Read Quechua Bolivia DC Bible SAN JUAN 5 Bible Online

SAN JUAN 5 - Quechua Bolivia DC Bible bible

SAN JUAN 5

¹Kay imas qhepata judiospa qhochukun karqa; Jesustaj Jerusalenman kutiporqa.

²Jerusalempi, oveja punku nisqa qayllapi, uj estanque karqa; hebreo parlaypi Betzata sutiyoj; chay estanquetaj phishqa punkuyoj karqa.

³Chay punkunejpi ashkha onqosqas, pampapi sirisqas kasharqanku ciegos, suchus, tunuyasqa onqoyniyoj ima. [Paykunataj yaku kuyurinanta suyaj kanku.

⁴Unaymanta unay, uj ángel uraykamuspa yakuta kuyurichej; ajinapi pichus ñaupajta estanqueman yaykojqa, ima onqoyllamantapis thañikapoj.]

⁵Chaypitaj uj runa kinsa chunka pusajniyoj watataña onqosqa karqa.

⁶Jesustaj sirisqata rikuspa, unayña chay onqoyniyoj kasqanta yachaspataj, taporqa: Munankichu thañikapuyta?, nispa.

⁷Onqosqataj kuticherqa: Señor, mana piniypis tiyapuwanchu, estanquepi yaku kuyurejtin ichuykunawampaj. Sapa kuti yaykuyta munashajtiy, wajllapuni ñaupajta yaykun.

⁸Jesustaj payman nerqa: Sayarikuy, puñunaykita oqhariytawan ripuy.

⁹Chay kikimpacha, chay runaqa thañikaporqa, puñunanta oqharispataj puriyta qallarerqa. Chaytaj samarina p'unchaypi karqa.

¹⁰Chayraykutaj judiosqa thañisqa runaman nerqanku: Kunan samarina p'unchay kasqanrayku, mana atinkichu puñunaykita apakapuyta.

¹¹Paytaj kuticherqa: Pichus thañichiwaj niwarqa: Puñunaykita oqharikapuy, ripuytaj, nispa.

¹²Chaypacha taporqanku: Pitaj chay karqa, puñunaykita oqharikuspa ripuy, nisojri?

¹³Chay thañisqa runataj mana yacharqachu mayqenchus kasqanta. Jesustaj chaypajqa riporqaña, imaraykuchus ashkha runa chaypi kasharqa.

¹⁴Jesustaj chay runata templopi tariparqa, nerqataj: Thañisqaña kanki; amaña astawan juchallikuychu, amaña imapis astawan jamusunampaj.

¹⁵Chay runataj ripuspa judiosman willamorqa, payta thañichejqa Jesús kasqanta.

¹⁶Chayrayku, judiosqa Jesusta qhatiykacharqanku wañuchinankupaj, chay imasta samarina p'unchaypi ruwasqanrayku.

¹⁷Jesustaj kutichispa nerqa: Tatayqa kunankama ruwashan, noqapis ruwashallanitaj.

¹⁸Chaymanta judiosqa Jesusta wañuchiytapuni munasharqanku, samakuna p'unchayta mana waqaychasqanrayku, astawanqa, Diosqa tatay nisqanrayku paywan kikinchakuspa.

¹⁹Chaypacha Jesús kutichispa nerqa: Cheqamanta, cheqamanta niykichej: Diospa Churenqa, sapallanmanta mana imatapis ruwayta atinchu. Astawanqa imatachus Dios Tatata ruwajta rikun, kikillantataj Chureqa ruwan.

²⁰Dios Tataqa Churita munakun, chayrayku imatachus ruwan chay tukuyta Churiman rikuchin. Aswan jatun ruwanastaraj rikuchenqa, qankunataj chayta rikuspa t'ukunkichej.

²¹Imaynatachus Dios Tataqa wañusqasta kausarichispa, kausayta paykunaman qon, ajinallatataj Churipis pikunamanchá qoyta munan, chaykunaman kausayta qon.

²²Dios Tataqa mana pitapis juzganchu; imaraykuchus Churiman tukuy atiyta qorqa, pay juzganampaj; Churita tukuy runas yupaychanankupaj, imaynatachus Dios Tatata yupaychanku, ajinata. Pillapis Churita mana yupaychajqa, nillataj kachamoj Tatantapis yupaychanchu.

²³

²⁴Cheqamanta, cheqamanta niykichej: Pichá parlasqayta allinta uyarin, kachamuwaj Tataytapis creen chayqa, wiñay kausayniyoj; manataj juicio p'unchaypi juchachasqachu kanqa, astawanqa wañuymanta kausayman yaykun.

²⁵Cheqamanta, cheqamanta niykichej: Horaqa chayamushanña, kunantaj chay hora, wañusqas uyarenqanku Diospa Churimpa wajyasqanta, uyarejkunataj kausanqanku.

²⁶Imaynatachus Dios Tata pay kikimpi kausayniyoj, ajinallatataj Churinmampis qorqa pay jina kausayniyoj kanampaj.

²⁷Juzganampajpis atiyta qollarqataj, Runaj Churin kasqanrayku.

²⁸Ama kay nisqaymanta t'ukuychejchu. Hora chayamonqa. Chaypachataj tukuy sepulturaspi kajkuna Runaj Churimpa parlasqanta uyarenqanku.

²⁹Allinta ruwajkunaqa, kausanankupaj jatarimonqanku; sajrata ruwajkunataj, juchachasqa kanankupaj kausarimonqanku.

³⁰Jesustaj nerqa: Mana imatapis noqallamanta ruwanichu, uyarisqayman jina noqa juzgani; juzgasqaytaj cheqampuni, imaraykuchus mana noqaj munayniytachu mask'ani; astawanqa kachamuwaj Tataypa munaynillanta.

³¹Noqa kikiymantachus willakuyman chayqa, willasqayqa mana cheqachu kanman.

³²Noqamanta willajqa wajmin, yachanitaj chay willasqanqa cheqa kasqanta.

³³Qankuna kacharqankichej Juanta tapojta, paytaj cheqa kajta paykunaman willarqa.

³⁴Runaj willasqantaqa mana jap'ikunichu; kayta niykichej, qankuna salvasqas kanaykichejpaj.

³⁵Juanqa uj k'anchana jina larwasharqa, k'ancharqataj; qankunataj chay k'anchaynimpi pisi tiempota kusikuyta munarqankichej.

³⁶Juampa willasqanmanta aswan sumaj willajniy tiyan; Dios Tata ruwanasta qowarqa junt'anaypaj, chaykunata ruwashani; chay ruwasqasniytaj willashanku Dios Tata kachamuwasqanta.

³⁷Kachamuwajniy Dios Tatapis noqamanta willallarqataj, qankunataj mana jayk'ajpis parlamusqanta uyarerqankichejchu, nitaj rijch'aynintapis rikorqankichejchu.

³⁸Diospa palabrantaj mana qankunapichu kakushan, kachamusqan Churipi mana creesqaykichejrayku.

³⁹Escriturasta allinta qhawaychej, imaraykuchus qankunamanqa rijch'asunkichej, Escriturasnejta wiñay kausayta tarinaykichej kasqanta. Chay Escriturastaj noqamanta willashanku.

⁴⁰Qankuna kausayta tarinaykichejpajqa, noqaman jamuyta mana munankichejchu.

⁴¹Runakuna jatumpi qhawanawankutaqa, mana munanichu.

⁴²Astawanqa, noqa yachani Diospa munakuynenqa qankunapi mana kasqanta.

⁴³Noqa Tataypa sutimpi jamorqani, qankunataj qhesachawankichej. Waj runatajchus paypa sutimpi chayamusunkichejman chayqa; paytaqa mana qhesachawajchejchu.

⁴⁴Imaynatataj creeyta atiwajchej, qankunapuralla jatumpi qhawanakushaspa, manachu mask'ankichej uj k'ata Diosmanta jatumpi qhawasqa kaytaqa?

⁴⁵Ama yuyaychejchu noqa Tataypa ñaupaqempi qankunata ch'ataykunayta; qankunata ch'ataykojqa waj kashan, chaytaj Moisés. Paypitaj suyashankichej.

⁴⁶Moisespichus creewajchej chayqa, noqapipis creellawajchejtaj; imaraykuchus noqamanta pay escriberqa.

⁴⁷Moisespa escribisqantachus mana creenkichej chayqa, imaynapitaj parlasqasniyta creewajchejri?