Read Quechua Bolivia DC Bible HECHOS 20 Bible Online

HECHOS 20 - Quechua Bolivia DC Bible bible

HECHOS 20

¹Ch'ajwa ch'inyajtintaj Pablo wajyacherqa creejkunata, paykunata sonqochaspataj, ujllaykuspataj, kutimunaykama niytawan, Macedoniaman riporqa.

²Llajtamanta llajta rispataj, hermanosta watukorqa sonqochaspa Diospa palabranwan Greciaman chayanankama.

³Chaypitaj Pablo qhepakorqa kinsa killata. Siriaman barcopi rinampaj wakichikushaspa taj yachakorqa judíos payta jap'iyta munasqankuta. Chayrayku umachakorqa kutiripuyta Macedonianejta.

⁴Pablowan khuskataj Asiaman rerqanku: Bereamanta Pirroj wawan Sópatro, Tesalonicamanta Aristarco, Segundowan, Derbemantataj Gayo, Timoteowan, Asiamantatajrí, Tíquico, Trofimowan.

⁵Paykunataj ñaupaykuspa Troaspi suyawarqayku.

⁶Noqaykutaj barcopi rerqayku Filiposmanta, mana levadurayoj t'anta mikhuna p'unchay qhepata. Phishqa p'unchayninmantaj, paykunawan Troaspi tinkukuspa, chaypi qhepakorqayku qanchis p'unchaytawan.

⁷Semanaj qallariynin p'unchaypitaj, tantakorqayku t'antata partinaykupaj, Pablotaj yachachisharqa. Q'ayantin puririnan kasqanraykutaj, paykunaman chaupi tutakama parlarqa.

⁸Tantasqa kasharqanku chay altopata wasipitaj, ashkha k'anchaykunas larwasharqanku.

⁹Eutico sutiyoj waynataj ventanapi tiyasharqa. Pablo unaytapuni parlajtintaj, Euticoqa puñuywan atipachikuspa sinch'ita puñurparerqa. Chay kinsa kaj alto wasimantataj urmaykamorqa pampaman. Wañusqatataj oqharerqanku.

¹⁰Pablotaj uraykuytawan waynaj patanman k'umuykorqa, marq'ariykukuspataj nerqa: Ama mancharikuychejchu, payqa kausakushan, nispa.

¹¹Ujtawan wicharispataj Pabloqa t'antata partispa mikhorqa. Chantá astawan yachacherqa sut'iyanankama, chaymantataj riporqa.

¹²Waynatataj kausashajta pusaykaporqanku, may sonqochasqastaj qhepakorqanku.

¹³Noqaykutaj ñaupaykorqayku barcopi Asón llajtaman Pablota chaypi suyanaykupaj, imaraykuchus pay munarqa chakipi riyta.

¹⁴Noqaykuwan Asompi tinkuspataj, Pabloqa barcoman wicharimorqa, khuskataj rerqayku Mitilene llajtaman.

¹⁵Chaymanta barcollapipuni rispataj, q'ayantin chayarqayku Quío chimpaman, qhepan p'unchaypitaj Samos puertoman. [Trogiliopi puñuspataj], q'ayantin chayarqayku Mileto llajtaman.

¹⁶Pabloqa Efesota pasallarqa, Asiapi mana qhepakuyta munaspa, Jerusalenman usqhayta chayananrayku, atispaqa Pentecostés p'unchaypaj.

¹⁷Miletomanta Pablo wajyacherqa Efeso iglesiapi ancianos kajkunata.

¹⁸Chayamojtinkutaj paykunaman nerqa: Qankuna allinta yachankichej, Asiaman chayamusqaymantapacha qankunawan allinta kausakusqaytaqa.

¹⁹Llamp'u sonqowan waqaspa Señorpa kamachiwasqanta ruwarqani, jinallatataj ñak'ariykunapipis judíos qhatiykachashawajtinku.

²⁰Manataj imatapis pakarqaykichejchu, astawanqa imachus qankunapaj allin kajta willarqaykichej, wasimanta wasi purispataj tukuypa rikunanta yachacherqaykichej.

²¹Ajinallatataj judiosman, griegosmampis sut'inta willarqani Diosman kutirinankuta, Señorninchej Jesucristopitaj creenankuta.

²²Kunantaj Santo Espirituta kasuspa Jerusalenman rishani; manataj yachanichu jaqaypi imachus noqapaj kananta.

²³Kayllata yachani: Sapa llajtapi Santo Espíritu willawan carcelman yaykunayta, ñak'arinaytataj.

²⁴Chaykunataqa mana manchachikunichu, nitaj wañuytapis; astawanqa kausayniyta tukuchiyta munani Señor Jesucristo kamachiwasqanta junt'aspa, willaspataj Diospa evangelionmanta, yanapayninmantawan.

²⁵Tukuyniykichejman Diospa reinonmanta willaspa purerqani. Kunanqa manaña uyayta rikunkichejchu.

²⁶Chayrayku kunanqa sut'inta niykichej. Pillapis nina larwayman rejtenqa manaña juchayojñachu kani, imaraykuchus qankunaman mana imata pakaspa willarqaykichej Diospa tukuy munayninta.

²⁸Qankuna kikiykichej qhawakuychej, jinallatataj tukuy tropatapis. Paykunapaj Santo Espíritu churasorqachej, qhawajkunata Diospa iglesianta michinaykichejpaj. Iglesiataqa Jesucristo kikin yawarninwan ranterqa.

²⁹Noqa yachani ripusqaymanta chaupiykichejman wajkuna phiña atojkuna jina yaykonqanku tropata mana khuyaspa.

³⁰Chay runasqa qankuna ukhullamantataj sayarenqanku pantasqata parlaspa, ceejkunata paykunaj qhepankuta pusanankupaj.

³¹Chayrayku ama puñuspa qhawakuychej, yuyarikuspa imaynatachus kinsa wata junt'ata, tuta p'unchay waqayniywan sapa ujniykichejta yuyaycharqaykichej.

³²Kunantaj Diosman saqeykichej, sonqochaj palabranman ima. Payqa atiyniyoj kallpachanampaj, chayaqeykichejta pis qonampaj tukuy ajllasqasman ima.

³³Mana pejpa qolqenta, qorinta, nitaj p'achanta munapayarqanichu.

³⁴Astawanqa qankuna yachankichej kay makisniywan llank'asqayta mikhunaypaj, noqawan kajkunapajpis.

³⁵Chay tukuy ruwasqaywan yachacherqaykichej, pisichikojkunata yanapayta. Yuyarikuspa Señor Jesuspa nisqanmanta: Aswan kusiymin qoyqa jap'inamanta nisqaqa.

³⁶Ajinata parlaytawan Pabloqa qonqoriykukuspa, tukuy paykunawan khuska Diosmanta mañakorqanku.

³⁷Tukuyninkutaj mayta waqarqanku, Pablota ojllaykuspataj much'aykorqanku.

³⁸Paykunaqa astawan sonqonkuta nanachikorqanku Pabloj nisqanmanta, manañataj jayk'aj rikunankumanta. Barcokamataj paywan rerqanku kacharpayamunankupaj.