Read Quechua Bolivia DC Bible HECHOS 16 Bible Online

HECHOS 16 - Quechua Bolivia DC Bible bible

HECHOS 16

¹Chaymantataj Pablo Silaswan chayarqa Derbeman, Listramanwan. Chaypitaj uj yachachisqa Timoteo karqa; mamanqa creej judía, tatantaj griego.

²Listrapi Iconiopi tiyakoj hermanosqa, allinta parlaj kanku Timoteomanta.

³Pablotaj Timoteota pusayta munarqa, judiosta mana phiñachayta munaspataj circuncidarqa, imaraykuchus chay llajtapi judiosqa yacharqanku Timoteoj tatan griego kasqanta.

⁴Llajtamanta llajta rispataj, willarqanku imatachus Jerusalempi apóstoles, ancianoswan kamachisqankuta. Hermanostataj kamacherqanku chaykunata junt'anankuta.

⁵Ajinamanta iglesiasqa creesqankupi kallpachakorqanku, sapa p'unchaytaj astawan ashkhayarqanku.

⁶Chay qhepatataj paykuna Frigianta, Galacianta rishajtinku Santo Espíritu paykunata jark'arqa Asiapi ama evangeliomanta willanankuta.

⁷Misiaman chayaspataj Bitiniaman yaykuyta munarqanku, Jesuspa Espirituntaj mana rinankuta saqerqachu.

⁸Ajinamanta rerqanku Misianejta, uraykorqankutaj Troasman.

⁹Chay tutataj Pabloqa mosqoypi jina rikorqa uj macedonio runata. Paypa ñaupaqempi sayaykuspa mañakorqa: Jamuriy ari Macedoniaman yanaparinawaykupaj, nispa.

¹⁰Chay mosqoypi jina Pablo rikusqanrayku, wakichikorqaykupacha Macedoniaman rinaykupaj. Chay mosqoynejta yacharqayku Dios wajyasqanta paykunaman evangeliota willanaykupaj.

¹¹Troasmantataj yakunejta botepi cheqanta rerqayku Samotracia churukama, q'ayantintaj Neapolisman chayarqayku.

¹²Chaymantataj rerqayku Romaj kamachiynimpi kaj Filipos llajtaman, mayqenchus Macedoniapi aswan jatun llajta karqa. Chaypitaj qhepakorqayku uj pisi p'unchaykunata.

¹³Samakuna p'unchaytaj, llajtamanta llojsispa mayu cantoman rerqayku, Diosmanta mañakuna kaj chayman. Tiyaykukuspataj evangeliomanta willarqayku chay tantasqa warmisman.

¹⁴Ujnin warmitaj Lidia sutiyoj karqa, Tiatira llajtamanta. Payqa qhatoj may sumaj puka kulli generosta, Diostataj yupaychaj. Señortaj Lidiaj sonqonta kicharerqa, Pabloj nisqanta uyarinampaj.

¹⁵Lidiataj bautizachikorqa familianwan ima. Paytaj niwarqayku: Sichus qankuna yuyankichej, tukuy sonqo Señorpi creesqaykuta chayqa, wasiyman yaykuspa karikuychej, nispa. Ajinamanta qhepachiwarqayku.

¹⁶Uj p'unchaytaj Diosmanta mañakoj rishajtiyku, uj kamachi sipas taripamuwarqayku. Payqa sajra layqa espirituyoj kaspa adivinaj. Ashkha qolqeta qoj patronesninman, runaspa suertenta qhawaspa.

¹⁷Chay sipastaj qhatiwarqayku, Pablota, noqaykutawan. Qhaparqachaspataj nerqa: Kay runasqa patapi kaj Diospa kamachisnin kanku. Paykuna willasunkichej salvación ñanmanta.

¹⁸Ajinallatapuni ashkha p'unchaykunata qhaparisharqa. Pablotaj chaymanta phiñakorqa, kutirikuspataj sipaspi kashaj sajra espirituta nerqa: Jesucristoj sutimpi kamachiyki paymanta llojsinaykita. Chay kikimpachataj espiritoqa sipasmanta llojserqa.

¹⁹Sipaspa patronesnin manaña qolqeta jap'inanta yachaspa, Pablota Silastawan jap'iykorqanku, pusarqankutaj plazapi kamachejkunaman.

²⁰Juecesman pusaykuspataj nerqanku: Kay runasqa, judíos kashaspa, llajtanchejta ch'ajwachishanku.

²¹Waj jina yachachiykunatataj yachachishanku. Noqanchej romanosqa mana jap'iyta atisunmanchu, nitaj ruwaytapis.

²²Runastaj, apostolespa contranta oqharikorqanku. Juecestaj kamacherqanku Pabloj p'achasninta Silaspatawan lluch'uspa, paykunata jasut'inankuta.

²³Manchayta jasut'ispataj carcelman wisq'acherqanku. Carcelerotataj sumajta kamacherqanku qhawananta.

²⁴Carcelerotaj chay kamachiyta kasuspa, aswan ukhuman wisq'aykorqa, chakisninkutataj cepoman mat'iykorqa.

²⁵Chaupi tutata jina Pablowan Silaswan Diosmanta mañakuspa takisharqanku. Waj wisq'asqaspis chay takisqankuta uyarisharqanku.

²⁶Ujllata jallp'a sinch'ita kuyurerqa. Carcelpa cimientosnintataj thalarerqa, kikimpachataj punkus kicharikorqanku. Tukuy presosmantataj cadenas phaskakorqanku.

²⁷Carcelerotaj rijch'arerqa, punkusta kichasqasta rikuspataj, presos ayqesqankuta yuyaspa, espadanta orqhospa wañuchikuyta munarqa.

²⁸Pablotaj sinch'ita qhaparerqa: Ama imanakuychu, tukuyniyku kaypi kakushayku, nispa.

²⁹Chaymantataj carceleroqa k'anchayta mañaspa yaykorqa, kharkatitispataj Pablojpa, Silaspa ñaupaqenkuman wijch'uykukorqa.

³⁰Jawaman orqhomuspataj, paykunata taporqa: Wiraqochis, imatataj ruwasaj salvasqa kanaypajri?

³¹Paykunataj kuticherqanku: Señor Jesuspi creey, qantaj salvasqa kanki familiaykiwan ima.

³²Paykunataj willarqanku Señorpa palabranta payman, tukuy wasimpi kajkunamanwan.

³³Carceleroqa, chay tutapacha paykunata pusaspa nanasqasninkuta mayllarqa. Chay kikimpachataj pay, tukuy familian ima bautizachikorqanku.

³⁴Pablota Silastawan wasinman pusaspataj mikhunata jaywarqa. Paytaj familianwan kusikorqa Diospi creesqankurayku.

³⁵Q'ayantin paqarintaj jueces kacharqanku soldadosta, Pablota Silastawan kacharinankupaj.

³⁶Carcelerotaj Pabloman willarqa: Jueces nichimunku qankuna kacharisqa kanaykichejta. Kunanqa sonqo tiyasqas ripuychej.

³⁷Pablotaj soldadosman nerqa: Noqaykutaqa, manaraj juchachaspalla, tukuypa rikunanta jasut'ichiwarqayku, manapis Roma llajtayojchu kaykuman jina, wisq'achiwarqaykutaj. Kunanqa, pakayllamantachu kachariwasqayku? Mana jinachu kanqa. Paykuna kikin jamuchunku orqhonawaykupaj.

³⁸Soldadostaj kay nisqankuta juecesman willamorqanku. Paykunataj, Pablowan Silaswan, romanos kasqankuta yachaspa mancharerqanku.

³⁹Juecestaj carcelman rispa, nerqanku Pablota Silastawan ama phiñakunankuta pantasqankurayku. Carcelmanta orqhospataj mañarqanku llajtamanta ripunankuta.

⁴⁰Pablowan Silaswantaj, carcelmanta llojsispa, Lidiaj wasinman rerqanku. Hermanosta rikuspataj, paykunata sonqochaspa riporqanku.