Read Quechua Bolivia DC Bible HECHOS 25 Bible Online

HECHOS 25 - Quechua Bolivia DC Bible bible

HECHOS 25

¹Festotaj chay provinciaman chayamuspa, kinsa p'unchayninman Cesareamanta Jerusalenman wicharerqa.

²Chaymantaj jamorqanku kuraj sacerdotes, judiosmanta aswan atiyniyojkunawan, Pablota ch'ataykunankupaj.

³Festomantataj mañakorqanku Jerusalenman Pablota pusachinanta; imaraykuchus paykunaqa ñapis yachachinakorqankuña ñampi wañuchinankupaj.

⁴Festotaj paykunaman nerqa: Pabloqa Cesareapi presochasqa kashan. Noqapis usqhayllata pisi p'unchaymantawan kutiripusaj.

⁵Qankunata kamachejkuna noqawan khuska Cesareaman uraykuchunku, jaqaypitaj chay runa juchayoj kajtenqa ch'ataykuychej.

⁶Festotaj Jerusalempi qhepakorqa pusajtachus, chayrí chunka diatachus; chaymantataj Cesareaman uraykorqa. Q'ayantimpachataj, juzgadopi tiyaykukuspa kamacherqa Pablota ñaupaqenman pusamunankuta.

⁷Pablo yaykumojtintaj, judíos Jerusalenmanta jamojkuna Pablota muyuykorqanku. Ch'ataykuytataj qallarerqanku tumpaspa jatuchaj juchasmanta, manataj Pablota uyanchayta aterqankuchu.

⁸Pablotaj kutichikuspa nerqa: Mana noqaqa ima juchatapis ruwanichu judiospa leynimpa contrampa, nitaj templojpipis, nillataj Cesarpa contrantapis.

⁹Festotaj judiosman allinta rijch'ayta munaspa, Pablota taporqa: Munawajchu Jerusalenman riyta, chaypitaj kay imasmanta noqa juzgasunayta?

¹⁰Pablotaj kuticherqa: Cesarpa juzgadompi kashani, chaypi juzganawanku tiyan. Mana ima sajratapis judiospajqa ruwanichu. Qan allinta chaytaqa yachanki.

¹¹Chayrayku, ima juchatachus wañunaypaj jina ruwayman karqa chayqa, mana manchachikunichu wañuyta. Tumpawasqanku mana jina kajtenqa, ni pi atinmanchu jap'ichiwayta. Chaypajwanqa, jatun kamachej uyariwachun.

¹²Festotaj kamachejkunaman parlaspa, Pabloman kuticherqa: Jatun kamachej uyarinasunta munanki chayqa, jatun kamachej uyarisuchun.

¹³Pisi p'unchaykunamanta, Cesareaman rey Agripa Berenicewan jamorqanku Festota watukoj.

¹⁴Unaytaña chaypi kasqankumantaj, Festo willarqa rey Agripaman Pablomanta: Kaypi uj preso kashan Felixpa saqesqan.

¹⁵Jerusalempi kashajtintaj, judiosmanta kuraj sacerdotes, kurajkunawan jamuspa, payta ch'ataykorqanku, mañawarqaykutaj wañunampaj juchachanayta.

¹⁶Noqataj paykunaman nerqani romanosqa mana pitapis juchachallankuchu wañunampaj manaraj uyanchashaspa, nitaj uyarispa kutichikusqanta.

¹⁷Kayman jamojtinkutaj, q'ayantimpacha juzgadopi tiyaykukorqani, Pablotataj pusachimorqani.

¹⁸Ch'atajkuna tantakojtinkutaj, noqaqa yuyarqani ima sajramantachá uyanchanankuta, manataj jinachu karqa.

¹⁹Paykunaqa Pablota ch'ataykorqanku diosninkuta yupaychanamanta; chaymantaqa uj Jesús wañusqa runamanta, pitachus Pablo nin kausashasqanta.

²⁰Kay imasmanta mana yachaspa imaynatachus ruwanayta, Pablota taporqani: Munankichu Jerusalenman riyta, chaypitaj kay imasmanta uyarichikuyta?, nispa.

²¹Pablotaj munarqa jatun kamachejwan uyarichikuyta. Chayrayku kamacherqani preso kananta, jatun kamachejman pusachinaykama.

²²Agripataj nerqa Festoman: Kay runataqa, noqapis uyariyta munayman. Festotaj nerqa: Q'aya payta uyarinki.

²³Q'ayantintaj Agripawan, Berenicewan sumaj p'achallisqas yaykorqanku juzgadoman. Paykunawan khuskataj yaykorqanku comandantes, llajtapi kurajkuna ima. Festotaj kamacherqa Pablota pusaykamunankuta.

²⁴Chaymantataj Festo nerqa: Rey Agripa, qankunapis wiraqochis noqaykuwan kajkuna: Kaymin chay runaqa, pimantachus tukuy judíos Jerusalempi, jinallatataj kaypipis mañakuwanku wañunantapuni munaspa.

²⁵Noqataj, mana ima juchata paypi tarinichu wañunampaj jina. Paypuni mañakun jatun kamachej uyarinanta, chayrayku payman pusachisaj.

²⁶Manataj yachaspa imatachus cartapi kamachejniyman apachinayta, kunan wajyachini ñaupaqeykichejman, astawanqa qan rejsinaykipaj, rey Agripa. Ichapis astawan payta tapuspa, yachayta atiyman imatachus cartapi ninaypaj.

²⁷Noqapaj mana walejchu kanman presota pusacheyqa, mana allinta willaspa imamantachus tumpasqa kasqanta.