Read Quechua Bolivia DC Bible SAN JUAN 20 Bible Online

SAN JUAN 20 - Quechua Bolivia DC Bible bible

SAN JUAN 20

¹Semanaj ñaupaj p'unchayninta, María Magdalena tutamanta sepulturaman rerqa laqhallaraj kashajtin. Sepulturamanta rumitataj tanqarparisqata rikorqa.

²Chaypacha usqhayta correspa Simón Pedroman jamorqa, Jesuspa munakusqan yachachisqamanwan. Paykunamantaj nerqa: Señorta sepulturamanta apakapusqanku, manataj yachaykuchu maymanchus churasqankuta.

³Pedrotaj chay yachachisqawan llojsispa, sepulturaman rerqanku.

⁴Iskayninkutaj correrqanku; chay uj yachachisqataj aswan usqhayta correspa Pedrota atiparqa, ñaupajtataj sepulturaman chayarqa.

⁵K'umuykuspa qhawaykorqa, sabanastataj churasqasta rikorqa, manataj yaykorqachu.

⁶Qhepanta Simón Pedro chayarqa. Paytaj sepulturaman yaykorqa. Paypis rikullarqataj sabanasta chaypi churasqasta.

⁷Jesuspa uman qhatasqa karqa chay pañotapis, mana sabanaswan khuskatachu rikorqa, astawanqa wajnejpi lluchhurpayasqata.

⁸Chantá ñaupajta sepulturaman chayarqa chay yachachisqapis, yaykullarqataj; chay imasta rikuspataj creerqa.

⁹Manaraj entienderqankuchu Escriturata, Jesús wañusqamanta kausarimunan kasqanta.

¹⁰Yachachisqastaj wasisninkuman kutiporqanku.

¹¹Mariataj jawapi, sepultura qayllapi waqasharqa. Waqan waqan k'umuykuspataj sepultura ukhuta qhawaykorqa.

¹²Rikorqataj yuraj p'achayoj iskay angelesta tiyashajta; maypichus Jesuspa cuerpon churasqa karqa chaypi; ujninta umannejpi, ujnintataj chakinnejpi.

¹³Angelestaj payman nerqanku: Warmi, imaraykutaj waqashanki? Mariataj kuticherqa: Señorniyta apakapusqanku, manataj yachanichu maymanchus churasqankuta.

¹⁴Chayta niytawan qhepaman kutirispa Jesusta rikorqa, manataj yacharqachu pay Jesús kasqanta.

¹⁵Jesustaj payman nerqa: Warmi, imaraykutaj waqashanki? Pitá mask'ashankiri? Mariataj huertata qhawaj runa kasqanta yuyaspa nerqa: Tatáy, qan aparqanki chayqa, willaway maymanchus churasqaykita, apakapunaypaj.

¹⁶Jesús payman nerqa: María! Paytaj qhepaman kutirikuspa nerqa: Raboni! Chayqa, Maestro niyta munan.

¹⁷Jesús payman nerqa: Ama llankhawaychu, imaraykuchus manaraj Tatayman wicharishanichu; astawanqa hermanosniyman willamuy: Tatayman, Tataykichejman, Diosniyman, Diosniykichejmantaj wicharishani.

¹⁸María Magdalenataj rispa, yachachisqasman willarqa Señorta rikusqanta payllataj kay imasta nisqantawan.

¹⁹Chay kikin semanaj ñaupaj kaj p'unchayninta, tutayaytaña, punkus wisq'asqaña kasharqa, maypichus yachachisqas tantakorqanku judiosta manchachikuspa. Chaypacha Jesús paykunaman jamorqa, chaupinkupi sayaykuspataj nerqa: Sonqo tiyakuy qankunawan kachun.

²⁰Chayta niytawan, makisninta, wajtanninta ima rikuchikorqa. Yachachisqastaj kusikorqanku Jesusta rikuspa.

²¹Chaypachataj Jesús ujtawan paykunaman nerqa: Sonqo tiyakuy qankunawan kachun. Imaynatachus Dios Tata noqata kachamuwarqa, ajinallatataj qankunatapis kachaykichej.

²²Chayta niytawan phukorqa, nerqataj: Santo Espirituta jap'iychej.

²³Pikunaj juchasnintachus perdonankichej chayqa, paykunaj juchasninku perdonasqas kanqanku. Pikunajtatajchus qhepachinkichej chayqa, qhepachisqallataj kanqa.

²⁴Tomasqa, chunka iskayniyoj yachachisqasninmanta ujnin karqa, mellizo nisqa. Paytaj mana paykunawanchu kasharqa, maypachachus Jesús jamorqa chaypacha.

²⁵Yachachisqastaj payman nerqanku: Señorta rikuyku. Tomastaj paykunaman nerqa: Sichus makisnimpi clavospa jusk'usqanta mana rikusaj chayqa, mana creesajchu. Chantá manatajchus dedoyta clavospa jusk'usqanman sat'iykusaj, nillataj wajtannimpi lanzawan t'ojsisqaman makiyta churaykusaj chaypis, manapuni creesajchu.

²⁶Pusaj p'unchayninman, yachachisqas ujtawan wasipi tantakorqanku, Tomaspis paykunawan kasharqa. Punkus wisq'asqa kashajtin, Jesús jamuspa chaupinkupi rikhurerqa, nerqataj: Sonqo tiyakuy qankunawan kachun, nispa.

²⁷Kikimpacha Tomasman nerqa: Dedoykita kayman churay, makisniytataj qhawariy, makiykita apamuy, churaykuytaj ukhuyman; amataj iskayrayaychu, astawanqa creey.

²⁸Tomastaj kutichispa nerqa: Señorníy, Diosníy!

²⁹Jesús payman nerqa: Tomás, rikuwasqaykirayku creenki; kusikuyniyoj kanku mana rikuwaspa creejkunaqa.

³⁰Jesusqa waj ashkha milagrosta ruwarqa, yachachisqasnimpa ñaupaqempi, kay libropitaj kunanqa mana escribisqaschu kashanku.

³¹Kay imastaj escribisqas karqanku creenaykichejpaj Jesusqa Cristo Diospa Churin kasqanta; paypitaj creespa kausayniyoj kanaykichejpaj.