Read Quechua Bolivia DC Bible SAN JUAN 15 Bible Online

SAN JUAN 15 - Quechua Bolivia DC Bible bible

SAN JUAN 15

¹Noqa cheqa uva sach'a kani, Tataytaj llank'ajqa.

²Tukuy rama noqapi kashaspa, mana poqonmanchu chayqa, Dios Tata k'utonqa. Poqoyta apaj ramatataj llimphuchanqa, astawan poqoyta apanampaj.

³Qankunaqa llimphuchasqasña kankichej, parlarqaykichej chay palabrarayku.

⁴Noqapipuni kakuychej, imaynatachus noqapis qankunapi kakuni ajinata. Imaynatachus ramaqa sapanmanta mana poqoyta atinchu, mana uva sach'api kaspaqa; ajinallatataj qankunapi mana atinkichejchu, mana noqapi kawajchej chayqa.

⁵Noqa uva sach'a kani, qankunataj ramas kankichej; pillapis noqapi kakojqa, noqataj paypi, chaymá ashkha poqoytaqa apan. Mana noqawanqa, mana imatapis ruwayta atinkichejchu.

⁶Mana noqapi kakojqa, rama jina jawaman wijch'usqa kanqa, ch'akiponqataj. Chay ramasta tantaspataj ninaman enqhaykonqanku, q'olanqataj.

⁷Noqapichus kakuwajchej, palabrasniytaj qankunapi kanman chayqa, tukuy munasqaykichejta mañakuychej, jap'inkichejtaj.

⁸Qankuna ashkha poqoyta apajtiykichej, Tatayqa jatunchasqa kanqa; ajinamanta yachachisqasniy kankichej.

⁹Imaynatachus Dios Tata noqata munakuwan, ajinallatataj noqapis qankunata munakuykichej, munakuyniypitaj kakuychej.

¹⁰Kamachisqasniytachus waqaychankichej chayqa, munakuyniypi kakunkichej; imaynatachus noqapis Tataypa kamachisqasninta waqaychani, munakuynimpitaj kashani ajinata.

¹¹Kay imasta niykichej, kusikuyniy qankunapi kanampaj, kusikuyniykichejtaj junt'akunampaj.

¹²Kaymin kamachiyneyqa: Qankuna purajmanta munanakuychej, imaynatachus noqa munakuykichej ajinata.

¹³Mana pipis astawan jatun munakuyniyoj kanchu, kausaqesninrayku kausayninta qojmanta nisqaqa.

¹⁴Qankunaqa kausaqesniy kankichej, kamachisqasniytachus ruwankichej chayqa.

¹⁵Mana kamachistachu sutichasqaykichej, imaraykuchus kamacheqa mana yachanchu patronnin imatachus ruwasqanta. Noqa kausaqesta sutichaykichej, imaraykuchus Tataypa tukuy ima niwasqanta rejsichiykichej.

¹⁶Mana qankunachu ajllawarqankichej, astawanqa noqa ajllarqaykichej; churarqaykichejtaj willaj rinaykichejpaj, poqoytataj apanaykichejpaj. Chay poqoyniykichejtaj kakunallampajpuni; tukuy imata sutiypi Dios Tatamanta mañakusqaykichejta taj, pay qosonqachej.

¹⁷Kayta kamachiykichej: Purajmanta munanakunaykichejta.

¹⁸Mundo chejnisunkichej chayqa, yachaychej, noqataraj qankunamanta ñaupajta chejniwasqanta.

¹⁹Mundojtachus kawajchej chayqa, mundoqa paypata kajkunata munakunman. Kunantaj mana mundojtachu kankichej, astawanqa noqa mundopi kajkunamanta ajllarqaykichej. Chayrayku mundoqa chejnisunkichej.

²⁰Yuyarikuychej palabrata qankunaman nisqayta: Kamacheqa patronninmanta mana aswan kurajchu. Noqatachus qhatiykachawarqanku chayqa, qankunatapis qhatiykachasonqachej. Palabraytachus waqaychanqanku chayrí, qankunajtapis waqaychallanqankutaj.

²¹Chay tukuy imasta ruwasonqachej sutiyrayku, imaraykuchus kachamuwajniyta mana rejsinkuchu.

²²Noqachus mana jamuyman karqa, manataj paykunaman parlayman karqa chayqa, mana juchayoj kankuman; kunantaj juchankuta mana pakayta atinkuchu.

²³Noqata chejniwajqa, Tataytapis chejnillantaj.

²⁴Manachus paykuna ukhupi, ni pejpa ruwasqanta ruwaymanchu karqa chayqa, mana juchayojchu kankuman karqa. Kunanqa ruwasqasniyta rikunkuña; chaywampis noqata Tataytapis chejniwayku.

²⁵Kayqa ajina, leyninkupi escribisqa kashan chay palabra junt'akunampaj: Mana kajmanta chejniwanku.

²⁶Maypachachus sonqochaj jamonqa, pitachus noqa Tataymanta kachamusaj, chay cheqa Espiritoqa Dios Tatamanta jamun, paytaj noqamanta willanqa.

²⁷Qankunapis noqamanta willankichej imaraykuchus qallariymantapacha noqawan karqankichej.