Read Quechua Bolivia DC Bible ROMANOS 14 Bible Online

ROMANOS 14 - Quechua Bolivia DC Bible bible

ROMANOS 14

¹Fepi pisi kallpayojtaqa wajyakuychej, amataj iskayrayana yuyaykunamantaqa churanakuychejchu.

²Uj runaqa yuyan tukuy imata mikhunanta; wajrí, fepi pisi kallpayoj kaspa, yuyan q'omerkunasllata mikhunanta.

³Tukuy imata mikhojqa ama qhawarachunchu mana tukuy imata mikhojtaqa. Mana mikhojpis ama qhawarachunchu chayta mikhojtaqa; imaraykuchus Diosqa chay runata paypaj ajllarqa.

⁴Qanrí, pitaj kanki wajpa kamachinta juzganaykipaj? Chay runaqa patronnillampaj allimpis mana allimpis kashan. Chayrayku payqa sinch'ita sayanqa, imaraykuchus Señorqa atiyniyoj sinch'ita sayachinampaj.

⁵Uj runaqa nin p'unchaykunaqa mana kikin kikinchu kasqankuta. Waj runataj nin sapa p'unchayqa uj rejlla kasqanta. Ajinaqa sapa uj yuyayninman jina, allin kasqanta yachachun.

⁶Pichus uj p'unchayta waqaychajqa, Señorpaj waqaychan. [Mana waqaychajtaj, Señorta yupaychanampaj mana waqaychanchu.] Pichus tukuy imata mikhojpis, Señorpaj mikhun, imaraykuchus Diosman graciasta qon. Chantá, pichus wakin imasllata mikhojpis, mana Señorpaj mikhunchu, astawanqa paypis Diosman graciasta qollantaj.

⁷Noqanchejmanta mana pipis pay kikimpajchu kausan, nitaj pipis pay kikimpajchu wañun.

⁸Chayrayku kausanchej chayqa, Señorpaj kausanchej. Wañuspapis, Señorpaj wañunchej. Ajina ari, kausaspapis, wañuspapis Señorpata kanchej.

⁹Cristoqa kaypaj wañorqa, kausarimorqataj. Watejmantataj kausashan wañusqaspata, kausajkunajtawan Señorninku kanampaj.

¹⁰Qanrí, imaraykutaj hermanoykita juzganki? Chayrí, imaraykutaj hermanoykita qhesachanki? Tukuyninchej cheqanchasqas kasunchej Diospa ñaupaqempi.

¹¹Escribisqa kashan: Señorqa nin: Noqa kausashani, tukuy ñaupaqeypi qonqorikonqanku, tukuy qallustaj Diosta yupaychanqanku, nispa.

¹²Ajinaqa sapa ujninchej Diosman willakunanchej tiyan noqanchej kikinchejmanta.

¹³Chayrayku amaña ujkuna ujkunata juchachanakunachu, astawanqa mask'ana hermanosta ama juchaman misk'achispa, nitaj urmachispa.

¹⁴Noqa yachani, yuyanitaj Señor Jesuspi, mana imapis pay kikinmanta ch'ichi kasqanta. Astawanqa pichus yuyan imallapis ch'ichi kasqanta chayqa, payllapaj chay imasqa ch'ichi kashan.

¹⁵Sichus mikhusqaykirayku wauqeyki llakikun chayqa, manaña munakuyman jinachu purishanki. Ama pipis mikhusqaykirayku chinkachunchu, imaraykuchus chay runapaj Cristo wañorqa.

¹⁶Ama ari allin kausayniykichejtaqa p'enqaypi qhawachiychejchu.

¹⁷Diospa reinonqa mana mikhunachu, nitaj ujyanachu. Manachayqa cheqan kay, sonqo tiyakuy, kusikuytaj Santo Espiritupi.

¹⁸Pichus kay imaspi Cristoj kamachinta ruwan chayqa, Diosta kusichin, runastaj chaytaqa allimpaj qhawanku.

¹⁹Ajinaqa, imachus sonqo tiyakuyta apamun, chayta qhatina, purajmanta kallpachankuspa.

²⁰Diospa ruwayninta ama chinkachiychu mikhunasrayku. Cheqamanta tukuy imaqa llimphu; chayrí, manataj allinchu, runaqa wajkunata misk'achinan, imatachus mikhusqanwan.

²¹Allinmin aychata mana mikhunaqa, nitaj vinota ujyanapis; nillataj allinchu imachus wauqeykita misk'achin chayta ruwanapis. Chayrí, imachus juchaman urmachin, fenintataj pisiyachin chaytapis.

²²Tiyanchu feniyki? Feqa tiyapusuchun Diospa ñaupaqempi. Kusikuyniyojmin pichus pay kikin mana pantajqa, chay imatachus allimpaj yuyasqampi.

²³Chantá, pichari imatachu mikhusqanmanta iskayrayan chayqa juchachakun, imaraykuchus mana fewanchu ruwan. Tukuy ima mana femanta kajqa, jucha.