Read Quechua Bolivia DC Bible SAN JUAN 19 Bible Online

SAN JUAN 19 - Quechua Bolivia DC Bible bible

SAN JUAN 19

¹Ajinamanta Pilatoqa kamachispa, Jesusta jasut'icherqa.

²Soldadostaj, khishkasmanta uj pilluta simp'aspa, Jesuspa umanman churaykorqanku, uj puka p'achawantaj p'achallicherqanku.

³Nerqankutaj: Kausachun judiospa Reyninku! Chaymantataj Jesuspa uyampi laq'arqanku.

⁴Pilato ujtawan llojsimuspa, paykunaman nerqa: Qhawaychej, kay runata jawaman pusamuykichej, yachanaykichejpaj mana ima juchatapis paypi tarisqayta.

⁵Jesustaj llojsimorqa, umampi khishka pilluyoj, puka p'achayojtaj. Pilatotaj nerqa: Kayqa chay runa.

⁶Chaypacha kuraj sacerdotes, kamachis ima, Jesusta rikuytawan qhaparerqanku: Cruzpi chakatay, cruzpi chakatay!, nispa. Pilatotaj nerqa: Qankuna jap'ikapuychej, chakataychejtaj; paypeqa mana tarinichu ima juchatapis.

⁷Judiostaj kuticherqanku: Noqaykojta leyniyku tiyan. Chayman jinaqa pay wañunampuni tiyan; Diospa Churin kani nisqanrayku.

⁸Chay nisqankuta uyarispataj, Pilatoqa astawan mancharikorqa.

⁹Pretorioman kutiykuspataj Jesusta nerqa: Maymanta qan kanki?, nispa. Jesusta mana imata kuticherqachu.

¹⁰Chaypacha Pilato payman nerqa: Manachu imatapis niwanki? Manachu noqa atiyniyoj kasqayta yachanki kacharichisunaypaj, chayrí cruzpi chakatachisunaypajpis?

¹¹Jesús kuticherqa: Mana ima atiyniykipis noqaj contraypi kanmanchu, manachus Dios qosunkiman chayqa. Chayrayku noqata qanman entregawajqa, aswan jatun juchayoj.

¹²Chaymantapacha Pilatoqa Jesusta kachariyta munasharqa; judiostaj qhaparerqanku: Chay runatachus kacharinki chayqa, mana Cesarpa amigonchu kanki; pillapis rey ruwakojqa, Cesarpa contrampi.

¹³Chayta uyariytawan Pilatoqa, jawaman Jesusta pusarqa. Paytaj juzgadopi tiyaykukorqa, chay Enlosado nisqa cheqapi, hebreopitaj Gabata nisqa.

¹⁴Pascua ñaupaj p'unchay karqa, chaupi p'unchay jina. Pilatotaj judiosman nerqa: Kayqa reyniykichej!

¹⁵Paykunataj qhaparerqanku: Amaña, amaña, cruzpi chakatallayña!, nispa. Pilatotaj paykunaman nerqa: Reyniykichejtachu cruzpi chakatasaj? Kuraj sacerdotestaj kuticherqanku: Mana waj reyniyku kanchu kamachejmanta astawanqa.

¹⁶Ajinata paykunaman Jesusta entregarqa chakatanankupaj; paykunataj Jesusta jap'ispa pusarqanku.

¹⁷Jesustaj llojserqa cruznin lijrarisqa, T'ojlu pata nisqa cheqaman. Chaytaj hebreo parlaypi Gólgota nisqa karqa.

¹⁸Chaypitaj Jesusta cruzpi chakatarqanku, iskay runastawan, ujninta pañanman, ujnintataj lloq'enman, Jesustataj chaupipi.

¹⁹Pilatotaj cruzpi uj escribisqata churarqa, chay escribisqataj nisharqa: JESÚS NAZARENO JUDIOSPA REYNIN.

²⁰Ashkha judiostaj chay escribisqata leesharqanku; imaraykuchus llajta qayllapi Jesusta chakatarqanku. Chay escribisqataj churasqa karqa hebreopi, latimpi, griegopi ima.

²¹Judiospa kuraj sacerdotesninku Pilatoman nerqanku: Ama escribiychu judiospa Reynin nispa; chaytaqa paylla nerqa: Judiospa Reynin kani, nispa.

²²Pilatotaj paykunaman kuticherqa: Escribisqayqa escribisqaña, nispa.

²³Jesusta chakataytawan soldadosqa p'achasninta tawaman llik'ispa rak'inakorqanku ujtakama. Túnica p'achantapis jap'ikaporqanku; chaytaj patamanta urakama t'ipasqalla karqa, manataj sirasqachu.

²⁴Soldadostaj ninakorqanku: Kaytaqa ama llik'inachu; walej kanman suerteta choqananchej, yachananchejpaj mayqempajchus kananta. Chaytaj karqa Escriturapi escribisqa junt'akunampaj, mayqenchus kayta nishan: P'achasniyta rak'inakorqanku, p'achayraykutaj suerteta choqarqanku. Soldadostaj ajinata ruwarqanku.

²⁵Jesuspa cruznin qayllapitaj kasharqanku maman, mamampa ñañan María, Cleofaspa warmin, María Magdalena ima.

²⁶Jesustaj mamanta rikuspa, munakusqan yachachisqawan qayllampi sayashajtin, mamanman nerqa: Kayqa wawayki.

²⁷Chantá yachachisqamanñataj nerqa: Kayqa mamayki. Chaymantapacha chay yachachisqa, Mariata wasinman pusakaporqa.

²⁸Chay qhepata Jesús tukuy ima tukuychasqaña kasqanta yachaspa, Escritura junt'akunampaj nerqa: Ch'akishawan.

²⁹Chaypitaj kasharqa uj yuru, vinagrewan junt'a. Chayman esponjata chhapuspa, uj soqosoman wataykuspataj Jesuspa siminman qayllaykucherqanku.

³⁰Jesustaj vinagreta llamiytawan nerqa: Tukuy ima tukusqaña. Umanta k'umuykuspataj, espiritunta Dios Tataman qoporqa.

³¹Chaypacha, Pascua ñaupaj día kasqanrayku, judiosqa mana munarqankuchu aya cruzpi warkhurayanankuta, samakuna p'unchaypi. Paykunapaj ancha jatun p'unchay karqa. Chayrayku Pilatomanta mañakorqanku kamachinanta chakatasqaspa chakisninta p'akiranankuta, chaymantataj uraykuchinankuta.

³²Soldadostaj jamuspa, ñaupaj kajpata piernasninta p'akirarqanku, ajinallatataj ujnin kajpatapis; pikunachus Jesuswan chakatasqas karqanku chaykunajta.

³³Jesusman qayllaykuspataj, payta tariparqanku wañusqataña, chayrayku piernasninta manaña p'akerqankuchu.

³⁴Ujnin soldadotaj lanzawan Jesuspa wajtannin chaynejta t'ojsispa kicharerqa, kikimpachataj yawar, yaku ima llojsimorqa.

³⁵Chayta rikojqa willan. Chay willasqantaj cheqapuni; pay yachan cheqata nisqanta, qankunapis creenaykichejpaj.

³⁶Chay imas ruwakorqa Escritura junt'akunampaj: Mana ima tullumpis p'akisqachu kanqa.

³⁷Escriturapi wajnejpi nillantaj: Rikonqanku t'ojsisqa kajta.

³⁸Chay tukuy ima qhepata, Arimatea llajtayoj José pichus judiosta manchachikusqanrayku pakayllamanta Jesuspa yachachisqan karqa chay, Jesuspa cuerponta mañarqa apakapunampaj. Pilatotaj mana jark'arqachu. Chayrayku José jamuspa Jesuspa cuerponta apakaporqa.

³⁹Nicodemopis jamullarqataj, pichus ñaupajta tuta jamuspa Jesusta watukorqa, chay. Paytaj mirrata aloestawan chajrusqata apamorqa pachaj librasta jina.

⁴⁰Paykunataj Jesuspa cuerponta jap'ikapuytawan, chay chajrusqa k'acha q'apaj perfumewan churaykuspa, sabanaswan mayt'uykorqanku, judiospa p'ampananku usunkuman jina.

⁴¹Jesusta chakatarqanku chay cheqapi uj huerta karqa. Chaypitaj uj mosoj p'ampana karqa. Chaypi mana pipis p'ampasqarajchu karqa.

⁴²Chayman Jesusta churarqanku, judiospa Pascuampaj wakichina kasqanrayku, imaraykuchus chay aya p'ampanaqa qayllapi karqa.