Read Quechua Bolivia DC Bible SAN JUAN 14 Bible Online

SAN JUAN 14 - Quechua Bolivia DC Bible bible

SAN JUAN 14

¹Ama sonqoykichej phutikuchunchu, qankunaqa Diospi creenkichej, noqapipis creellaychejtaj.

²Tataypa wasimpi ashkha tiyakunas tiyan; manachus jina kanman chayqa, niykichejmanña karqa; kunanqa rishani qankunapaj uj cheqata wakichimoj.

³Ripuspaqa qankunapaj tiyakunasta wakichimusaj, chantá kutimuspa pusasqaykichej, maypichus noqa kasaj chaypi qankunapis kanaykichejpaj.

⁴Yachankichejña maymanchus rishasqayta, ñantataj rejsinkichej.

⁵Tomastaj payman nerqa: Señor, mana yachaykuchu maymanchus rishasqaykita, imaynatataj ñanta rejsisqayku?

⁶Jesús payman nerqa: Noqa ñan kani, cheqataj, kausaytaj; mana pipis Dios Tataman jamuyta atinchu, mana noqanejta kaspaqa.

⁷Noqatachus rejsiwankichejman chayqa, Tataytapis rejsillawajchejtaj. Kunanmantapacha payta rejsinkichej, rikunkichejtaj.

⁸Felipe payman nerqa: Señor, Dios Tatata rikuchiwayku, chaywanqa sonqochakusqayku.

⁹Jesús payman kuticherqa: Felipe, chhika unaytaña qankunawan kani, manachu rejsiwanki? Noqata rikuwajqa, Tataytapis rikun; imaraykutaj Dios Tatata rikuchiway nishanki?

¹⁰Manachu creenki noqa Dios Tatapi kasqayta, paytaj noqapi? Willaykichej chay palabrastaqa, mana noqallamantachu parlani; noqapi kaj Dios Tata chay ruwanastaqa ruwan.

¹¹Creewaychej noqa Dios Tatapi kasqayta, paytaj noqapi; manachayrí, creeychej ruwasqasniyrayku.

¹²Cheqamanta, cheqamanta niykichej: Noqapi creejqa, noqaj ruwasqayta paypis ruwallantaj; astawanqa kuraj ruwanastapis ruwanqa, imaraykuchus noqa Dios Tataman rishani.

¹³Imatachus Dios Tatamanta sutiypi mañakunkichej, chayta noqa ruwasaj, Dios Tata Churinnejta jatunchasqa kanampaj.

¹⁴Imallatapis sutiypi mañakunkichej, chaytaqa noqa ruwasaj.

¹⁵Munakuwankichej chayqa, kamachisqasniyta ruwaychej.

¹⁶Noqataj Dios Tatamanta mañasaj, paytaj waj sonqochajta kachamonqa, wiñaypaj qankunawan kanampaj; cheqa Espirituta, mayqentachus mundo mana jap'iyta atinchu, imaraykuchus payta mana rikunchu nitaj rejsinchu. Qankunataj payta rejsinkichejña, imaraykuchus qankunawan kashan, qankunallapitaj kanqa.

¹⁸Mana sapaykichejtachu saqesqaykichej; qankunaman jamusajpuni.

¹⁹Uj chhikamantawan mundoqa mana rikuwanqañachu; qankunarí rikuwankichej. Noqa kausasqayrayku, qankunapis kausankichej.

²⁰Chay p'unchaypeqa, Tataypi kasqayta yachankichej, qankunataj noqapi, noqataj qankunapi kasqayta.

²¹Pichus kamachisqasniyta jap'ikun, waqaychantaj, chaymin munakuwajqa. Noqata munakuwajtataj Tatay munakonqa, noqapis payta munakusaj, rikuchikusajtaj payman.

²²Judas, mana Iscariote kajchu, payman nerqa: Señor, imaraykutaj noqallaykuman rikuchikunki, manataj mundoman rikuchikunkichu?

²³Jesús payman kutichispa nerqa: Noqata munakuwajqa, palabrayta waqaychanqa; Tataytaj payta munakonqa, payman jamusqayku, paywantaj tiyakusqayku.

²⁴Mana munakuwajqa palabrasniyta mana waqaychanchu. Uyarerqankichej chay palabraqa mana noqaypatachu, astawanqa kachamuwaj Tataypata.

²⁵Qankunawan kashaspa, kay imasta nerqaykichej.

²⁶Sonqochaj Santo Espiritutaj, pitachus sutiypi Dios Tata kachamonqa; pay tukuy imata yachachisonqachej, yuyarichisonqachej taj tukuy ima nisqayta.

²⁷Sonqo samakuyta saqeykichej, sonqo samayniyta qoykichej; mana mundoj qosqanta jinachu qoykichej. Sonqoykichej ama phutikuchunchu, nitaj manchachikuchun chu.

²⁸Uyarerqankichejña qankunaman nisqayta: Rishani, kutimusajtaj qankunaman. Sichus munakuwankichejman chayqa, kusikuwajchej Dios Tataman rishani nisqaymanta, imaraykuchus pay noqamanta kuraj.

²⁹Kunan chayta willashaykichej, manaraj junt'akushajtin, junt'akojtintaj creenaykichejpaj.

³⁰Manaña qankunawan anchata parlasajchu; imaraykuchus kay mundota kamachej jamushanña, contraypeqa mana imata ruwayta atinchu.

³¹Mundo yachanan tiyan Dios Tatata munakusqayta, imatachus pay kamachiwarqa chaytapis ruwasqayta. Sayariychej, ripuna kaymanta.