata.

¹⁹Sichus qankuna Señor Diosniykichejta qonqapunkichej, waj dioskunaj qhepantataj rinkichej, yupaychankichejtaj chayqa, noqa cheqamanta niykichej, kunanmantapacha chinkachisqas kankichej.

²⁰Imaynatachus Señor nacionesta ñaupaqeykichejmanta chinkachenqa, ajinallatataj qankunatapis Diosqa chinkachisonqachej, sichus payta mana kasunkichejchu chayqa.