Read Quechua Bolivia DC Bible HECHOS 22 Bible Online

HECHOS 22 - Quechua Bolivia DC Bible bible

HECHOS 22

¹Wauqekuna, kurajkuna ima, kay ñaupaqeykichejpi kutichikusqayta uyariwaychej, nispa.

²Hebreo parlaypi Pablota uyarispataj, astawan ch'inyarqanku. Pablotaj nerqa: Noqa judío kani. Ciliciapi kaj Tarso llajtapi nacikorqani. Kay Jerusalén llajtapi wiñakorqani, yachachejniytaj Gamaliel karqa. Ñaupa tataspa tukuy kamachisqankuta allintapuni yachachiwarqanku. Tukuy sonqowantaj Diospa leyninta junt'arqani, imaynatachus qankunapis kunan ruwashankichej ajinata.

⁴Ñaupajtaqa qhatiykacharqani kay Mosoj Ñanta jap'ejkunata chinkachiyta munaspa. Qharista, ajinallatataj warmistapis carcelman wisq'aracherqani.

⁵Jatun sacerdotepis, kurajkunasnintin willasunkichejman cheqata parlasqayta. Paykunamanta qochikorqani cartasta Damascopi kaj judío masisninchejman apanaypaj, chaypi kajkunata presochaspa, Jerusalenman watasqasta apamuspa jasut'ichinaypaj.

⁶Damasco qayllataña rishajtiytaj, chaupi p'unchayta, ujllata janaj pachamanta uj jatun k'anchay muyuykuwarqa.

⁷Pampaman urmarqani, uyarerqanitaj nimuwajta: Saulo, Saulo. Imaraykutaj noqata qhatiykachashawankiri?, nispa.

⁸Noqataj nerqani: Pitaj kanki, wiraqochi? Paytaj kutichiwarqa: Noqa Nazaretmanta Jesús kani, pitachus qan qhatiykachashanki chay.

⁹Noqawan rejkunataj, cheqamanta k'anchayta rikorqanku, manataj parlamuwajta uyarerqankuchu.

¹⁰Chaymantataj noqa nerqani: Imatataj ruwasajri? Señortaj niwarqa: Jatarispa Damascoman yaykuy, chaypitaj nisonqanku imatachus ruwanaykita.

¹¹Chay k'anchaytaj ciegoyachiwarqa. Chayrayku, noqawan kajkuna makiymanta aysaspa Damascoman pusawarqanku.

¹²Uj runa Ananías sutiyoj karqa, paytaj Diosta yupaychaj leyman jina. Damascopi kaj judiostaj, allin runapaj payta qhawarqanku.

¹³Ananiastaj watukuwaj jamorqa, ñaupaqeypi sayaykuspataj niwarqa: Hermano Saulo, qhawariy, nispa. Chay kikimpachataj qhawarerqani, paytataj rikorqani.

¹⁴Ananiastaj niwarqa: Tatasninchejpa Diosnin, ñaupajmantapacha qanta ajllasorqa, paypa munayninta yachanaykipaj, cheqan kajta rikuspa simimpa nisqanta uyarinaykipaj.

¹⁵Qanqa Jesusmanta runasman willamunki imatachus rikusqaykita, uyarisqaykitawan.

¹⁶Kunanqa, imatataj suyanki? Jatirispa bautizachikuy, juchasniykimanta llimphuchakuy Jesuspa sutinta oqharispa.

¹⁷Jerusalenman kutimuspa, templopi Diosmanta mañakushajtiytaj mosqoy jina jap'iwarqa.

¹⁸Jesustataj rikorqani. Paytaj niwarqa: Usqhayta kunampacha Jerusalenmanta llojsiy, imaraykuchus kaypi imatachus noqamanta willasqaykita mana uyarisonqankuchu, nispa.

¹⁹Noqataj kuticherqani: Señor, tukuyninku yachanku imaynatachus tukuynejman rispa sinagogaspi qampi creejkunata jap'ichispa maqachisqayta.

²⁰Willajniyki Estebanta wañuchishajtinku pis, noqa chaypi paykunawan khuska kasharqani wañuchinankuta munaspa; chay wañuchejkunaj p'achasninkutapis qhawarqani.

²¹Chantá Jesús niwarqa: Puririllayña; karu llajtasman kachasqayki, nispa.

²²Chaykama Pabloj parlasqanta uyarerqanku, chaymantataj qhaparqacharqanku: Wañuchun chay runaqa. Mana allinchu kanman kausananqa!

²³Runas qhaparqachajtinku, p'achasninkuta choqaraspa, jallp'ata pataman qhallajtinkutaj, comandante cuartelman Pablota pusaykucherqa, chaypitaj jasut'ichispa rimarinampaj, yachayta munasqanrayku imamantachus chay jinatapuni Pabloj contranta qhaparqachasqankuta.

²⁵Jasut'inankupaj watasqaña kashajtin, chay qayllapi sayashaj capitanman Pablo nerqa: Atikullanchu jasut'ichiy Roma llajtayojta manaraj allinta tapushaspa?

²⁶Capitantaj chayta uyarispa comandanteman willamorqa, nerqataj: Allinta qhawakuy imatachus ruwasqaykita, imaraykuchus kay runaqa romano kasqa.

²⁷Comandantetaj Pabloman qayllaykuspa taporqa: Niway, romanochu kanki? Pablotaj, arí nerqa.

²⁸Chantaqa comandante nillarqataj: Noqaqa romano kanaypaj ashkha qolqeta pagarqani. Pablotaj kuticherqa: Noqatajrí, romano kani nacikusqaymantapacha.

²⁹Chay kikimpachataj Pablota jasut'ejkuna ithirerqanku, astawanqa kikin comandante, Pablo romano kasqanta yachaspa mancharikorqa wataykuchisqanmanta.

³⁰Q'ayantintaj comandanteqa, yachaytapuni munaspa imamantachus judíos ch'atasqankuta, Pablota phaskaracherqa. Chaymantataj kamacherqa tukuy kuraj sacerdotes juntaman tantakamunankuta, Pablotataj ñaupaqenkuman pusaykorqanku.