Read Quechua Bolivia DC Bible HECHOS 23 Bible Online

HECHOS 23 - Quechua Bolivia DC Bible bible

HECHOS 23

¹Pablotaj jatun juntapi kajkunata qhawarispa, nerqa: Wauqekuna, kunankama Diospa ñaupaqempi llimphu sonqoyoj kausakuni.

²Kuraj sacerdote Ananiastaj chay qayllapi kajkunata kamacherqa Pablota simimpi laq'anankuta.

³Pablotaj nerqa Ananiasman: Yurajchasqa perqa, qantapis Diosqa jinch'asonqa! Qanqa chaypi tiyashanki, leyman jina juzganawaykipaj. Kunantajchu leyta p'akispa jinch'achiwanki?

⁴Chay qayllapi kajkunataj Pabloman nerqanku: Ajinatachu Diospa kuraj sacerdotenta k'aminki?

⁵Pablotaj nerqa: Wauqekuna, mana noqaqa yacharqanichu pay kuraj sacerdote kasqanta; escribisqa kashan: Ama sajrata rimankichu llajtaykipi kamachejpajqa.

⁶Pablo yachaspa chay jatun juntapi wakin saduceos, wakintaj fariseos kasqankuta, sinch'ita qhaparerqa: Wauqekuna, noqa fariseo kani fariseoj wawan. Wañuymanta kausarimunapi suyasqayrayku noqata juchachashawanku.

⁷Chayta nisqantawan, fariseos, saduceoswan churanakuyta qallarerqanku, chay jawataj jatun juntapi kajkuna iskayman t'aqakorqanku.

⁸Saduceosqa ninku kausarimuy mana kasqanta, nitaj ángeles, nillataj almapis. Fariseostajrí kay tukuypi creenku.

⁹Tukuyninkutaj anchata ch'ajwarqanku. Fariseosmanta wakin leymanta yachachejkuna sayaykuspa manchayta siminakorqanku, nispa: Mana ima sajratapis kay runapi tariykuchu. Ichapis uj espíritu, chayrí uj angelchus payman parlanman karqa.

¹⁰Chay jinatapuni jap'inakojtinkutaj, comandanteqa manchachikorqa Pablota wañuchinankuta. Chayrayku soldadosta kamacherqa, chay runa chaupimanta orqhomuspa ujtawan cuartelman Pablota pusaykunankuta.

¹¹Q'ayantin ch'isitaj Señor rikhurerqa Pabloman, nerqataj: Sonqochakuy, Pablo. Imaynatachus kay Jerusalempi noqamanta willarqanki, kikillantataj Romapipis willanki.

¹²Q'ayantin paqarintaj wakin judíos, tantakuspa yachachinakusqanku, mana imata mikhunankuta, nitaj ujyanankuta, Pablota wañuchinankukama.

¹³Chay yachachinakojkunaqa, tawa chunka kuraj karqanku.

¹⁴Paykunataj tinkumorqanku kuraj sacerdoteswan, kurajkunawan ima, nerqankutaj: Noqayku parlasqaña kayku mana imata llaminaykupaj Pablota wañuchinaykukama.

¹⁵Kunanqa qankuna, jatun juntapi kajkunawan comandantemanta mañachiychej, Pablota pusachimunanta, astawan tapuyta munaj jinalla. Noqaykutaj, manaraj kayman chayamushajtin suyasqayku payta wañuchinaykupaj.

¹⁶Pabloj panampa churintaj, nisqankuta uyariytawan, cuartelman yaykuspa Pabloman willamorqa.

¹⁷Pablotaj ujnin capitanta wajyaspa nerqa: Kay waynata pusaykuripuway comandanteman, imatachá willanan tiyan.

¹⁸Capitantaj pusaykuspa, comandanteman nerqa: Presochasqa Pablo wajyachiwaspa mañawarqa kay waynata qanman pusamunayta. Paytaj imatachá willasonqa.

¹⁹Comandantetaj waynata wajnejman makinmanta pusaspa taporqa: Imatataj willanawayki tiyan?

²⁰Waynataj payman nerqa: Judíos yachachinakunku qanmanta mañanankupaj Pablota q'aya jatun juntaman pusaykunaykita; payta astawan tapuyta munaj jinalla.

²¹Qanqa ama paykunata kasuychu. Tawa chunkamanta aswan ashkha qharis, ñampi pakaykukuspa Pablota suyanqanku. Paykunataj parlasqaña kanku mana mikhunankuta, nitaj ujyanankuta Pablota wañuchinankukama. Kunantaj wakichisqaña kanku chayta ruwanankupaj. Qampa ninallaykitaña suyashanku.

²²Comandantetaj waynata kachaporqa: Ama piman imata ninkichu kay willawasqaykimanta, nispa.

²³Comandantetaj iskay capitanesta kamacherqa wakichinankuta iskay pachaj soldadosta Cesareaman rinankupaj; jinallatataj qanchis chunkata caballosniyojta, iskay pachaj lanzasniyojtawan, chay ch'isipacha isq'on horasta puririnankupaj.

²⁴Kamachillarqataj wakichinankuta caballosta, Pablo rinampaj; sumaj waqaychasqa kamachej Felixpaman chayanampaj.

²⁵Paykunawantaj Felixman apacherqa kay jina cartata: Noqa Claudio Lisias, qanta sumaj kamachej Félix, napaykamuyki.

²⁷Judíos kay runata jap'ichispa wañuchinanku kashajtin, Roma llajtayoj kasqanta yachaspa, noqa soldadosniywan makisninkumanta qhechuni.

²⁸Imamantachus ch'atayta munasqankuta yachayta munaspataj jatun juntankuman pusacherqani.

²⁹Chaypitaj yacharqani leyninkoj imasnillanmanta ch'atasqankuta. Manataj paypeqa ima juchapis karqachu wañuchinankupaj, nitaj carcelman wisq'achinankupajpis.

³⁰Wañuchinankupaj wateqasqankuta yachaspataj qanman pusachimushani. Payta ch'ataykojkunamampis nillanitaj, qampa ñaupaqeykipi uyanchanankuta.

³¹Kamachisqaman jinataj, soldados pusarqanku Pablota chay ch'isipacha Atípatris llajtaman.

³²Q'ayantintaj chakipi rej soldados kutiriporqanku. Caballospi kajkunallaña Pablowan rerqanku.

³³Cesareaman chayaspataj, kamachejman cartata jaywarqanku; Pablotataj entregarqanku.

³⁴Felixtaj cartata leespa, Pablota taporqa maymantachus kasqanta. Ciliciamanta kasqanta yachaspataj, Pabloman nerqa: Qanta ch'atajkuna chayamojtinku uyarisqayki. Chaymantataj kamacherqa wisq'anankuta Herodespa uyarinan wasipi.