Read Quechua Bolivia DC Bible HECHOS 11 Bible Online

HECHOS 11 - Quechua Bolivia DC Bible bible

HECHOS 11

¹Judeapi kajkuna apóstoles, hermanoswan ima uyarerqanku mana judíos kajkunapis Diospa palabranta jap'isqankuta.

²Pedro Jerusalenman wicharisqantawan, circuncisionmanta kajkuna judíos paywan churanakorqanku.

³Paykunataj nerqanku: Imaraykutaj qan mana circuncidasqa runaspa wasinman rinki, paykunawantaj mikhumunkiri?

⁴Chayantataj Pedroqa paykunaman willarqa, cantollamanta imaynachus kasqanta.

⁵Jope llajtapi kashaspa, Diosmanta mañakushajtiy, uj mosqoy jina jap'iwarqa. Chay mosqoypitaj rikorqani janaj pachamanta uraykamushajta uj t'impita, jatun llijllaman rijch'akojta. Tawantin cantosninmanta watasqata. Chay t'impitaj ñaupaqeyman uraykamorqa.

⁶T'impita allinta qhawaykuspataj, chay ukhupi rikorqani, kay jallp'api kaj tawa chakisniyoj animalesta, phiña monte animalesta, katarista, p'isqosta ima.

⁷Uj parlamojtataj uyarerqani, niwajta: Sayariy, Pedro, wañuchiy, mikhuytaj.

⁸Noqataj nerqani: Mana Señor, imaraykuchus ni jayk'aj simiyman yaykorqachu mana allin kaj, nitaj ch'ichi kajpis.

⁹Janaj pachamanta uj kutitawan nimuwarqa: Imatachus Dios llimphuchasqantaqa, ama ch'ichi niychu, nispa.

¹⁰Kayta kinsa kutita nimorqa, chaymantataj chay t'impeqa janaj pachaman kutiporqa.

¹¹Chay jinallapi kinsa kachas chayamorqanku Cesareamanta, maypichus kasharqani chay wasiman, noqata mask'awaspa.

¹²Santo Espiritutaj kamachiwarqa ama iskayrayaspa paykunawan rinayta. Kay sojta wauqespis noqawan rillarqankutaj Cesareaman, tukuyniykutaj Cornelioj wasinman yaykorqayku.

¹³Paytaj willawarqayku imaynatachus uj angelta sayashajta rikusqanta, pichus payman nisqa: Jopeman kachay wajyamojta Simón Pedro nisqata.

¹⁴Paytaj nisonqa imaynatachus qan tukuy familiaykiwan salvasqas kanaykichejta.

¹⁵Parlayta qallarejtiy, Santo Espíritu paykunaman uraykamorqa, imaynatachus qallariypi noqanchejman uraykamorqa, ajinallatataj.

¹⁶Chaypachataj Señorpa nisqanta yuyarikorqani: Cheqamanta Juanqa yakuwan bautizarqa, qankunataj Santo Espirituwan bautizasqas kankichej.

¹⁷Sichus Dios paykunaman qorqa noqanchejman jina, chay kikin Santo Espirituta Señor Jesucristopi creesqanchejrayku chayqa, pitaj noqa karqani Diosta jark'anaypajri?

¹⁸Chayta uyarispataj hermanosqa ch'inyakaporqanku. Diostataj yupaycharqanku, nispa: Kayman jina, gentilespis juchata saqejtinkoqa Dios wiñay kausayta qollanqantaj.

¹⁹Estebanta wañuchiytawan waj creejkunatañataj ñak'arichiyta qallarerqanku. Chayrayku ch'eqerakorqanku Feniciaman, Chipreman, Antioquiaman ima. Evangeliomantataj willarqanku judiosllaman, manataj pimampis astawanqa.

²⁰Wakin creejkunataj, Chipremanta, Cirenemantawan karqanku. Antioquiaman chayaspataj griegosmampis willarqanku Señor Jesucristomanta.

²¹Diospa atiynin paykunawan karqa, chayrayku ashkhas creespa Señorman kutirikorqanku.

²²Kay tukuy imas Jerusalén iglesiapi yachakorqa. Chayrayku Bernabeta kacharqanku Antioquiakama.

²³Paytaj jaqayman chayaspa rikorqa Dios bendicionninwan yanapasqanta. Chayrayku kusikorqa, paykunatataj umacharqa Señor Jesucristowan tukuy sonqo kakunankuta.

²⁴Bernabeqa sumaj runa karqa, Santo Espirituwantaj junt'asqa. Chayrayku ashkha runas Señorpi creerqanku.

²⁵Chay qhepatataj Bernabeqa, Tarso llajtaman rerqa Saulota mask'aspa. Payta tariytawantaj Antioquiaman pusamorqa.

²⁶Chay iglesiapitaj uj wata junt'ata karqanku, ashkha runasman yachachispa. Chaypacha Antioquiapi qallarerqanku creejkunata, cristianos nispa, sutichayta.

²⁷Chaypachataj, Jerusalenmanta profetas chayamorqanku Antioquiaman.

²⁸Ujnintaj Agabo sutiyoj sayarispa, Santo Espíritoj yuyaychasqan kaspa, nerqa: Manchay jatun yarqhay jamonqa tukuy jallp'aman, nispa. Chay nisqantaj junt'akorqa Claudio kamachishajtin.

²⁹Creejkuna taj nerqanku, sapa uj kapusqanman jina qolqeta tantaspa, apachinankuta Judeapi kaj hermanosman. Ajinata ruwaspa chay qolqeta apacherqanku Bernabewan, Saulowan ima iglesiapi ancianosman.