Read Quechua Bolivia DC Bible HECHOS 7 Bible Online

HECHOS 7 - Quechua Bolivia DC Bible bible

HECHOS 7

¹Chaymantataj kuraj sacerdoteqa Estebanta taporqa: Ajinachu kayqa?, nispa.

²Estebantaj kuticherqa: Hermanos, tatakuna ima, uyariwaychej. Jatun atiyniyoj Diosqa, tatanchej Abrahamman Mesopotamiapi kashajtin, manaraj Harán jallp'aman tiyakoj ripushajtin, nerqa: Llojsiy kay jallp'aykimanta aylluykimantawan; noqa rikuchisqayki chay jallp'amantaj ripuy.

⁴Ajinamanta Abrahamqa, Caldeospa jallp'anta saqespa, Harán jallp'aman tiyakoj riporqa. Tatan wañupusqanmanta qhepamantaj, Diosqa pusamorqa payta kay jallp'aman, maypichus qankuna kunan kakushankichej.

⁵Diosqa payman mana chayaqenta qorqachu, ni ujnin chakillantapis churaykunampaj. Chaywampis Diosqa Abrahammampuni kay jallp'ata qonanta nerqa, paypaj kanampaj, wañupojtimpis miraynimpaj qhepakunampaj. Chayta Dios nishajtenqa, manaraj Abrahampataqa wawampis karqarajchu.

⁶Dios payman nillarqataj: Qampa mirayniykeqa waj karu llajtapi kamachis kanqanku. Chaypi runakunataj mayta ñak'arichenqanku tawa pachaj watasta.

⁷Diosqa nerqa: Chay ñak'arichej llajtataqa noqa juzgasaj. Qhepamantaj chay mirayniykeqa, chay llajtamanta llojsimuspa, kay jallp'api yupaychawanqanku.

⁸Chaymantataj Diosqa Abrahamwan circuncisión nisqa tratota ruwarqa. Ajinamanta Abrahamqa wawan Isaacta circuncidarqa, nacikusqanmanta pusaj p'unchayninman. Isaacpis wawan Jacobta circuncidarqa, Jacobpis kikillantataj chunka iskayniyoj aylluspa tatasninta.

⁹Jacobpa wawasnin ñaupa tatakunaqa, wauqenku Joseta chejnispa, kamachita jina venderqanku Egipto llajtaman pusanankupaj. Diostaj Josewan karqa payta waqaychaspa.

¹⁰Diosqa, Joseta tukuy llakiyninmanta orqhorqa. Allin rijch'ayta, yachaytawan qorqa, egipcio reypa ñaupaqempi; paytaj churarqa Egiptota kamachinampaj, ajinallatataj wasimpipis kamachinampaj.

¹¹Chaypachataj yarqhay manchay llakiywan jamorqa Egiptoman, Canaanman ima. Ñaupa tatasninchejpis mikhunata mana tarerqankuchu.

¹²Jacobtaj Egiptopi trigo kasqanta uyarispa, tatasninchejta kacharqa ñaupaj kutipi.

¹³Iskay kuti risqankupitaj, José wauqesninwan rejsichikaporqa. Ajinapi Faraonqa, Josejpa ayllusninta rejserqa.

¹⁴Chaymantataj, Joseqa tatan Jacobta wajyacherqa, tukuy ayllusninwan Egiptoman jampunanta. Tukuyninkupi qanchis chunka phishqayoj karqanku.

¹⁵Ajinamanta Jacobqa Egiptoman tiyakoj uraykorqa, chaypitaj wañuporqa. Paypa qhepantataj, wawasnin ñaupa tatasninchej wañupullarqankutaj.

¹⁶Unay watasninmantaj paykunaj tullusninkuta apamorqanku Siquem nisqa jallp'aman. Chaypitaj p'amparqanku, Hamor ayllumanta Abrahampa rantisqan jallp'api.

¹⁷Maypachachus Dios, Abrahamman qosqayki nerqa, chay p'unchaykunataj junt'akunampaj qayllamushajtin, Israel runakunaqa Egiptopi manchay ashkhaman mirarqanku, Egiptopi waj rey sayarinankama. Payqa Joseta mana rejserqachu pichus kasqanta.

¹⁸

¹⁹Chay reytaj ñaupa tatasninchejta chejnispa, manchayta ñak'aricherqa. Chayrayku kamacherqa nacisqa qhari wawitasninkuta wijch'umunankuta ama kausanankupaj.

²⁰Chay tiempollapitaj Moisés nacikorqa. Diostaj payta munakorqa. Kinsa killankamataj tatampa wasimpi uywasqa karqa.

²¹Chantá saqerparisqa kashajtintaj, ama wañunampaj faraompa ususin tarikuspa, uywakaporqa wawanta jina.

²²Moisesqa yachachisqa karqa Egipto runaspa tukuy yachachiyninkupi. Chayraykutaj atiyniyoj karqa parlasqampi, ruwasqampi ima.

²³Moisestaj tawa chunka watayojña kashaspa, sonqonta nanachikorqa israelita ayllu masisninmanta. Chayrayku munarqa watukuyta.

²⁴Chayaspataj rikorqa uj Egipto llajtayoj runa israelitata maqashajta. Moisestaj israelitaman kutikuspa, chay egipciota wañurparicherqa.

²⁵Moisesqa yuyarqa israelita wauqesnin umachakunankuta, Dios paynejta chay ñak'ariykunamanta orqhonanta. Paykunataj chaytaqa mana unancharqankuchu.

²⁶Q'ayantintaj Moisés rikorqa israelitas maqanakushajta. Allinyachiyta munaspataj paykunaman nerqa: Qhari masis, qankunaqa wauqes kankichej, imaraykutaj qankunapura maqanakushankichejri?

²⁷Runa masinta maqajtaj, Moisesta tanqarparispa nerqa: Pitaj qanta churasunki kamachejniyku, juezniykutaj kanaykipaj?

²⁸Kunanqa, noqatañatajchu wañuchiyta munanki, imaynatachus qayna egipciota wañucherqanki ajinata?, nispa.

²⁹Moisestaj chayta uyarispa Egiptomanta ayqerqa Madián jallp'aman. Chaypitaj waj llajtayoj jina kakorqa; iskay qhari wawasnintaj tiyaporqa.

³⁰Tawa chunka wata qhepamantaj, ch'impi Moisés kashajtin, Sinaí orqopi uj ángel rikhurerqa, nina larwashaj zarzapi.

³¹Moisesqa t'ukorqa chayta rikuspa. Imachus kasqanta allinta qhawanampaj qayllaykushajtintaj, Diospa parlamusqanta uyarerqa: Noqa kani tatasniykej Diosnin, Abrahampa Diosnin, Isaacpata, Jacobpata ima, nispa. Moisesqa mancharikuywan kharkatitispa, mana qhawariyllatapis munarqachu.

³²

³³Señortaj payman nerqa: Ujut'asniykita lluch'ukuy. Maypichus sayashanki chayqa, Diospa ajllakusqan jallp'a.

³⁴Cheqamanta noqa rikuni Egiptopi, israelita wawasniy ñak'arisqankuta, sonqo nanayta waqasqankuta ima uyarini. Chayrayku uraykamuni chaymanta orqhonaypaj. Kunanqa jamuy ari, Egiptoman kachasqayki, nispa.

³⁵Kaymin chay Moisesqa pitachus israelitakuna qhesachaspa nerqanku: Pitaj qanta churasorqa, kamachejniyku, juezniykutaj kanaykipajri? Paytataj Dios kacharqa, paykunaj kamachejnin kanampaj, kacharichejnintaj; chay larwashaj zarzapi ángel rikhurejnejta.

³⁶Kay Moisés orqhomorqa Egiptomanta israelitakunata, milagrosta, señalesta ima ruwaspa, puka mar qochapi, ch'in pampaspi ima tawa chunka wata junt'ata.

³⁷Kaymin chay Moisesqa pichus israelitasman nerqa: Qankuna ukhullamantataj Dios sayarichenqa uj profetata qankunapaj, noqata jina; paytataj uyarinkichej.

³⁸Kay Moisesqa israelitaswan tatasqa ch'in pampapi karqa. Paytaj Sinaí orqopi parlarqa angelwan, tatasninchejwan ima. Kay Moisesllataj Diosmanta jap'erqa kausay palabrasta, noqanchejman qonawanchejpaj.

³⁹Tatasninchejtaj Moisesta mana kasuyta munarqankuchu, qhesacharqankutaj sonqosninkupi Egiptoman kutiripuyta munaspa.

⁴⁰Chayraykutaj Aaronman nerqanku: Dioskunata ruwapuwayku ñaupaqeykuta rinankupaj. Egiptomanta orqhomuwarqayku chay Moisesqa mana yachakunchu, imanakapunchus.

⁴¹Paykunataj ruwarqanku waka uñaj lantinta. Uywasta wañuchispataj, chay waka uña ruwasqankuman jaywarqanku. Kusikorqankutaj chay makisninkuwan ruwasqankupi.

⁴²Chayraykutaj Dios paykunamanta t'aqakorqa, saqerqataj patapi kaj qoyllurkunata yupaychanankuta, imaynatachus profetaspa escribisqankupi nishan: Israelitas, noqamanchu uywasta wañuchispa jaywawarqankichej, tawa chunka watasta ch'in pampapi kashaspa?

⁴³Qankunaqa Molocpa toldontaraj astawan apaykacharqankichej, Refán nisqa diosniykichejpa qoyllurnintawan. Chay lantista qankunallataj ruwakorqankichej, paykunaman k'umuykunaykichejpaj. Chayrayku llajtaykichejmanta pusachisqaykichej, Babilonia llajtamantapis aswan karumanraj.

⁴⁴Tatasninchejpata toldonqa ch'in pampapi karqa, maypichus Diosmanta yachaj kanku. Diospa kamachisqanman jina ruwasqa; imaynatachus Moisesman kamacherqa, maychus rikusqanman jina ruwananta.

⁴⁵Chay toldota tatasninchej jap'erqanku. Chaymantataj Josuewan aparqanku gentilesmanta qhechusqanku jallp'aman, maymantachus Dios qharqorqa gentilesta tatasninchejpa ñaupaqenkumanta, Davidpa tiemponkama.

⁴⁶Davidqa Diospa yanapayninta tarerqa. Chayrayku paymanta mañakorqa templota saqenanta Jacobpa ayllumpaj.

⁴⁷Salomontaj Diospaj wasita sayaricherqa.

⁴⁸Chaywampis patapi kaj Diosqa, mana runaj makisninwan ruwasqa wasipichu tiyakun, imaynatachus profetaspis nin: Janaj pachaqa tronoy, kay pachataj chakisniyta churanay. Ima laya wasitataj ruwapuwankichejri? Chayri, maynejpitaj samarikusajri?

⁴⁹

⁵⁰Manachu kay tukuy imasta makiy ruwarqa?, nin Señorqa.

⁵¹Estebanqa nillarqataj: Qankunaqa mana yuyayniyoj rumi sonqos, mana uyarikojtaj kankichej. Chayrayku Santo Espíritoj contrampi kankichej, ñaupa tatasniykichej jina, wapuchakunkichejtaj.

⁵²Mayqen profetatatajñaupa tatasniykichej, mana qhatiykacharqankuchu ñak'arichinankupaj? Paykuna ñaupajmantapacha, cheqan kaj jamunanta willashajtinku wañuracherqanku. Kunanrí, qankunañataj jap'ichispa payta wañucherqankichej.

⁵³Qankunaqa leyta jap'erqankichej angelesnejta, manataj waqaycharqankichejchu.

⁵⁴Jatun juntapi Kuraj kamachejkunaqa, Estebampa parlasqanta uyarispa, maytapuni phiñakorqanku sonqosninkupi, kirusninkutataj k'arurakorqanku paypa contranta.

⁵⁵Estebanqa Santo Espirituwan junt'a karqa, janaj pachata qhawarispataj Diospa jatun k'anchayninta rikorqa, Jesustapis rikullarqataj Diospa pañampi kashajta.

⁵⁶Estebantaj nerqa: Qhawariychej, janaj pachata kichasqata rikushani, Runaj Churintataj Diospa pañampi kashajta.

⁵⁷Manchayta qhaparispataj ningrisninkuta lluphaykorqanku, tukuyninkutaj ujllata correykorqanku Estebanman.

⁵⁸Llajtamantataj maqaspa jawaman orqhorqanku, rumiswantaj ch'anqaykorqanku. Chay ch'anqajkunataj p'achasninkuta qhawanampaj saqerqanku uj wayna Saulo sutiyojman.

⁵⁹Chanqashajtinkutaj Estebanqa mañakuspa nerqa: Señor Jesusníy, espirituyta jap'ikapuy, nispa.

⁶⁰Qonqoriykukuspataj sinch'ita qhaparispa nerqa: Señor, ama paykunata juchachaychu kay ruwasqankumanta. Chayta niytawantaj puñukaporqa.