Read Quechua Bolivia DC Bible HECHOS 2 Bible Online

HECHOS 2 - Quechua Bolivia DC Bible bible

HECHOS 2

¹Pentecostés nisqa p'unchay chayamojtintaj, tukuy tantasqas uj cheqapi kasharqanku.

²Ujllata cielomanta uj sonaj uyarikorqa, sinch'itapis wayramushanman jina. Wasi ukhumantaj junt'aykorqa, maypichus paykuna kasharqanku chayman.

³Paykunaman nina larway rak'isqa qallus jina rikhurimorqanku, tiyaykorqankutaj sapa ujpa patanman.

⁴Tukuyninkutaj Santo Espirituwan junt'asqas karqanku. Waj parlaykunapitaj parlayta qallarerqanku, Santo Espíritu atiyta qosqanman jina.

⁵Jerusalén llajtapi kasharqanku Diosta yupaychaj judíos, mundopi kaj tukuy llajtasmanta jamuspa.

⁶Sonajtintaj runas tantakamorqanku, t'ukorqankutaj apostolesta sapa ujninku parlayninkupi parlajta uyarispa.

⁷Runakunataj manchaytapuni muspharaspa t'ukusharqanku, nerqankutaj: Manachu kay tukuy parlajkunaqa Galileamanta kanku?

⁸Imaynamantataj chantá uyarishanchej jinata parlajta, sapa ujninchejpa parlayninchejpiri?

⁹Noqanchej ukhupi runakunaqa, kashanku Partiamanta, Mediamanta, Elamanta, Mesopotamiamanta, Judeamanta, Capadociamanta, Pontomanta, Asiamanta, Frigiamanta, Panfiliamanta, Egiptomanta, Libiamanta cirene qayllapi kajkuna. Kallankutaj Roma llajtamanta jamojkuna. Wakenqa judíos kanku, wakin judiospa yachachiyninta qhatinku.

¹⁰

¹¹Jamullankutaj Cretamanta, Arabiamantapis. Kunantaj tukuyninchej paykunata uyarishanchej parlayninchejpi, Diospa may jatuchaj ruwasqasninmanta willasqankuta.

¹²Tukuyninkutaj mayta t'ukuspa musphasharqanku, tapunakusharqankutaj, ima niytataj kay munanri?, nispa.

¹³Wajkunataj asipayaspa nerqanku: Kaykunaqa machasqas kashanku, nispa.

¹⁴Chaymantataj Pedro chunka ujniyoj apostoleswan sayarispa, jatunmanta parlarqa runasman: Judíos, Jerusalempi tukuy tiyakojkuna ima, kayta qankuna yachanaykichej tiyan, imatachus nisqayta allinta uyariwaychej.

¹⁵Kay runasqa mana machasqaschu kashanku, imaynatachus qankuna yuyashankichej jina; imaraykuchus tutamanta isq'on horallaraj.

¹⁶Kaywanqa profeta Joelpa nisqan junt'akushan. Payqa kay jinata nerqa:

¹⁷Dios nin imaschus qhepa p'unchaykunapi kananmanta. Tukuy runakunaman Espirituyta chayachisaj. Churisniykichejtaj, ususisniykichej pis Diospa sutimpi parlanqanku. Waynakunataj mosqoypi jina rikonqanku. Machu runasniykichejtaj mosqoykunata mosqoykonqanku.

¹⁸Chay p'unchaykunapi Espirituymanta chayachisaj qhari kamachisniyman, ajinallatataj warmi kamachisniymampis. Diosmantataj profetas jina willanqanku.

¹⁹Janaj pachapi t'ukunata ruwasaj. Kay pachapitaj milagrosta ruwasaj: Yawar kanqa, nina larway, wausi q'osñitaj.

²⁰Inti laqhayaykonqa, killataj yawar jina pukayaykonqa, manaraj Señorninchej Jesucristoj jatun p'unchaynin k'ancharispa rikhurimushajtin.

²¹Chantá pillapis Señorpa sutinta oqharejqa, salvasqa kanqa.

²²Israelitas kay nisqayta uyariwaychej: Nazaret llajtayoj Jesusta Diosqa allimpaj qhawarqa, qankuna ukhupi paynejta ruwaspa milagrosta, t'ukuna ruwaykunata, señalestawan. Chaytaqa qankuna allinta yachashankichej imaraykuchus qankuna ukhupi ruwakorqa.

²³Payqa entregasqa karqa Diospa munaynimpi wakichisqa kasqanman jina. Chaytaqa Dios ñaupajmantapacha yacharqa. Qankunataj paytaqa, juchasapa runaswan cruzpi chakatachispa, wañucherqankichej.

²⁴Diostaj, Jesusta wañusqamanta kausarichimorqa, wañuypa nanachiyninmanta kacharichispa; imaraykuchus wañoyqa, atiynimpi mana paytaqa jap'ikapuyta aterqachu. Rey Davidpis, Jesusmanta parlaspa nerqa: Señortaqa ñaupaqeypi rikullanipuni. Payqa pañaypi kashan, amaña kuyurichinawampaj.

²⁵

²⁶Chayrayku sonqoyqa kusikorqa, simiytaj may kusisqa parlan; chaynejta aychaypis chay suyaypi samakonqa.

²⁷Qanqa almayta mana saqerpayankichu wañusqaswan, nitaj saqenkichu ajllasqaykej aychan ismunanta.

²⁸Kausay ñankunata rejsichiwankiña, qanwan kajtiytaj kusiywan junt'achiwanki.

²⁹Hermanos, sut'inta niyta munaykichej ñaupa tatanchej Davidmanta. Yachankichej jina, payqa wañuporqa, p'ampasqataj karqa; kaypitaj noqanchejwan kunan p'unchaykama sepulturan kakushan.

³⁰Davidqa profeta kaspa yacharqa Dios juramentowan payman parlasqanta; paypa mirayninmantapuni Cristota jatarichinanta, tronompitaj tiyaykukunanta.

³¹Davidqa ñaupajmantaña yacharqa imachus kananta; chayrayku Cristoj kausarimunanmanta nerqa wañusqaswan mana qhepakunanta, nitaj aychampis ismunanta.

³²Diosqa, kay Jesusta wañuymanta kausarichimorqa. Tukuyniyku kay tukuy imasta rikorqayku.

³³Ajinamanta Jesusqa Diospa pañanman oqharisqa karqa. Paytaj Santo Espirituta Diospa nisqanman jina jap'erqa. Chaytataj chayacherqa imaynatachus rikushankichej, uyarishankichej jina.

³⁴Davidpis janaj pachaman mana wicharerqachu, chaywampis payqa kay jinata nerqa: Señorqa nerqa Señorniyman: Pañaypi tiyakuy, chejnisojkunata chakisniyki uraman churanaykama.

³⁵

³⁶Chayrayku tukuy Israel runakuna, cheqamanta yachachunku, kay Jesusta pitachus cruzpi chakatarqankichej, payta Dios churarqa Señor kanampaj, Cristotaj.

³⁷Chayta uyarispataj, maytapuni sonqo nanayta phutikorqanku. Pedroman wakin apostolesmanwan nerqanku: Kunanqa, wauqes, imatataj ruwasqaykuri?, nispa.

³⁸Pedrotaj paykunaman nerqa: Diosman kutiriychej sapa ujniykichej; bautizachikuychejtaj Jesuspa sutimpi, juchasniykichej pampachasqas kanampaj. Diostaj Santo Espirituta qhasilla qosonqachej.

³⁹Diosqa nerqa Santo Espirituta qankunaman qonanta, wawasniykichejman, tukuy karu llajtaspi kajkunamampis, pikunatachus Dios wajyan chaykunamanwan.

⁴⁰Ajinata Pedroqa sonqocharqa runakunata, waj ashkha palabraswan kallpachaspataj nerqa: Kay sajra runaj mirayninmanta ayqeychej, nispa.

⁴¹Ajinamanta Pedroj willasqanta jap'ejkuna bautizachikorqanku. Chay kikin p'unchayllapitaj, kinsa waranqa jina yapakorqanku creejkunaman.

⁴²Sumajta sayaspa, apostolespa yachachisqanta qhatisharqanku, ujchasqastaj karqanku. T'antata partispa khuska mikhoj kanku, Diosmantataj mañakuspa.

⁴³Apostolestaj ashkha milagrosta, rikuchinasta ima ruwarqanku. Chayrayku tukuy manchachikoj kanku.

⁴⁴Tukuy creejkunaqa ujchasqas kausakoj kanku, tukuy kapuyninkutataj ujllaman tantaj kanku.

⁴⁵Jallp'asninkuta vendespataj, tukuy ima kapuyninkutawan, tukuyninku chay qolqemanta rak'inakoj kanku, sapa uj pisichikusqanman jina.

⁴⁶Templopitaj tukuyninku uj sonqolla, sapa p'unchay tantakojpuni kanku. Wasisninkupipis t'antata partispa, khuska mikhoj kanku, may kusiywan, llamp'u sonqowantaj.

⁴⁷Diosta yupaychaspataj karqanku, tukuy runawantaj munachikorqanku. Sapa p'unchaytaj Señorqa iglesiaman yapasharqa, salvasqa kananku karqa chaykunata.