Read Quechua Bolivia DC Bible HECHOS 24 Bible Online

HECHOS 24 - Quechua Bolivia DC Bible bible

HECHOS 24

¹Phishqa p'unchayninman kuraj sacerdote Ananías rerqa Cesareaman wakin kurajkunawan, Tértulo sutiyoj leymanta yachachejtawan pusaspa. Kamachej Felixpaman yaykuspataj Pablota ch'ataykorqanku.

²Pablota orqhomusqankutawan, Tertuloqa payta ch'ataykuyta qallarerqa, kay jinata Felixman nispa: Kamachej Félix, qannejta sonqo tiyasqas allinta kausakuyku; imaraykuchus yachachiyniykiwan tukuy imata cheqanta kamachinki.

³Tukuynejpitaj, kay ruwasqaykita rikuspa anchatapuni agradecekuyki, may respetasqa Félix.

⁴Mana astawan sayk'uchiyta munaykichu; chayrayku kunan, sumaj sonqoykiman jina mañakuyku kay pisita uyarinawaykuta.

⁵Noqayku yachayku kay runaqa sajra kasqanta. Tukuy llajtaspitaj judiosta ch'ajwachin. Paytaj nazarenospa t'aqanta umachan.

⁶Templotapis ch'ichichayta munarqa. [Chayrayku payta presocharqayku noqaykoj leyniykuman jina juzganaykupaj.

⁷Comandante Lisiastaj, jatun juntaykuman jamuspa, Pablota ancha atiywan qhechuwarqayku.

⁸Lisiastaj kamacherqa, Pablota ch'atajkuna jamunankuta qanwan parlaj.] Qan kikiyki tapunki chayqa, paypa siminmanta yachanki tukuy juchachasqaykumanta.

⁹Chaypi kaj judiospis nillarqankutaj ajinapuni kasqanta.

¹⁰Kamachej Felixtaj saqerqa Pablo parlananta. Paytaj nerqa: Yachani unay watasña kay naciompi cheqan kamachej kasqaykita; chayrayku tukuy sonqo kutichikusaj.

¹¹Manaraj chunka iskayniyoj p'unchaypischu kashan, Jerusalenman Diosta yupaychaj wicharisqayqa. Yachayta munaspaqa, qan kikiyki tapuriy, jinachus manachus kasqanta.

¹²Mana rikuwarqankuchu ni piwan churanakushajta templopi, nitaj runasta ch'ajwachejta, nitaj sinagogaspipis, nillataj llajtapipis.

¹³Nillataj atinkumanchu nisuyta pichus rikuwasqanta chay tumpawasqankumanta.

¹⁴Kaytarí, sut'inta willasqayki: Tatasniypa Diosninta yupaychani kay mosoj ñanta qhatispa, mayqentachus pantasqa kasqanta ninku. Astawampis creeni Moisespa leynimpi, profetaspa escribisqampi ima.

¹⁵Paykuna kikillantaj Diospi suyani: Tukuy runas wañuymanta kausarimunankuta, cheqan kajta ruwajkuna, sajrata ruwajkunapis.

¹⁶Chayrayku atisqayta ruwani, tukuy kausayniypi llimphu sonqo kanaypaj Diospa ñaupaqempi, runaspa ñaupaqenkupipis.

¹⁷Kunanqa ashkha watasmantaña Jerusalenman kutimuni, llajta masisniyman ofrendata apamuspa, Diosmantaj ofrendata qonaypaj.

¹⁸Templopi kashajtiytaj, Asiamanta kaj judíos taripawarqanku llimphuchakushajta. Chaypitaj mana ashkha runachu karqa, nitaj ima ch'ajwapis karqachu.

¹⁹Chay judíos qanman jamunanku karqa ch'atanawankupaj, juchayoj kani chayqa.

²⁰Manachayrí, kaypi kajkuna niwachunku ima juchamantachus ch'atawasqankuta jatun juntapi kashajtiy.

²¹Ichapis ñaupaqenkupi qhaparispa, wañusqakuna kausarimonqanku nisqaymanta, kunan p'unchay paykuna juchachashawanku.

²²Kamachej Félix sumajta rejserqa chay Mosoj Ñanmantaqa; chayrayku paykunataqa kachaporqa, nispa: Kay imasmantaqa astawan tapusaj comandante Lisias uraykamojtin.

²³Ajinata nispataj, capitanta kamacherqa, Pablota mana ñak'arichispa, waqaychasqata jap'inanta, watukoj jamojkunatapis ama jark'anankuta.

²⁴Pisi p'unchaykunamanta, Félix jamorqa Drusila warminwan. Drusilaqa judía karqa. Felixtaj wajyacherqa Pablota, uyariyta munaspa Jesucristopi creenamanta.

²⁵Pablota parlajta uyarispataj cheqan kajta ruwanamanta, ama qhenchachakunamanta, jamoj juicio p'unchaymanta ima, Felixqa mancharikorqa, Pablotataj nerqa: Kunanqa ripullayña, waj p'unchaypi wajyachillasqaykitaj.

²⁶Astawanqa, Félix suyasharqa Pablo qolqeta lluk'iykunanta kacharipunampaj. Chayrayku sapa kuti wajyacherqa paywan parlanampaj.

²⁷Iskay watamantaj, Felixpa cuentanmanta Porcio Festo kamachinampaj yaykorqa. Felixtaj, judiosman allin rijch'ayta munaspa, Pablota presota saqerqa.