Read Quechua Bolivia DC Bible HECHOS 13 Bible Online

HECHOS 13 - Quechua Bolivia DC Bible bible

HECHOS 13

¹Chaymanta Antioquía iglesiapi karqanku profetas, yachachejkuna ima. Paykunataj karqanku: Bernabé, Yana nisqa Simón, Cirenemanta Lucio, Manaén pichus rey Herodespa ñuñoj masin karqa, Saulo ima.

²Uj p'unchay ayunaspa Señorta yupaychashajtinku, Santo Espíritu paykunaman nerqa: Bernabeta, Saulotawan t'aqapuwaychej, imapajchus ajllarqani chayta ruwanankupaj.

³Paykunataj ayunaspa Diosmanta mañakorqanku. Bernabeman Saulomanwan makisninkuta churaykuspa kacharpayarqanku.

⁴Chay qhepata Bernabé, Saulowan, Santo Espíritoj kamachisqanta kasuspa Seleuciaman rerqanku. Chaymantataj botepi rispa Chipre churuman chayarqanku.

⁵Salaminaman chayaspataj, judiospa sinagogasninkupi Diospa palabranta willarqanku. Juan Marcostataj pusarqanku paykunata yanapanampaj.

⁶Chay tukuynin churupi purispataj Pafoskama chayarqanku. Chaypitaj tinkukorqanku Barjesús sutiyoj layqawan. Payqa uj llulla profeta judío karqa.

⁷Chay layqataj kamachej Sergio Paulowan kasharqa. Payqa yachayniyoj runa karqa. Bernabeta, Saulotawan wajyacherqa, Diospa palabranta uyariyta munaspa.

⁸Chay layqaqa griegopi Elimas nisqa, apostoleswan churanakorqa. Chay jallp'api kamachejta jark'arqa ama creenampaj.

⁹Chaymantataj Saulo, Pablo sutiyoj, Santo Espirituwan junt'a kaspa, layqata sinch'ita qhawarerqa.

¹⁰Nerqataj: Ya, llullaj atipasqan, tukuy laya pantachinaswan junt'asqa, supaypa wawan! Tukuy allin kajpa enemigon! Mayk'ajkamataj Señorpa cheqan ñanninta q'ewichinkiri?

¹¹Kunanqa Señorpa makin pataykipi kanqa, ciegoyanki, nitaj intej k'anchaynintapis unayta rikunkichu. Kikimpachataj Elimas laqhapi, tutayajpitaj rikhurerqa. Muyuykachaspataj mask'arqa pillapis makinmanta pusanampaj.

¹²Sergio Paulo kamachejtaj chayta rikuspa creerqa, maytataj t'ukorqa Señorpa yachachiyninmanta.

¹³Pablotaj paywan kajkunawan Pafosmanta botepi Pergeman rerqanku. Pergeqa Panfiliapi karqa. Juan Marcostaj, paykunata saqerparispa kutiporqa Jerusalenman.

¹⁴Pablo, Bernabewan Pergemanta rerqanku Pisidiapi kaj Antioquiaman. Samakuna p'unchaypi sinagogaman yaykuspataj tiyarikorqanku.

¹⁵Moisespa leyninta profetaspa escribisqanta ima leespaña, sinagogapi kamachejkuna nicherqanku iskaynin apostolesman: Hermanos, sichus ima palabrallapis kapusunkichej kay runasta yanapanaykichejpaj chayqa, kunan parlayta atinkichej.

¹⁶Pablotaj sayarispa, makinwan ch'inyacherqa, nerqataj: Israel runakuna, Diosta manchachikojkuna ima, uyariychej.

¹⁷Kay aylloj Diosnin, ñaupa tatasninchejta ajllarqa. Egiptopi waj llajtayoj jina tiyashajtinku, paykunata jatunyacherqa. Diostaj atiyninwan Egiptomanta orqhomorqa.

¹⁸Tawa chunka watata jina ch'in pampapi kashajtinku, imaymana kausayniyoj kashajtinkupis, Diosqa pacienciarqa paykunata.

¹⁹Canaán jallp'apitaj, qanchis laya ayllusta tukuchispa, chay jallp'asta israelitasman qoporqa, tawa pachaj phishqa chunkayoj watasta jina. Kamachejkunatataj Dios churarqa, profeta Samuelpa p'unchayninkama.

²⁰

²¹Chaymanta israelitasqa, uj reyta mañarqanku. Diostaj Saulta, Cispa churinta qorqa, Benjamimpa ayllunmanta. Paytaj tawa chunka watata israelitasta kamacherqa.

²²Rey Saulta orqhospataj, Davidta churarqa rey kanampaj. Paymantataj Dios nerqa: Isaejpa churin Davidta, sonqoypa munasqanman jina tarini, tukuy kamachisqaytataj pay ruwanqa.

²³Davidpa mirayninmanta nisqanman jina Dios jataricherqa Jesusta, Israelpa Salvajnin kanampaj.

²⁴Manaraj Jesús jamushajtin, Juan Bautista israelitasman willarqa, Diosman kutirikuy bautismomanta.

²⁵Juantaj wañunan qayllapiña nerqa: Pi kasqaytataj qankuna yuyankichejri? Mana suyasqaykichej chaychu kani. Payqa noqaj qhepayta jamushan, manataj phaskaranaypaj jinachu kani chakisninmanta ujut'asnillantapis.

²⁶Hermanos, Abrahampa ayllunmanta kajkuna, qankuna ukhupi Diosta manchachikojkuna ima. Qankunaman Dios apachimusunkichej kay salvaj palabrata.

²⁷Jerusalempi tiyakojkuna, kamachejninkunapis, mana yacharqankuchu pichus Jesús kasqanta, nitaj rejserqankuchu profetaspa escribisqankuta, sapa samakuna p'unchaypi leeshaspapis. Ajinamanta Jesusta juchachaspa, profetaspa nisqanta junt'arqanku.

²⁸Mana ni ima juchata wañuchinankupaj jina paypi tarispataj, Pilatomanta mañarqanku kamachinanta Jesusta wañuchinankuta.

²⁹Paymanta tukuy ima escribisqa kajta junt'aspaña, cruzmanta uraykuchimuspa Jesusta p'amparqanku.

³⁰Diostaj Jesusta wañusqakunamanta kausarichimorqa.

³¹Ashkha p'unchaykunataraj rikuchikorqa, Galileamanta paywan khuska Jerusalenkama wicharejkunaman. Kunan paykuna Jesusmanta willanku runakunaman.

³²Ajinata noqaykoqa, evangeliomanta qankunaman willashayku, imatachus ñaupa tatasninchejman Dios qosqaykichej nisqanta.

³³Israelitakunamanta kasqaykichejrayku, Diosqa palabranta junt'an Jesusta kausarichimuspa, imaynachus iskay kaj salmopipis escribisqa kashan: Qan Churiy kanki; noqa kunan qanta yumayki.

³⁴Wañusqasmanta kausarichimuspa, manaña jayk'ajpis ismuyman kutiykunampaj, Diosqa kay jinata nerqa: Qankunaman qosqaykichej, jaqay ajllasqa cheqa kaj khuyakuyta, mayqentachus Davidman qosaj nerqani, chayta.

³⁵Chayrayku waj salmopi nillantaj: Mana qanqa saqenkichu ajllasqayki ismunanta.

³⁶Davidqa, kausanankama Diospa munayninman jina runa masisninta yanaparqa. Wañojtintaj, ñaupa tatasnimpa qayllampi p'amparqanku, ismorqataj.

³⁷Diospa kausarichimusqan Jesustaj mana ismorqachu.

³⁸Hermanos, yachaychej Jesusnejta juchas pampachasqa kasqanta. Chaytataj qankunaman willayku.

³⁹Chay tukuy imasmanta Moisespa leynimpi, cheqan runapaj mana rejsisqas kayta aterqankichejchu; kunanqa chaykunamanta Jesuspi creejqa salvasqa kashan.

⁴⁰Kunanqa, sumajta qhawarikuychej ari, ama qankunapi profetaspa nisqanku junt'akunampaj:

⁴¹Qhawakuychej qhesachajkuna, t'ukuychej, chinkariychejtaj. Noqa Diosmin uj ruwanata ruwasaj p'unchayniykichejpi. Chay ruwasqayta pillapis willasunkichejman chayqa, qankunaqa mana creewajchejchu.

⁴²Pablo, Bernabewan judiospa sinagoganmanta llojsimushajtinkutaj, mañarqanku ujtawan kutimunankuta qhepan samakuna p'unchaypi, paykunawan astawan parlanankupaj chay imasmanta.

⁴³Sinagogapi tantakojkuna ripojtinkutaj, Pablota Bernabetawan qhatikorqanku ashkha judíos, chantá judiospa yachachiyninta qhatejkuna ima. Apostolestaj paykunata yuyaycharqanku, ama sayk'uspa Diospa khuyakuynimpi kakunankupaj.

⁴⁴Qhepan samakuna p'unchaypitaj, yaqha tukuy llajtantin tantakamorqanku Diospa palabranta uyarinankupaj.

⁴⁵Judiostaj chay chhika runata rikuspa Pablowan chhoqonakorqanku; churanakuytataj qallarerqanku paypaj sajrata rimaspa.

⁴⁶Pablowan Bernabewan mana manchachikuspa, paykunaman nerqanku: Diospa palabranta qankunamanraj willanayku karqa. Qankunataj qhesachankichej, nitaj wiñay kausaytapis jap'iyta munankichejchu. Chayrayku kunanqa waj llajtayoj runasman ripusqayku.

⁴⁷Señorqa kay jinata kamachiwarqayku: Waj llajtayoj runaspa k'anchaynin kanaykipaj churayki, tukuy kay pachapi runasman salvacionmanta willanaykipaj.

⁴⁸Chayta uyarispataj, waj llajtayoj runasqa, kusikuspa Señorpa palabranta jatuncharqanku. Wiñay kausaypaj kajkunaqa Señorpi creerqanku.

⁴⁹Ajinamanta, Señorpa palabranqa tukuy chay jallp'api yachakorqa.

⁵⁰Judiostaj ch'ajwata oqharerqanku Diosta yupaychaj warmiswan parlaspa, llajtapi kamachej runaswan ima. Paykunataj qallarerqanku Pablota, Bernabetawan ñak'arichiyta, jallp'ankumantataj qharqorqanku.

⁵¹Apostolestaj paykunaj contrampi, chakisninkumanta jallp'ata thalarakuspa, Iconioman riporqanku.

⁵²Creejkunataj, kusiywan junt'asqa karqanku, Santo Espirituwantaj.