Read Quechua Bolivia DC Bible ROMANOS 3 Bible Online

ROMANOS 3 - Quechua Bolivia DC Bible bible

ROMANOS 3

¹Imapitaj astawan walej judío kajri, chayrí ima yanapataj kasqa circuncisiompi?

²Anchatapuni, tukuy imaymanamanta, cheqatapuni ñaupajmantapacha Diospa palabran paykunaman qosqa karqa.

³Sichus paykunamanta wakin mana creerqankuchu chayqa, imanantajri? Paykunaj mana creesqankuchu Diospa cheqa kayninta atipanman?

⁴Chayqa mana jinachu; astawampis Diosqa cheqamin, tukuy imata ruwan cheqa kajman jina, tukuy runataj llulla, escribisqa kasqanman jina: Palabrasniynejta cheqan runapaj qhawasqa kanaykipaj; juzgasojtinkutaj atipanaykipaj.

⁵Sajra kayninchejchus Diospa cheqa kayninta sut'ita rikuchin chayqa, ima nisuntaj, Diosqa jasut'ispa juchayojchu? Kaytaqa parlani runa jina.

⁶Chayqa mana jinachu; ajina kanman chayqa, Dios imaynatataj mundota juzganman?

⁷Chantá, llullakuyniyraykuchus Diospa cheqa kaynin allinnimpaj wiñarqa chayqa; imaraykutaj juchayojpis kayman jina juchachasqa kaniri?

⁸Imaraykutaj mana nisunmanchu; imaynatachus wakin tumpawanchej, noqanchej nisqanchejta, sajra kajkunata ruwana, allin kajkuna jamunampaj, nispa? Paykuna jasut'isqa kanankoqa cheqapuni.

⁹Imaynataj chantari? Noqanchej judiosqa gentilesmanta aswan allinchu kanchej? Chayqa mana jinachu. Ch'ataykunchejñaqa judiosta, griegostapis, paykuna tukuyninku juchapi kasqankuta, escribisqaman jina: Mana ujpis mana juchayojqa kanchu.

¹¹Entiendejqa mana pipis kanchu; Diosta mask'ajpis manallataj kanchu.

¹²Tukuyninku cheqan ñanmanta wist'uykorqanku, ujllapitaj chinkayman rerqanku. Mana pipis allin kajta ruwajqa kanchu, ni ujllapis.

¹³Malq'ankoqa kicharisqa sepultura jina. Siminkuwan ch'aukiyanku. Simi llaphasninkupitaj katari veneno tiyan.

¹⁴Siminkoqa junt'a kashan maldicionwan, jayawantaj.

¹⁵Chakinkupis usqhay usqhayta rinku yawarta jich'anankupaj.

¹⁶Ñanninkupeqa mana allin kausay kanchu. Ñak'ariylla tiyan.

¹⁷Mana sonqo tiyasqa ñanta rejserqankuchu.

¹⁸Diosta manchachikoyqa mana kanchu, ñawisninkoj ñaupaqempi.

¹⁹Yachanchej, leypa tukuy nisqanta, leypi kajkunapaj churasqa kasqanta; tukuy runa ch'inyanampaj, mundontintaj Diospa ñaupaqempi juchachasqa rikhurinampaj.

²⁰Leypa kamachisqasninta ruwasqanrayku, mana pipis Diospa ñaupaqempi salvasqachu kanqa; leynejta juchaqa rejsichikun.

²¹Kunanrí, leyta saqespa, Diosqa salvacionta rikuchin. Chay salvacionmanta leywan profetaswan willanku.

²²Diosqa cheqan kayninta rikuchenqa fenejta Jesucristopi, tukuy paypi creejkunapaj. Paykunaqa uj rejlla kanku.

²³Tukuy runas juchallikusqanrayku, Diospa janaj pacha k'anchayninmanta t'aqasqas kanku.

²⁴Diospa khuyakuyninrayku, qhasimanta cheqan runaspaj qhawasqas kanku, Cristo Jesusnejta salvación kasqanrayku.

²⁵Payta Dios churarqa wañuyninwan allinyachinampaj, fenejta yawarnimpi. Ajinapi pacienciawan cheqa kayninta rikucherqa, pampacharqataj tukuy ñaupaj juchasta.

²⁶Kay p'unchaykunapi cheqan kayninta rikuchiyta munaspa, pay cheqan kaspa Jesuspi creejta cheqan runapaj qhawanampaj.

²⁷Maypitaj kashan runaj alabakuyninri? Chayqa wijch'usqaña. Mayqen leyraykutaj? Ruwanaspa leyninraykuchu? Mana. Astawanqa creesqampa leyninrayku wijch'usqa kashan.

²⁸Ajinapi yachanchej fenejta runaqa mana juchayoj rikhurisqanta, manataj leypa ruwanasninraykuchu.

²⁹Diosqa judiospa Diosnillanchu? Manachu gentilespatapis Diosnillantaj? Cheqamanta paykunajtapis Diosnillantaj.

³⁰Diosqa ujlla, paytaj fenejta circuncidasqasta, mana circuncidasqastapis, mana juchayojpaj rejsenqa.

³¹Chantá, feraykuchu leyta qhesachanchej? Mana imaynamantapis qhesachanchejchu, astawanqa leyta sinch'ita sayachinchej.