Read Quechua Bolivia DC Bible ROMANOS 16 Bible Online

ROMANOS 16 - Quechua Bolivia DC Bible bible

ROMANOS 16

¹Hermananchej Febeta wajyarikunaykichejta munani. Payqa Cencrea iglesiapi diaconisa kashan.

²Señorpa sutimpi, imaynatachus creejkuna ruwayta yachanku ajinata, payta wajyarikuychej. Imanchus pisiponqa chaytapis yanapaychej, imaraykuchus payqa ashkha hermanosta yanaparqa, ajinallatataj noqatapis yanapawarqa.

³Napaykuychej Priscata, Aquilatawan. Paykunaqa Cristopi yanapawajkuna kanku.

⁴Paykuna kausayninkuta churayta munarqanku noqarayku. Chayrayku paykunamanqa mana noqallachu graciasta qoni, astawanqa gentilespa iglesiasnimpis graciasta qollankutaj.

⁵Chantá paykunaj wasinkupi iglesiatapis napaykullaychejtaj. Munakusqay Epenetota napaykuychej. Pay ñaupajta Cristopi creej karqa Asiapi.

⁶Mariata napaykuychej. Payqa ashkhata qankuna ukhupi llank'arqa.

⁷Yawar masisniy Andronicota, Juniastawan napaykuychej. Paykunaqa noqawan khuska carcelpi karqanku. Paykunata apóstoles mayta munakunku. Chantá, noqamanta ñaupajta creerqanku.

⁸Señorpa sutimpi munakusqay Ampliasta napaykuychej.

⁹Cristopaj llank'aysiwajninchej Urbanota, munasqa Estaquistawan napaykuychej.

¹⁰Cristopi allin qhawasqa Apelesta napaykuychej, jinallataj Aristóbuloj wasimpi kajkunatapis.

¹¹Yawar masiy Herodionta napaykuychej, jinallataj Narcisoj wasimpi kajkunatapis. Paykunaqa Señorpi creenku.

¹²Trifenata, Trifosatawan napaykuychej. Paykunaqa Señorpaj llank'anku. Chantá munasqa Persidata napaykuychej. Payqa ashkhata Señorpaj llank'arqa.

¹³Señorpi ajllasqa Rufota napaykapuwaychej, mamantawan. Payqa noqajtapis mamay jina karqa.

¹⁴Napaykuychej Asincritota, Flegonteta, Hermesta, Patrobasta, Hermasta, paykunawan kaj hermanostawan.

¹⁵Napaykuychej Filologota, Juliata, Nereota, panantawan, Olimpasta, Diospaj tukuy ajllasqas paywan kajkunatawan.

¹⁶Sapa uj llimphu much'aywan napaykunakuychej. Cristoj tukuy iglesiasnin napaykamusunkichej.

¹⁷Hermanos, mañaykichej allinta qhawakunaykichejta, t'aqanachejkunamanta, misk'achejkunamanta ima, imaraykuchus paykunaqa, yachakusqaykichejmanta waj yachachiyta yachachinku. Chaykunamanta t'aqakuychej.

¹⁸Chay jina runakunaqa, Señorninchej Jesucristota mana kasunkuchu. Paykunaqa kikin wijsasnillankuta kasunku, pisi yuyayniyojkunatataj ch'aukiyanku k'acha palabraswan, misk'i simiwan ima.

¹⁹Qankunaj kasukuyniykichejqa tukuypaj rejsisqaña, chayrayku qankunamanta kusikuni. Kunanrí munani allin kajpaj yachayniyoj kanaykichejta, sajra kajpajtaj pisi yuyayniyoj.

²⁰Pisimantawan sonqo tiyakuy Dios, Satanasta chakiykichej urapi saronqa. Señorninchej Jesucristoj khuyakuynin qankunawan kachun.

²¹Yanapawajniy Timoteo napaykamusunkichej, jinallataj yawar masiy Lucio, Jasón, Sosípater ima.

²²Noqa Tercio, kay cartata escribej, Señorpa sutimpi napaykamuykichej.

²³Gayo napaykamusunkichej. Pay wasinman wajyariwarqa jinallataj tukuy iglesiamanta kajkunatapis. Llajtapi qolqe jallch'aj Erasto, napaykamusunkichej, jinallataj hermano Cuartopis. [

²⁴Señorninchej Jesucristoj khuyakuynin tukuyniykichejwan kachun. Amén.]

²⁵Qankunata sinch'ita sayachej Diosta yupaychaychej, evangelionman jina. Jesucristomanta willasqaymantataj wiñaypa wiñaynintinmantapacha pakasqa yachay sut'inchasqay kasqanman jina.

²⁶Chayqa kunan rikuchisqaña karqa, profetaspa escribisqankupi, wiñaymantapacha Diospa kamachiynin jina. Chay pakasqa yachayqa runasman rejsichisqaña kashan, creenankupaj kasunankupajtaj.

²⁷Uj k'ata yachayniyoj Diostaj yupaychasqa kachun, Jesucristonejta wiñaypa wiñaynintimpaj. Amén.