Read Quechua Bolivia DC Bible SAN JUAN 11 Bible Online

SAN JUAN 11 - Quechua Bolivia DC Bible bible

SAN JUAN 11

¹Uj runa Lázaro sutiyoj, onqosqa kasharqa. Pay karqa Betaniamanta. Chaytaj llajtanku karqa Mariajta, ñañan Martajtawan.

²Chay onqosqa Lázaroj panan Mariaqa, uj kuti Señorta k'acha q'apaj jawinawan jawerqa, chantá chujchasninwan chakisninta ch'akicherqa.

³Lázaroj panasnintaj Jesusman willachimorqanku: Señor, munakusqaykeqa onqosqa kashan, nispa.

⁴Jesustaj chayta uyarispa nerqa: Chay onqoyqa mana wañunampajchu; astawanqa, Diosta yupaychanapaj, chay onqoynejta Diospa Churimpis jatunchasqallataj kanampaj.

⁵Jesustaj anchata munakoj, Martata, ñañanta, Lazarotapis.

⁶Lázaroj onqosqanta yachaspa, iskay p'unchaytawanraj Jesús qhepakorqa maypichus kasharqa chaypi.

⁷Chaymantataj yachachisqasninman nerqa: Uj kutitawan Judeaman risunchej.

⁸Yachachisqastaj nerqanku: Maestro, qanimpalla judiosqa rumiwan ch'anqayta munasorqanku; ujtawanchu jaqayman riyta munashallankitaj?

⁹Jesús paykunaman kuticherqa: Manachu uj p'unchayqa chunka iskayniyoj horasniyoj? P'unchaypi purejqa mana misk'anchu, imaraykuchus kay mundoj k'anchayninta rikun.

¹⁰Tutapi purejtaj misk'an, paypi k'anchay mana kasqanrayku.

¹¹Chayta niytawan yachachisqasninman nerqa: Lázaro kausaqenchejqa puñushan. Kunan risaj payta rijch'arichimoj.

¹²Chantá yachachisqasnin nerqanku: Señor, puñushallan chayqa, walejyaponqachá, nispa.

¹³Jesustaj chayta nerqa Lázaroj wañusqanmanta; yachachisqastaj yuyarqanku puñurparisqallanmanta parlasqanta.

¹⁴Chaymanta Jesús sut'incharqa Lázaro wañupusqanta.

¹⁵Nerqataj: Kusikuni qankunarayku, mana chaypi kasqaymanta, astawan noqapi creenaykichejpaj; kunan jaku watukamuna.

¹⁶Chaypachataj, Tomás, mellizo nisqa, nerqa yachachisqa masisninman: Noqanchejpis rinallataj paywan khuska wañunanchejpaj.

¹⁷Jesús chayamunampajtaj Lazaroqa tawa p'unchaytaña p'ampasqa karqa.

¹⁸Betaniataj, Jerusalén qayllapi khuskan leguapi jina karqa.

¹⁹Ashkha judiostaj jamusqanku Martata, Mariatawan watukoj, turan wañusqanrayku, paykunata sonqochayta munaspa.

²⁰Martaqa, Jesús chayamushasqanta yachaytawan, payta taripaj llojserqa; Mariataj wasipi qhepakorqa.

²¹Martataj Jesusman nerqa: Señor, kaypichus kawaj karqa chayqa, turay mana wañunmanchu karqa.

²²Chaywampis noqa yachani, tukuy imata Diosmanta mañakunki chayqa, pay qosonqa.

²³Jesustaj payman nerqa: Turayki kausarimponqa.

²⁴Martataj nerqa: Arí, noqa yachani kausarimunanta qhepa p'unchaypi, wañusqas kausarimonqa chaypacharaj.

²⁵Jesustaj payman nerqa: Noqa kani kausarimuy, kausaytaj; pichus noqapi creejqa, wañuchumpis kausanqa.

²⁶Pillapis kausashaspa noqapi creejqa, mana wiñaypaj wañonqachu. Chayta creenkichu?

²⁷Martataj nerqa: Arí, Señor, noqa creeni qan Cristo kasqaykita, Diospa Churin, kay pachaman jamusqaykita.

²⁸Chayta niytawan Marta rerqa María ñañanta wajyaj. Pakayllapi payman nerqa: Maestroqa kaypiña, wajyasunkitaj.

²⁹Mariataj chayta uyarispa, usqhayta sayariytawan Jesusta taripaj rerqa.

³⁰Jesús manaraj llajtaman yaykorqachu. Maypichus Marta tariparqa chayllapiraj kasharqa.

³¹Wasipi kajkuna judíos, Martata sonqochasharqanku. Mariata usqhayta sayariytawan llojsejta rikuspataj, nerqanku: Sepulturaman waqaj rishan, nispa. Qhepantataj rerqanku.

³²Chantá Mariaqa, maypichus Jesús kasharqa chayman chayaspa, payta rikuytawan ñaupaqenman qonqoriykukuspa, nerqa: Señor, qanchus kaypi kawaj karqa chayqa, turay mana wañunmanchu karqa.

³³Jesustaj chaypacha, Mariata waqajta rikuspa, paywan jamoj judiostapis waqajllatataj rikuspa; payqa sinch'ita phutikorqa sonqontaj wawayarqa.

³⁴Nerqataj: Maypi p'amparqankichej? Paykunataj nerqanku: Señor, jamuy ari, qhawaytaj.

³⁵Jesustaj waqarqa.

³⁶Chantá judíos nerqanku: Qhawariychej, chay jinatapuni payta munakusqa.

³⁷Wakin judiostaj nisharqanku: Kay runaqa ciegoj ñawisninta kicharerqa. Kunanqa Lázaro ama wañunampaj, manachu imatapis ruwayta atinman karqa?, nispa.

³⁸Jesús uj kutitawan, sonqompi ancha phutisqa sepulturaman qayllarqa. Chay sepulturataj chhankapi ruwasqa karqa, uj rumiwan wisq'asqataj.

³⁹Jesús nerqa: Chay rumita oqhariychej. Wañusqaj panan Martataj nerqa: Señor, asnashanña, tawa p'unchayña p'ampasqa.

⁴⁰Jesustaj payman nerqa: Manachu nerqayki, creenkichus chayqa Diospa jatun kayninta rikunki?, nispa.

⁴¹Chantá rumita oqharerqanku, maypichus wañusqa churasqa karqa chaymanta. Jesustaj janaj pachata qhawarispa nerqa: Tatáy, graciasta qoyki uyariwasqaykimanta.

⁴²Noqa yachanipuni uyariwasqaykita. Kunantaj, kay muyuyniypi kajkunaj uyarisqanta mañakorqayki, qan kachamuwasqaykita creenankupaj.

⁴³Jinata niytawantaj, sinch'ita qhaparerqa: Lázaro, llojsimuy chaymanta, nispa.

⁴⁴Wañusqa Lazarotaj llojsimorqa, makisnin, chakisnintaj vendaswan mayt'usqas, uyantaj uma pañowan qhatasqa. Jesús paykunaman nerqa: Phaskaraychej, saqeychejtaj ripunanta.

⁴⁵Chaypacha Mariata watukoj judiosmanta ashkha creerqanku Jesuspi, chay ruwasqanta rikuspa.

⁴⁶Wakin judiostaj, rispa fariseosman, Jesuspa ruwasqanta willarqanku.

⁴⁷Chaypacha kuraj sacerdotes, fariseos ima, jatun juntapi nerqanku: Imatataj ruwasunri? Kay runaqa ashkha milagrostaña ruwan, nispa.

⁴⁸Jinata ruwajta saqellasun chayqa, tukuy runas paypi creenqanku. Romanostaj jamuspa, kay templonchejta, llajtanchejta ima chinkachenqanku.

⁴⁹Paykuna ukhupeqa, Caifás, chay watapi kuraj sacerdote karqa. Paytaj nerqa: Qankuna mana imatapis yachankichejchu; manataj imatapis allinta unanchankichejchu. Noqanchejpajqa allin kanman uj runalla runakunarayku wañunan, tukuy aylluntin chinkananmantaqa.

⁵⁰

⁵¹Caifastaj mana payllamantachu kayta nerqa: Astawanqa chay watapi kuraj sacerdote kasqanrayku sut'incharqa, Jesús wañunanta ayllunrayku.

⁵²Mana chay ayllunraykullachu wañunan karqa, astawanqa, Diospa wawasnin tukuynejpi ch'eqerasqas kajkunata ujllaman tantaykunampaj.

⁵³Chay p'unchaymantapacha, tukuyninku uj yuyaylla karqanku, Jesusta wañuchinankupaj.

⁵⁴Chayrayku Jesusqa, manaña tukuypa rikusqantachu purerqa judíos ukhupi. Astawanqa pay riporqa ch'innejman, Efraín llajtaman; chaypitaj yachachisqasninwan qhepakorqa.

⁵⁵Judiospa Pascuan qayllaña karqa; ashkha runataj llajtamanta Jerusalenman wicharerqanku Pascua ñaupajta llimphuchakunankupaj.

⁵⁶Chaykama Jesusta mask'arqanku, templopi kashaspataj paykunapura ninakorqanku: Imaynataj rijch'asunkichej? Manachu Pascuaman jamunman?

⁵⁷Kuraj sacerdotestaj, fariseos ima, runasta kamacherqanku maypichus Jesús kasqanta yachaytawan paykunaman willanankuta, presochaykunankupaj.