Read Quechua Bolivia DC Bible 1 CORINTIOS 5 Bible Online

1 CORINTIOS 5 - Quechua Bolivia DC Bible bible

1 CORINTIOS 5

¹Cheqamanta qankuna ukhupi qhenchachakuy kasqan uyarikun. Chay jina qhenchachakoyqa gentilespurapipis mana kanchu. Uj runa qankuna ukhupi tatampa warminwan kashan.

²Qankunarí wapus kashankichej! Manachu astawanqa llakikunaykichej karqa, chay jinata ruwasqanmanta, chay jina juchallikoj runata qankuna ukhumanta qharqosqa kanampaj?

³Cheqamanta, noqa qankunamanta karupi kashaspapis yuyayniypi qankunawan kashani. Ñapis juchachaniña chay runata chaypipis kashayman jina.

⁴Señorninchej Jesucristoj sutimpi tantakuspa, noqaj yuyayniywan ima, Señorninchej Jesucristoj atiyninwan.

⁵Chay runata supayman jaywaychej, aychan chinkachisqa kanampaj; almantaj salvasqa kanampaj Señor Jesuspa p'unchaynimpi.

⁶Mana allinchu wapuykachanaykichejqa. Manachu yachankichej pisi levaduralla tukuy masata poqochisqanta?

⁷Llimphuchakuychej ari chay mauk'a levaduramanta, mosoj masa kanaykichejpaj; qankunaqa mana levadurayoj t'anta jina kankichej. Cristomin Pascuanchejqa. Pay ñak'arerqa noqanchejrayku.

⁸Chayrayku, kunanqa ruwaychej Pascuataqa sumaj sonqowan, cheqa kajwan. Chaykunamá mana levadurayoj t'anta jina kanku; astawanqa ruwana tukuy sonqowan, cheqan yuyaywantaj.

⁹Cartapi escribimorqaykichejña qhencha runaswan ama tantakunaykichejta.

¹⁰Manataj chaykamapunichu nerqaykichej ithirikunaykichejta, kay pachapi qhenchasmanta, mich'asmanta, suwasmanta, lanti yupaychajkunamanta ima. Jina kanman chayqa, llojsipunaykichejchá kanman kay mundomanta.

¹¹Chay cartapeqa nimorqaykichej ama tantakunaykichejta ni mayqenwan, hermano sutiyoj kashaspa qhenchachakojwan, mich'akojwan, chayri lanti yupaychajwan, runa masimpaj sajrata rimajwan, chayri machaykojwan, suwakojwan; chay jina runawanqa ama mikhullaychejpischu.

¹²Ima allintaj kanman noqapaj, jawapi kajkunata juzganaypaj? Manachu qankuna juzgankichej iglesia ukhupi kajkunata?

¹³Jawapi kajkunataqa Dioslla juzganqa. Chay juchallikojtataj qankuna ukhumanta qharqoychej.