Read Quechua Bolivia DC Bible SAN JUAN 21 Bible Online

SAN JUAN 21 - Quechua Bolivia DC Bible bible

SAN JUAN 21

¹Chay qhepata, Jesús ujtawan yachachisqasninman rikhurerqa, Tiberias qocha qayllapi; ajinamanta pay rejsichikorqa.

²Chay yachachisqastaj tantasqas kasharqanku: Simón Pedro, Tomás, mellizo nisqa, Galileapi kaj Canamanta Natanael, Zebedeoj churisnin, waj iskay yachachisqaswan ima.

³Simón Pedro paykunaman nerqa: Challwasta jap'imusaj. Paykunataj nerqanku: Noqaykupis qanwan risqayku, nispa. Rispataj uj boteman wicharerqanku; chay tutantintaj mana uj challwatapis jap'erqankuchu.

⁴Sut'iyashajtinña Jesús qocha qayllapi rikhurerqa; yachachisqasnintaj mana yacharqankuchu pay Jesús kasqanta.

⁵Jesustaj paykunaman nerqa: Waynas, imallapis kapusunkichejchu mikhunapaj? Paykunataj nerqanku: Mana kapuwaykuchu.

⁶Jesús nillarqataj paykunaman: Ch'ipata botej pañannejman choqaykuychej, chaypi jap'inkichej. Jinatataj choqarqanku. Chantá ch'ipata orqhoyta mana aterqankuchu, ashkha challwaswan junt'a kasqanrayku.

⁷Chaypacha, Jesuspa munakusqan yachachisqaqa, Pedroman nerqa: Señorqa, nispa. Simón Pedrotaj, Señor kasqanta uyarispa, pata p'achanta churaykukorqa, imaraykuchus q'alalla kasharqa; qochamantaj phinkiykorqa.

⁸Wakin yachachisqastaj botepi jamorqanku, ch'ipa junt'a challwasta apamuspa, imaraykuchus ch'aki jallp'amanqa pachaj metros jinallaña kasharqa.

⁹Jallp'aman uraykuspataj, rikorqanku nina brasasta; chay patapitaj uj challwata, t'antatawan churasqata.

¹⁰Jesustaj paykunaman nerqa: Wakin challwasta apamuychej, kunan jap'isqaykichejmanta.

¹¹Simón Pedro boteman wicharispa, jallp'aman ch'ipata orqhorqa, jatuchaj challwaswan junt'ata. Chaypitaj pachaj phishqa chunka kinsayoj challwas karqanku. Chay jina challwaswampis, ch'ipaqa mana llik'ikorqachu.

¹²Jesustaj yachachisqasman nerqa: Jamuychej mikhurikuychej. Manataj mayqenninkupis taporqankuchu: Pitaj kanki?, nispa. Yachasqanku Señorpuni kasqanta.

¹³Jesustaj paykunaman qayllaytawan, t'antata oqharispa jaywarqa, jinallatataj challwatapis.

¹⁴Kaywantaj kinsa kutiña karqa, Jesús wañusqasmanta kausarimuspa, yachachisqasninman rikhurisqan.

¹⁵Mikhuyta tukusqankutawan, Jesús nerqa Simón Pedroman: Simón, Jonaspa churin, munakuwankichu paykunamanta astawan? Pedrotaj kuticherqa: Arí Señor, yachanki munakususqayta. Jesustaj nerqa: Corderosniyta michipuway.

¹⁶Jesús ujtawan Pedroman nerqa: Simón, Jonaspa churin, munakuwankichu? Pedrotaj kuticherqa: Arí Señor, qan yachanki munakususqayta. Jesús nillarqataj: Ovejasniyta michipuway.

¹⁷Kinsa kaj kutipi nillarqataj: Simón, Jonaspa churin, munakuwankichu? Pedrotaj llakikorqa, kinsa kutikama munakuwankichu?, nisqanmanta. Kuticherqataj: Señor, qan tukuy imata yachanki, munakususqaytapis yachanki. Jesustaj payman nerqa: Ovejasniyta michipuway.

¹⁸Cheqamanta, cheqamanta niyki: Waynallaraj kashaspaqa, chumpillikoj kanki, munayniykiman jinataj purej kanki; machuña kaspataj makisniykita aysarinki, wajtaj chumpichisunki, maymanchus mana munasqaykimantaj pusasonqa.

¹⁹Chayta nerqa yachachiyta munaspa ima wañuywanchus Pedroqa Diosta yupaychanan kasqanta. Chayta niytawantaj, qhepayta jamuy, nerqa.

²⁰Pedro qhepaman kutirikuspa rikorqa Jesuspa munakusqan yachachisqa jamushajta. Payllataj cenapi Jesusman atiykukuspa nerqa: Pitaj jap'ichisonqa?

²¹Pedrotaj chay yachachisqata rikuytawan Jesusman nerqa: Señor, imataj kanqa paymantari?

²²Jesús kuticherqa: Sichus munani kutimunaykama pay qhepakunanta chayqa, ima dakusunki qanmanri? Qanqa qhepayta jamuy, nispa.

²³Chay nisqata hermanos ukhupi willakorqa jaqay yachachisqa mana wañunan kasqanta. Jesustaj mana imatapis nerqachu, mana wañonqachu nispa. Astawanqa nerqa: Sichus kutimunaykama pay qhepakunanta munani chayqa, imá dakusunki qanmanri?

²⁴Kay yachachisqa chay imasta willarqa, escriberqataj. Yachanchejtaj willasqasnenqa cheqapuni kasqanta.

²⁵Jesuspa ruwasqasnintaj aswan ashkharaj tiyan. Chaykunachus ujmanta uj escribikunman chayqa, yuyani mundontimpipis mana campo kanmanchu, chay escribisqa librosta churanapaj. Amén.