Read Quechua Bolivia DC Bible ROMANOS 6 Bible Online

ROMANOS 6 - Quechua Bolivia DC Bible bible

ROMANOS 6

¹Kunan ima nisuntaj? Juchachakullasumpunichu Diospa khuyakuynin astawan ashkhayanampaj?

²Chayqa mana jinachu. Juchapajqa wañorqanchejña. Imaynatataj juchallapipuni kausasunri?

³Chayrí, manachu yachankichej Cristo Jesuspi tukuy bautizasqa kajkunaqa, wañuynimpi bautizasqas kasqanchejta?

⁴Bautismonejta Cristowan khuska wañuypi p'ampasqas karqanchej, imaynatachus Cristopis, wañusqamanta kausarimorqa, Dios Tata jatunchasqa kanampaj atiyninwan; ajinallatataj noqanchejpis mosoj kausaypi purinachej.

⁵Wañuynimpa rijch'aynimpichus paywan khuska churasqa karqanchej chayqa, ajinallataj kasunchej kausarimuynimpipis.

⁶Yachanchej mauk'a runanchejqa paywan khuska chakatasqa kasqanta, juchallikoj aychanchej wañunampaj, amañataj astawan juchata kasunanchejpaj.

⁷Pichus juchapaj wañojqa, juchamanta kacharisqaña.

⁸Cristowan wañunchej chayqa, creenchej paywan khuskallataj kausananchejta.

⁹Yachanchej Cristoqa wañusqamanta kausarimuspa, manaña wañunanta. Wañoyqa manaña payta taripanqachu.

¹⁰Juchapaj wañuspaqa, uj kutillata wañun wiñaypaj, kausaspataj Diosllapaj kausan.

¹¹Ajinallatataj qankunapis yachaychej, juchapaj wañusqas kasqaykichejta, Diospajtaj kausasqaykichejta Cristo Jesús Señorninchejpi.

¹²Chayrayku juchaqa wañoj cuerpoykichejta ama atipachunchu, amaña sajra munayninta kasunaykichejpaj.

¹³Amallataj cuerpoykichejta juchaman qoychejchu, paynejta sajra imasta ruwanapajqa. Astawanqa qankuna kikiykichej wañusqasmanta kausarimusqas jina, Diosman qayllakuychej; cuerpoykichejtataj Diosman qoychej, cheqan kajta ruwanampaj.

¹⁴Chayrayku juchaqa manaña kamachisonqachejchu, imaraykuchus manaña leypa kamachimpichu kankichej, astawanqa Diospa khuyakuynimpi kankichej.

¹⁵Chantaqa, juchallikusunchu mana leypa kamachiynimpi kaspa, Diospa khuyakuynimpi kasqanchejrayku? Chayqa mana jinachu.

¹⁶Manachu yachankichej pillatapis wata runa jina kasuspa, chaypa kamachin kasqaykichejta? Ajina ari, juchata kasunkichej chayqa, wañuypaj kanqa; Diosta kasunkichej chayrí, cheqan kausaypaj kanqa.

¹⁷Ñaupajta juchaj kamachisnin karqankichej. Kunantajrí Diospa khuyakuyninrayku tukuy sonqowan kasunkichejña, chay yachachiy qosqaman jina, mayqempichus yachachisqas karqankichej.

¹⁸Juchamanta kacharisqas kaspataj, cheqan kajpa kamachisninman tukunkichej.

¹⁹Runa jina parlani, pisi kallpayoj kasqaykichejrayku. Ajinamanta qankunaqa ñaupajta cuerpoykichejta qorqankichej, millay kajman, sajra kajmampis. Ajinata kunanqa llimphuchasqas kanaykichejpaj, cuerpoykichejta Diosman qoychej, cheqan kajta kasunaykichejpaj.

²⁰Juchaj kamachisnin kashaspaqa, cheqan kajta ruwanapaj, manaraj kamachisqaschu karqankichej.

²¹Chantá, chay imaspi ima allintataj tarerqankichej, mayqenmantachus kunan p'enqakushankichej chaykunamanta? Chaykunaj tukukuynenqa wañuymin.

²²Juchaj kamachiyninmanta kacharisqas kaspaqa, Diospa kamachisninña kankichej. Chaynejtataj, llimphu kausayta poqoyta jina tarinkichej; chaypa tukukuynintaj wiñay kausay.

²³Juchaj pagonqa wañuymin, Diospa regalonrí wiñay kausay, Cristo Jesús Señorninchejpi.