Read Quechua Bolivia DC Bible HECHOS 12 Bible Online

HECHOS 12 - Quechua Bolivia DC Bible bible

HECHOS 12

¹Chaypachataj rey Herodesqa ñak'arichiyta qallarerqa iglesiamanta wakinkunata.

²Ajinamanta Juampa wauqen Santiagota wañucherqa espadawan.

³Chay ruwasqan, judiospaj sumaj kasqanta rikuspa, Pedrotañataj jap'icherqa wisq'achinampaj. Chaypachataj karqa mana levadurayoj t'anta mikhuna p'unchaykuna.

⁴Herodestaj Pedrota jap'ichispa carcelman wisq'acherqa. Chaypitaj tawa t'aqa soldados Pedrota qhawasharqanku. Sapa t'aqapitaj tawa soldados karqanku. Herodesqa munarqa Pedrota runaspa ñaupaqenman orqhomuyta fiesta pasayta.

⁵Ajinamanta Pedroqa carcelpi qhawasqa kasharqa, iglesiamanta kajkunataj mana sayk'uspa paypaj Diosmanta mañapusharqanku.

⁶Herodes orqhochimunan kashajtin, chay tuta Pedro iskay soldadospa chaupimpi puñusharqa, iskay cadenaswan watasqa. Waj soldadostaj cárcel punkuta qhawasharqanku.

⁷Chayllaman Señorpa angelnin rikhurimorqa, chay ukhumantaj k'anchay junt'aykorqa. Angeltaj Pedrota wajtanninmanta kuyurichispa rijch'aricherqa, nerqataj: Usqhayta jatariy, nispa. Chay kikimpi cadenas makisninmanta urmararqa.

⁸Chaymanta ángel nillarqataj: Chumpiykita mat'iykukuy, ujut'asniykitapis churakuy, nispa. Pedrotaj ajinata ruwarqa, angeltaj payman nerqa: Kunanqa qhataykukuspa noqata qhatiway.

⁹Pedrotaj angelpa qhepanta carcelmanta llojsishaspa, mana yacharqachu angelpa ruwasqan cheqachus manachus kasqanta. Payqa yuyasharqa mosqoypi jina rikusqanta.

¹⁰Ajinamanta pasarqanku ñaupaj t'aqa soldadosta, jinallatataj iskay kaj t'aqatapis fierro punkuman chayanankukama. Chay punkutaj calleman llojsejqa, payllamanta kicharikorqa. Llojsispataj uj calleta rishaspa, angelqa Pedromanta t'aqakaporqa.

¹¹Pedrotaj yuyayninman kutirispa nerqa: Kunanqa cheqamanta yachani, Señor angelninta kachamusqanta, Herodespa makinmanta qhechunawampaj; judiospa sajra imasta ruwayta munawasqankumantawan.

¹²Chayta yuyaspataj Marcos nisqa Juampa maman Maríaj wasinman rerqa. Chaypitaj ashkha creejkuna tantakuspa Diosmanta mañakusharqanku.

¹³Pedro calle punkuta takajtin, uj sipas Rode sutiyoj llojserqa, pichus kasqanta yachaj.

¹⁴Rodetaj Pedroj parlayninta rejsispa, kusiywan punkuta mana kicharispalla, kutiykuspa willarqa: Pedro punkupi kashan, nispa.

¹⁵Paykunataj nerqanku: Mana yuyayniykipichu kashanki. Paytaj cheqapuni kasqanta nerqa. Chaywampis paykunaqa Pedroj angelninchari nerqanku.

¹⁶Chaykamataj Pedroqa punkuta takashallarqapuni. Chaymantaña punkuta kicharerqanku, payta rikuspataj mayta kusikorqanku.

¹⁷Pedrotaj makinwan ch'inyachispa, paykunaman willarqa imaynatachus Señor carcelmanta orqhomusqanta. Nerqataj: Chay tukuy imasmanta Santiagoman willamuychej, hermanosman ima, nispa. Chaymanta llojsispataj waj cheqaman riporqa.

¹⁸Q'ayantin paqarintaj, soldados manchayta ch'ajwasharqanku Pedro chinkasqanmanta.

¹⁹Herodestaj tukuynejta mask'acherqa, nitaj tarerqankuchu. Soldadostañataj allinta tapuchispa, kamacherqa paykunata wañuchinankupaj. Chaymantataj Herodesqa Judeamanta Cesareaman uraykorqa, chaypitaj qhepakorqa.

²⁰Kamachej Herodestaj phiñasqa kasharqa tiriospaj, sidoniospaj ima. Chayrayku paykunaqa uj yuyaylla tantaykukuspa Herodeswan parlaj rerqanku. Ñaupajtaqa Herodespa wasimpi, kamachejnin Blastoman qolqeta lluk'iykorqanku, paynejta allinyakunankupaj Herodeswan paykunaqa Herodespa llajtanmanta mikhunata jap'isqankurayku.

²¹Herodestaj wajyachisqan p'unchaypi, kamachinan p'achawan p'achallisqa tronompi tiyaykukuspa paykunaman parlarqa.

²²Runastaj qhaparerqanku: Diospa parlasqan kayqa, mana runajtachu.

²³Chay kikimpitaj Señorpa angelnin Herodesta nanaykucherqa, Diosta mana jatunchasqanmanta. Khuruspa mikhusqantaj wañorqa.

²⁴Ajinamanta Señorpa palabran wiñaspa tukuynejpi willakorqa.

²⁵Bernabé, Saulowan ima, ruwanankuta tukuspa, Jerusalenmanta kutiporqanku Antioquiaman, Marcos nisqa Juan pusarisqa.