Read Quechua Bolivia DC Bible HECHOS 21 Bible Online

HECHOS 21 - Quechua Bolivia DC Bible bible

HECHOS 21

¹Chanta hermanosmanta t'aqakuspa barcoman wicharerqayku, chaymantataj cheqanta rerqayku Cos llajtaman. Q'ayantintaj chayarqayku Rodas llajtaman, jaqaymantataj Pátara llajtaman.

²Patarapi tarerqayku Feniciaman rishaj barcota, chayman wicharispataj rerqayku.

³Rishaspataj Chipre churuta rikorqayku, lloq'e ladoman saqespataj Siriakama rerqayku. Tiro llajtaman chayaspataj uraykorqayku, imaraykuchus barcomanta cargata uraykuchinanku karqa.

⁴Yachachisqasta tarispataj paykunawan qhepakorqayku qanchis p'unchayta. Hermanostaj Santo Espíritoj atiynimpi Pablota jark'asharqanku, ama Jerusalenman wicharinanta.

⁵Chay qanchis p'unchaymantataj riporqayku. Tukuy hermanostaj warmisninkuwan, wawasninkuwan ima, noqaykuwan rerqanku llajta llojsiykama. Qocha cantopitaj qonqoriykukuspa Diosmanta mañakorqayku.

⁶Chaymanta sapa ujwan q'apinakuspa, barcoman wicharerqayku, paykunataj wasisninkuman kutiriporqanku.

⁷Tiromanta llojsispa Tolemaidaman chayarqayku. Ajinapi tukucherqayku jatun qochanejta puriyniykuta. Chaypi kaj hermanosta yanapaykorqayku, paykunawantaj uj p'unchayta qhepakorqayku.

⁸Q'ayantintaj, tukuy Pablowan kajkuna ima, Cesareaman riporqayku. Cesareaman chayaspataj, evangelista Felipej wasinman chayakorqayku. Payqa iglesiapi qanchis diáconos ajllasqamanta ujnin karqa.

⁹Felipejtataj tawa doncella ususisnin tiyarqa, paykunataj Diospa palabranta willaj kanku.

¹⁰Pisi p'unchaykunata kasqaykumantataj, Judeamanta Agabo sutiyoj profeta chayamorqa.

¹¹Paytaj noqaykuta watukoj jamuspa, Pabloj chumpinta oqharispa, chakisninta makisnintawan wataykukuspa nerqa: Kay jinata Santo Espíritu nin: Ajinata kay chumpiyojta watanqanku judíos Jerusalempi, chaymantataj gentilesman entreganqanku, nispa.

¹²Chayta uyarispataj noqaykoqa, chaypi kaj hermanoswan ima, Pablota jark'arqayku Jerusalenman ama wicharinanta.

¹³Chaymantataj Pablo niwarqayku: Imaraykutaj chay jinatapuni waqaspa sonqoyta nanachishawankichejri? Noqaqa wakichisqa kani, mana watachikunallaypajchu, astawanqa, Jerusalempi wañunaypaj Señor Jesuspa sutinrayku.

¹⁴Manaña imaynapi Jerusalenman rinanmanta jark'ayta atispataj, saqellarqaykuña, Señorpa munaynin ruwakuchun, nispa.

¹⁵Chay p'unchaykuna qhepatataj, wakichikuytawan Jerusalenman wicharerqayku.

¹⁶Cesareamantapis wakin yachachisqas noqaykuwan rillarqankutaj, pusanawaykupaj Chipre llajtayoj Mnasompa wasinman, chayman chayanaykupaj. Payqa unayña creej karqa.

¹⁷Jerusalenman chayajtiykutaj, hermanosqa tukuy sonqo wasinkuman wajyarikuwarqayku.

¹⁸Q'ayantintaj Pablo noqaykuwan rerqa Santiagota watukoj, chaymantaj tukuy ancianos tantakamorqanku.

¹⁹Napaykuspataj, paykunaman ujmanta uj willarqa, imastachus Dios ruwasqanta paynejta gentiles ukhupi.

²⁰Chayta uyarispataj Diosta yupaycharqanku, nerqankutaj: Hermano, qan kikiyki yachashanki, may chhika waranqa judíos creejkuna kasqankuta. Tukuyninkutaj Moisespa leynintapuni kasuyta munanku.

²¹Qanmantataj uyarikun, gentiles ukhupi tiyakoj judiosta yachachisqaykita manaña kasunata Moisespa leyninta. Nillasqankitaj amaña wawasninkutapis circuncidanankuta, nitaj ñaupa usuman jina kausanankuta.

²²Kunanqa, imaynataj kayri? Paykunaqa yachanqankupuni kayman chayamusqaykita, ashkhastaj tantakonqanku.

²³Chayrayku kay nisqaykuta ruway. Noqayku ukhupi tawa qharis tiyan. Paykunaqa nisqankuta junt'ananku tiyan.

²⁴Paykunawan khuska temploman yaykuspa llimphuchakuy, paykunapajtaj qolqeta churapuy, chujchankuta ruthuchikunanku paj. Ajinapi tukuy yachanqanku mana jinachu kasqanta qanmanta uyarisqankoqa. Astawanqa rikonqanku qampis leyta junt'asqaykita.

²⁵Gentilesmanta creejkunaman, ñapis cartata apacherqaykuña, willachispa, lantikunaman jaywasqa aychata ama mikhunankuta, nitaj yawarta, nillataj jeq'eqasqa uywastapis, amataj qhenchachakunankuta.

²⁶Ajinamanta, Pabloqa chay tawa qhariswan q'ayantin llimphuchakorqa. Chaypacha temploman yaykuspa willamorqa ima p'unchaytachus chay llimphuchakuy tukukunanta; chay qhepatataj Diosman jaywanankupaj ofrendata sapa ujninkumanta.

²⁷Qanchis p'unchay junt'akunan kashajtintaj, Asiamanta judíos templopi Pablota rikorqanku. Tukuy runata oqharichispataj Pablota presocharqanku.

²⁸Qhaparispataj nerqanku: Israel runakuna, yanapawayku! Kay runa tukuynejpi yachachishan ayllunchejpa contranta, leypa contranta, temploj contrantapis. Astawanqa griegosta pusaykamuspa ch'ichichan kay santo lugarta.

²⁹Chayta nerqanku, Pablota rikuspa Efeso llajtayoj Trofimowan purishajta. Chayrayku yuyarqanku payqa Trofimota temploman pusaykusqanta.

³⁰Ajinamanta, tukuy llajtantin oqharikuspa, Pablota jap'iykorqanku, qhatatispataj templomanta orqhorqanku. Chay kikimpachataj punkusta wisq'ararqanku.

³¹Pablota wañuchinayashajtinku, soldadospa comandantenman willamorqanku tukuy Jerusalén llajta oqharikusqanta.

³²Chay kikimpachataj, comandanteqa soldadosta capitanestawan pusarispa ch'ajwa chaupiman chayarqanku. Runastaj, comandanteta soldadostawan rikuspa manaña Pablota maqarqankuchu.

³³Comandantetaj chimpaykuspa Pablota jap'icherqa, kamacherqataj iskay cadenaswan wataykunankuta. Taporqataj pichus kasqanta, imatachus ruwasqanta ima.

³⁴Runakunataj qhaparisharqanku ujkuna uj jinata, ujkunataj uj jinata. Chay jinapuni ch'ajwa kasqanraykutaj, comandanteqa yachaspa imamantachus oqharikusqankuta Pablota cuartelman pusacherqa.

³⁵Patillaskama chayaspataj, soldadosqa Pablota ayqecherqanku; runasqa wañuchej jina qhepankuta jamusharqanku.

³⁶Ashkha runastaj, qhepankuta rispa qhaparqachasharqanku: Wañuchun!, nispa.

³⁷Cuartelman pusaykushajtinkutaj Pablo nerqa comandanteman: Ujta nisuyta atiymanchu? Comandantetaj nerqa: Griegota parlayta yachankichu?

³⁸Manachu qan chay Egipto llajtayoj runa kanki? Manaraj unaychu ch'ajwata oqharichispa, tawa waranqa runa wañuchista ch'in pampaman qan pusarqanki.

³⁹Pablotaj kutichispa nerqa: Noqa judío kani Tarso llajtamanta. Tarsoqa jatun llajta Ciliciapi. Kunanqa saqeway runakunaman parlajta; chayta mañarikuyki.

⁴⁰Comandantetaj parlananta saqerqa. Pablotaj patillapi sayaykuspa, makinwan runasta ch'inyacherqa, hebreo parlaypitaj runasman nerqa: