Read Quechua Bolivia DC Bible 1 CORINTIOS 3 Bible Online

1 CORINTIOS 3 - Quechua Bolivia DC Bible bible

1 CORINTIOS 3

¹Noqataj, hermanos, mana aterqanichu qankunaman parlapayayta Espiritupi kajkunaman jina, astawanqa aychamanta kajkunaman jina parlarqaykichej, Cristopi wawasman jina.

²Ñuñoj wawaman jina lecheta qorqaykichej, mana khamuna mikhuytachu; imaraykuchus chaytaqa manaraj aterqankichejchu mikhuyta; kunampis manarajpuni atinkichejchu; imaraykuchus aychaman jinallaraj kausashankichej, qankuna ukhupi tiyan qhawanakuykuna, churanakuykuna, t'aqanakuykuna ima. Manachu aychaman jina kausashankichej? Manachu mana creej runas jina purishankichej?

⁴Qankuna ukhupi ninakunkichej: Noqa cheqamanta Pablojta kani; ujtajrí, noqa Apolospata kani, nispa. Manachu chayta nispaqa aychamanta kaj runas jina kausashankichej?

⁵Kunanqa, pitaj Pablori? Pitaj Apolosri? Noqayku Diospa kamachisnin kayku, qankunataj noqaykunejta creerqankichej; chaytataj sapa ujniykuman Señor atiyta qowasqaykuman jina.

⁶Noqa plantarqani, Apolostaj qarparqa, Diostaj wiñacherqa.

⁷Chayrayku plantajqa, qarpajpis, mana imachu kanku. Chaytaqa Dioslla wiñachin.

⁸Plantajwan qarpajwanqa ujlla kanku. Chaywampis, sapa ujninku t'inkankuta jap'ikaponqanku llank'asqankuman jina.

⁹Paykunapis noqaykupis Diospaj llank'ayku, qankunataj Diospa chajran kankichej, chayri Diospa ruwasqan wasi jina kankichej.

¹⁰Dios atiyta qowasqanman jina, yachayniyoj albañil jina, cimientota churarqani, wajtaj patampi wasichan. Chaywampis, sapa uj allinta qhawachun imaynatachus patampi wasichasqanta.

¹¹Manataj pipis waj cimientota churayta atinchu churasqamantaqa; chay cimientoqa Jesucristo.

¹²Kay cimiento patapi pipis wasichanman qoriwan, qolqewan, k'acha rumiswan, chayrí k'aspiswan, ichhuswan, ch'aki laqheswan ima chayqa; sapa ujpa ruwasqan sut'inchakonqa; imaraykuchus chay juicio p'unchayqa jamonqa ninawan, ninataj rikuchenqa sapa ujpa ruwasqanta.

¹⁴Mayqempatachus, chay cimiento patapi wasi ruwasqan mana ruphanqachu chayqa, chayman jina t'inkanta jap'ikaponqa.

¹⁵Pejpatachus ruwasqan ruphaykonqa chayqa, mana jap'enqachu chinkachisqanmanta. Chaywampis, payqa salvasqa kanqa, ninamanta jina ayqekuspa.

¹⁶Manachu yachankichej Diospa templon kasqaykichejta, Diospa Espirituntaj qankunapi kashasqanta?

¹⁷Sichus pipis Diospa templonta urmachinman chayqa, Diospis chay runata urmachillanqataj, imaraykuchus Diospa templonqa llimphu, chay templotaj qankuna kankichej.

¹⁸Amataj qan kikiykita ch'aukiyakuychu; pillapis kay pachapi qankuna ukhupi yuyanman yachayniyoj kasqanta chayqa, mana yachayniyojman tukuchun, cheqamanta yachayniyoj kanampaj.

¹⁹Kay pacha yachayqa qhasi mana kaj Diospajqa. Escribisqapipis nishan: Dios urmachin yachayniyojkunata, llulla yachaynillankupitaj.

²⁰Ujtawan nillantaj: Señorqa rejsin yachayniyojkunaj yuyayninkuta qhasi mana kaj kasqankuta.

²¹Chayrayku ama pipis runamantaqa may yuyayniyoj kasqanta yuyakuchunchu, imaraykuchus tukuy ima qankunajta: Pablo kachun, Apolos kachun, Cefas kachun, kay mundo kachun, kausay kachun, wañuy kachun, kunan p'unchaypis kachun, jamoj p'unchaypis kachun, tukuy chaykunaqa qankunajta.

²³Qankunataj Cristojta kankichej, Cristotaj Diospata.