Read Quechua Bolivia DC Bible ROMANOS 11 Bible Online

ROMANOS 11 - Quechua Bolivia DC Bible bible

ROMANOS 11

¹Kunanqa tapuni: Diosqa ayllunta qhesachanchu? Mana imaynamantapis qhesachanchu. Noqapis israelita kani, Abrahampa mirayninmanta, Benjamimpa ayllunmantataj.

²Diosqa ayllunta mana qhesachanchu, imaraykuchus ñaupajmantapacha rejserqa. Chayrí, manachu yachankichej escribisqapi imatachus Eliasmanta nisqanta? Imaynatachus pay Israelpa contranta Diosman willakusqanta?, nispa: Señor, profetasniykita wañurachinku, altaresniykitapis urmarachinku, noqallaña qhepakuni; kunanrí noqatañataj wañuchiwayta munashanku.

⁴Chantá, Dios ima nintajri? Qanchis waranqa runasta t'aqakuni. Paykunaqa lantisman Baalpa ñaupaqenman mana qonqorikorqankuchu.

⁵Ajinallatataj kay p'unchaykunapipis israelitasmanta pisi runaslla puchunku, Diospa khuyakuyninman jina ajllasqas.

⁶Sichus Diospa khuyakuyninrayku ajllasqas kanchej chayqa, manaña ruwasqasninchejraykuchu. Mana jina kanman chayqa, Diospa khuyakuynenqa, manaña khuyakuychu kanman. [Sichus ruwanasraykutaj kanman chayqa, mana khuyakuychu kanman. Uj jinamantaqa ruwaypis manaña ruwaychu kanman.]

⁷Chantá imatajri? Israelitasqa imatachus mask'asqankuta mana tarerqankuchu. Diospa ajllasqasnintaj tarerqanku. Wajkunataj sonqonkuta rumiyacherqanku.

⁸Escribisqa kasqanman jina, Dios paykunaj yuyayninkuta pejtorqa; qorqataj mana rikoj ñawista, mana uyarej ningrista ima kunan p'unchaykama.

⁹Davidpis nin: Qaraku mikhuyninkupipis paykunapaj tojlla kachun, ch'ipataj chaypi misk'akunankupaj, jasut'isqastaj kanankupaj.

¹⁰Ñawisninkupipis laqhayachunku ama rikunankupaj, jinallataj wawasninkupis k'uruyachunku wiñaypaj.

¹¹Kayta nini: Israelitasqa urmanankupajchu misk'arqanku? Mana jinachu, astawanqa paykunaj juchankurayku salvacionqa gentilesman jamorqa, israelitasta moq'echinampaj.

¹²Juchachakusqankuchus kay pachaj allinnimpaj, urmasqankupis gentilespa allinnimpaj kanman chayqa, may jina allinrajchus kanqa tukuy judíos Diosman kutirisqankoqa.

¹³Qankunaman, gentiles, parlaykichej, gentilesman Dios kachamuwasqanrayku. Chayrayku llank'ayniytaqa allimpaj qhawachini.

¹⁴Ichachus ajinapi kallpachayman yawarniymanta kajkunata, paykunapis salvakuyta munanankupaj, paykunamanta wakillantapis salvanaypaj.

¹⁵T'aqasqa kasqankuchus, runakunapaj Dioswan allinyakuy kanman chayqa, imaynataj kanqa Diosman kutirikuyri. Manachu chayqa wañusqamantaña kausarimuy kanman?

¹⁶Sichus ñaupajta llojsimoj t'antas llimphus kanku chayqa, Ajinallataj tukuynin masapis llimphu. Ajinallataj sichus sach'aj saphisnin llimphus kanku chayqa, tukuynin ramasnimpis llimphusllataj kanku.

¹⁷Wakin judiosqa, olivo sach'aj ramasnin jina p'akirasqas karqanku. Qanqa monte olivo kashaspa, chay p'akirasqa palqasman t'inkisqa karqanki. Chaynejta cheqa olivoj saphinmanta, qhapaj kausayninmantawan kausayta paykunawan khuska ch'onqanaykipaj.

¹⁸Kunanqa ama runaykachaychu palqaspa contranta aswan allin kasqaykita. Sichus qan yuyakunki paykunamanta aswan allin kasqaykita chayqa, yachay saphita mana qanchu kausachinki, astawanqa saphi qanta kausachisunki.

¹⁹Manachayqa ninkichari, wakin palqas k'uturasqas kasqanku, chay olivoman t'inkisqa kanaypaj.

²⁰Arí, paykunaqa mana creesqankurayku p'akirasqas karqanku, qanrí fenejta sayashanki. Amaña jatunchakuychu, astawanqa manchachikuy.

²¹Sichus judíos kikin olivoj ramasnin kashajtinku, Dios paykunaj juchasninkuta mana pampacharqachu chayqa, manallataj qampa juchasniykitapis pampachanqachu.

²²Qhawariy ari, Diospa k'acha kayninta, phiña kaynintawan; urmajkunapaj phiñakuyninta rikucherqa, qampajtaj khuyakuyninta. Sichus qan chay khuyakuypi mana allintachu sayanki chayqa, qampis k'utusqallataj kanki.

²³Waj jinamantaqa sichus judiospis creenqanku chayqa, paykunapis watejmanta olivos sach'ankuman t'inkisqas kanqanku, Diosqa atiyniyoj ujtawan paykunata t'inkinampaj.

²⁴Sichus qanqa monte olivomanta k'utusqa karqanki, mana judío kaspalla chayqa, allin olivoman t'inkisqa kanki. Imaraykutaj chantá judiosqa allin olivoj ramasnin kashaspa, kikin olivonkuman mana watejmanta t'inkisqas kankumanchu?

²⁵Hermanos, kay pakasqa yachaytaqa rejsinaykichejta munani, ama yachaysapas kasqaykichejta yuyakunaykichejpaj. Wakin israelitaspa sonqon rumiyarqa gentilespa salvacionnin junt'akunankama.

²⁶Chayrayku tukuy Israel ayllu salvasqa kanqa, imaynachus escribisqa kasqanman jina: Sionmanta uj kacharichej jamonqa, Jacobpa mirayninmantataj mana allin kajta karunchenqa.

²⁷Kay kanqa paykunawan tratoyqa, maypachachus juchasninkuta paykunamanta qhechusaj chaypacha.

²⁸Paykunaqa qankunarayku evangelio jawa enemigos kanku. Ajllasqas kasqankuman jinataj munasqas kanku ñaupa tatasrayku.

²⁹Diospa qosqasnenqa, wajyaynimpis mana qhechukuyniyojchu.

³⁰Qankunapis ñaupaj p'unchaykunapeqa Diosta mana kasojchu kankichej; kunanrí khuyakuyta tarinkichejña judíos mana kasukusqankurayku.

³¹Ajinallataj judiospis mana kasukorqankuchu, qankunaman khuyakuy qosqa kasqanrayku, paykunapis khuyakuyta tarinankupaj.

³²Dios tukuyta mana kasukuypi jap'erqa, tukuyman khuyakuyninta chayachinampaj.

³³May jina jatumpunichus Diospa qhapaj kaynin, yachaynin, rejsiynimpis. Mana yachay atina yuyasqampis, jinallataj ñankunasnimpis.

³⁴Pitaj, Diospa imatachus yuyasqanta rejserqa? Chayrí, pitaj Diosta yuyaycharqa?

³⁵Chayri, pitaj imatapis Diosman ñaupajta jaywarqa, chaymantataj pagota jap'inampaj?

³⁶Tukuy ima paypata, paynejta, paypajtaj kanku. Chayrayku pay yupaychasqa kachun wiñaypa wiñaynimpaj. Amén.