Read Quechua Bolivia DC Bible HECHOS 17 Bible Online

HECHOS 17 - Quechua Bolivia DC Bible bible

HECHOS 17

¹Chaymantataj Pablo Silaswan rerqanku Anfípolis llajtanejta, Apolonianta Tesalonicaman chayanankukama judiospa sinagogan karqa chayman.

²Pablotaj usunman jina, sinagogaman yaykorqa. Chaypitaj kinsa samakuna p'unchayta karqa Diospa palabranta yachachispa.

³Paykunamantaj sut'inta rikucherqa Cristo ñak'arinampuni kasqanta, wañusqamantataj kausarimpunanta. Pabloqa nillarqataj: Kaymin chay Jesusqa, pimantachus noqa willaykichej Cristo kasqanta.

⁴Paykunamanta wakinkunataj creerqanku, tantakorqankutaj Pablowan Silaswan. Ajinata ashkha griegos Diosta yupaychajkuna, ashkha atiyniyoj warmis ima, creellarqankutaj.

⁵Chaymanta judiosqa chhoqonakorqanku. Chayrayku tantamorqanku qhellasmanta sajra runasta, paykunawan ch'ajwata ruwaspa, llajtantinta oqharichinankupaj. Jasompa wasinmantaj ch'ajwaspa rerqanku Pablota Silastawan mask'aspa, orqhomuspataj runasman entreganankupaj.

⁶Paykunata mana tarispataj, Jasonta wakin hermanostawan pusarqanku llajta kamachejkunaman. Qhaparispataj nerqanku: Kaykunaqa tukuynejpi runasta ch'ajwachinku. Kunanqa kaymanñataj jamusqanku.

⁷Jasontaj paykunata wasimpi jap'ikushan. Kay tukuyninkutaj mana kasunkuchu Cesarpa kamachisqasninta. Paykunaqa ninku waj rey kasqanta Jesús sutiyoj.

⁸Chayta uyarispataj, tukuy llajtantin kamachejkunawan ch'ajwacherqanku.

⁹Jasonmanta, wajkunamantawan fianzata jap'ispa kachariporqanku.

¹⁰Chay tutapacha, hermanosqa kacharpayarqanku Pablota Silastawan Bereaman. Jaqayman chayaspataj, judiospa sinagoganman yaykorqanku.

¹¹Chaykunataj aswan k'achas karqanku Tesalonicapi tiyakojkunamanta nisqaqa, imaraykuchus Diospa palabranta tukuy sonqo yachakorqanku. Sapa p'unchaytaj Escriturata allinta qhawaspa, mask'arqanku cheqachus manachus kasqanta Pabloj yachachisqan.

¹²Ajinamanta ashkhas creerqanku, Grecia llajtayoj allimpaj qhawasqa warmis, ashkha qharis ima.

¹³Tesalonicapi kaj judiosqa yacharqanku Bereamampis Pablo chayaspa Diospa palabranta willasqanta. Chayrayku paykunaqa riytawan runaspa yuyayninta pejtuspa, ch'ajwata oqharillarqankutaj.

¹⁴Chay kikimpachataj hermanosqa Pablota kacharpayarqanku, qochaj cantonman rinampaj. Silaswan Timoteowantaj Bereapi qhepakorqanku.

¹⁵Pablowan rejkunataj, Atenaskama payta pusarqanku. Chaymantataj Bereaman kutiriporqanku, Pabloj kamachiyninta apaspa Silasman, Timoteomanwan. Paykunata wajyachisharqa usqhayta paywan tantakunankupaj.

¹⁶Atenaspi, Silasta Timoteotawan suyashajtintaj, Pabloj sonqonqa t'impurerqa, chay llajta tukuy laya lantikunawan junt'a kasqanta rikuspa.

¹⁷Chayrayku judioswan sinagogapi churanakoj, Diosta yupaychaj runaswan ima. Kikillantataj sapa p'unchay churanakoj plazaman tantakamojkunawampis.

¹⁸Wakin yachaysapa runas, epicureoswan, estoicoswan Pablowan churanakullajtaj kanku. Ujkuna nerqanku: Imatataj niyta munan kay thautejri? Wakintaj nerqanku: Kayqa waj mosoj dioskunamanta parlajman rijch'akun. Chayta nisharqanku imaraykuchus Pabloqa willasharqa Jesusmanta, kausarimuymantawan.

¹⁹Pablota jap'ispataj, Areópago juntaman pusarqanku. Chaypitaj taporqanku: Atiykumanchu yachayta imachus kasqanta chay mosoj yachachiyniyki?

²⁰Wakin parlasqaykitaqa manapuni ni jayk'aj uyarerqaykuchu. Chayrayku yachayta munayku, imatachus kaykuna niyta munasqanta.

²¹Atenasmanta kajkunaqa waj llajtamanta chaypi tiyakojkunapis, mosoj imasllamanta parlayta uyariytapis munaj kanku.

²²Pablotaj, Areópago juntapi sayaykuspa, nerqa: Atenas llajtayoj runas, tukuy imapi rikuykichej dioskunata tukuy sonqo yupaychasqaykichejta.

²³Llajtaykichejpi puriykachashaspaqa, rikuni lanti yupaychanaykichejta. Uj altartapis tarini kay jina escribisqayojta: “Mana rejsisqa diosman”. Chay Diosmanta, pitachus mana rejsispalla yupaychankichej, noqaqa willaykichej.

²⁴Kay pachata, tukuy imasnintawan ruwaj Diosqa paymin, janaj pachajta, kay pachajtapis Señornin. Manataj payqa runaj ruwasqan templopichu tiyakun.

²⁵Nitaj Diosqa imapipis runaj yanapayninta suyanchu. Paytaj tukuyman kausayta qon, samayta, tukuy imastawan.

²⁶Paytaj, uj runallamanta tukuy laya runata miracherqa, tukuy jallp'api paykuna kausanankupaj. Chayta wakicherqa, ima p'unchaykunapichus, may jallp'apichus kausanankuta, ajinamanta runakuna Diosta mask'anankupaj. Ichapis mask'aykachasqankupi llankharispa Diosta tarinkuman. Cheqamanta Diosqa mana karupichu kashan sapa ujninchejmanta.

²⁸Diospi kausanchej, kuyurinchej, kanchejtaj. Wakin poetasniykichejpis kay jinata nerqanku: Noqanchejpis paypa mirayninmanta kanchej, nispa.

²⁹Diospa mirayninmanta kanchej chayqa, mana yuyananchejchu tiyan Diosqa rijch'akusqanta qori, qolqe, rumi lantiman ima. Chaykunaqa, runaj yuyayninman jinalla ruwasqas kanku.

³⁰Ñaupajta runakuna mana Diosta rejsiyta atisqankuta, Diosqa qonqayman churarqa. Kunantajrí, Dios tukuynejpi runakunata wajyan payman kutirinankuta.

³¹Diosqa, uj p'unchayta wakicherqa, chaypitaj cheqa kayninman jina, tukuy kay pachapi runakunata juzganqa chay kachamusqan runanejta. Diostaj chayta tukuyman rikuchinña chay runata wañuymanta kausarichimuspa.

³²Wañusqakunaj kausarimunanku manta uyarispataj, wakinkuna Pablota asipayarqanku, wajkunataj nerqanku: Waj kutillapiña kaykunamantaqa uyarisqayku, nispa.

³³Chaymantataj Pablo llojsiporqa paykunaj chaupinkumanta.

³⁴Wakin runas Pabloj nisqanta creerqanku. Paykuna ukhupi karqa Dionisio, Areópago juntamanta; kallarqataj Dámaris sutiyoj warmi, wajkuna ima.